АдыгэхэмкIэ Советскэ Союзым иапэрэ ЛIыхъужъэу, усакIоу Андырхъое Хъусен зыщыфэхыгъэ ыкIи зыщагъэтIылъыгъэ чIыпIэу Луганскэ Народнэ Респуб­ликэм ит псэупIэу Дьяково Урысыем итхакIохэм я Союз илIыкIо куп бэмышIэу щыIагъ.

Нахьыжъхэм я Дунэе конгресс ипрези­дентэу, общественнэ движениеу «Адыге­им и Нахьыжъхэм» япащэу Аджыгырые Аскэрбый лIыкIо купым хэтыгъ.
Ащ къызэрэтфиIотагъэмкIэ, лIыкIо купым хэтыгъэх Урысыем и КъокIыпIэ Чыжьэ къыщегъэжьагъэу Калининград нэсэу ятхакIохэр. Ахэм пэщэныгъэ адызэрихьагъ тикъэралыгъо итхакIохэм я Союз иправление ипащэу Николай Ивановым.
Джащ фэдэу Iофтхьабзэм хэлэжьа­гъэх Адыгеим илIыкIохэр, ветеранхэм яорга­низацие хэтхэу Хъуадэ Адамрэ Юсуп ТIахьиррэ. Краснодар краим илIыкIо купи мыхэм ахэтыгъ.
ХьакIэхэм къапэгъокIыгъэх Луганскэ Народнэ Республикэм и Антрацитовскэ муниципальнэ район ипащэу Сергей Саенкэр, администрацием илIыкIохэр, шъолъырым идепутатхэр, псэупIэм ­дэсхэр.
ЛIыхъужъыр зыщыфэхыгъэ чIыпIэм шIэжь зэхахьэр щыкIуагъ. Илъэс зэкIэлъыкIохэм Андырхъое Хъусен ишIэжь зэрагъэлъапIэрэм ыкIи къызэраухъумэрэм афэшI Урысыем ыкIи Адыгеим итхакIохэм ялIыкIохэр районым щыпсэухэрэм афэрэзагъэх.

— ЛIыхъужъым лIыблэнагъэу зэри­хьагъэр ащымыгъупшэу исаугъэт лъэп­лъэх ыкIи ишIэжь агъэлъапIэ, — къы­Iуагъ Аджыгырые Аскэрбый.
Адыгеим и ЛIышъхьэу КъумпIыл Мурат IэпыIэгъу къызэрафэхъугъэм ишIуа­гъэкIэ республикэм икIыгъэ лIыкIо купым Адыгеим итарихъ ыкIи икультурэ къизыIотыкIырэ тхылъхэр район тхылъ­еджапIэм фащагъэх.
Нахьыжъхэм я Дунэе конгресс ипрези­дентэу бэмышIэу хадзыгъэ Аджыгырые Аскэрбый къызэриIуагъэмкIэ, непэрэ охъ­тэ мыпсынкIэу тызыхэтым культурэ ыкIи лъэпкъ зэфэшъхьафхэм ялIыкIохэр зэрэугъоинхэм ыкIи шIуагъэ зыпылъ Iоф­шIэнышхо зэшIуахыным мэхьанэшхо иI.
Ащ къызэрэхигъэщыгъэмкIэ, Андыр­хъое Хъусен УрысыемкIэ мэхьанэшхо зиIэ цIыф, ащ ищысэкIэ тикъэралыгъо иобщественнэ ыкIи икультурнэ щыIакIэ хэхъоны­гъэ ашIыным кавказым щыпсэу­рэ лъэпкъ­хэм яIахьышхо зэрэхэлъыр тэлъэгъу.
— Урысыем итхакIохэм я Союз зычIэт унэм Андырхъое Хъусен ибюст зэрэчIэтым мэхьанэшхо иI. Ар зышIыгъэр зэлъашIэрэ скульпторэу Зураб Церетели, — къызэфихьысыжьыгъ Аджыгырые Аскэрбый.
КIАРЭ Фатим.