Адыгэ Республикэм иминистрэхэм я Кабинет изэIукIэу Адыгеим и ЛIышъхьэу КъумпIыл Мурат зэрищагъэм предпринимательствэ цIыкIумрэ гурытымрэ Iэпы­Iэгъу ятыгъэнымкIэ шъолъырым щагъэфедэрэ амалхэр ары зыщатегущыIагъэхэр.

Мы IофыгъомкIэ къэгущыIагъ АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур. Ащ къызэрэхигъэщыгъэмкIэ, непэкIэ Адыгэ Республикэм бизнес цIыкIумрэ гурытымрэ япхыгъэу Iоф щызышIэрэр мин 17,2-рэ мэхъу. Мы аужырэ илъэси 2,5-м ахэм япчъагъэ мин 1,5-кIэ нахьыбэ хъугъэ. Респуб­ликэм иэкономикэ Iоф щызышIэхэрэм япроцент 43-р предпринимательствэ цIыкIумрэ гурытымрэ япхыгъэу щытых. 2022-рэ илъэсым икIэуххэм нафэ къызэрашIыгъэмкIэ, сомэ мил­лиард 54,4-рэ фэдиз мэхъу зэхэубытэгъэ про­дукциеу республикэм къыщахьыжьыгъэм ахэм яIахьэу халъхьагъэр. НэмыкIэу къэпIон хъумэ, сомэ миллиарди 197,1-у пстэумкIи къахьыжьыгъэм ипроцент 27,6-рэ фэдиз.
Адыгеим бизнесым къэралыгъо IэпыIэгъоу щыратырэм илъэс къэс хэхъо. 2022-рэ илъэсым сомэ миллиони 150-рэ ар хъущтыгъэмэ, 2023-м сомэ миллион 318-м нэсыгъ. Лъэпкъ проектэу «Предпринимательствэ цIыкIумрэ гурытымрэ ыкIи предприниматель IофшIэным IэпыIэгъу етыгъэныр» зыфиIорэм къыпкъырыкIыхэзэ, республикэм бизнес цIыкIумрэ гурытымрэ зыщаушъомбгъуным иамал шъхьаIэу щыIэхэм хэхъоныгъэ афашIы.
Бизнесым къэралыгъо IэпыIэгъу етыгъэнымкIэ Урысыем щызэрахьэрэ Iофтхьабзэхэри республикэм щагъэцакIэх, джащ фэдэу шъолъыр фэгъэкIотэныгъэ заули а лъэныкъомкIэ щыI. Предпринимательствэ цIыкIумрэ гурытымрэ IэпыIэгъу ятыгъэным яIахь хашIыхьэ Гупчэу «Сибизнес» зыфиIорэм, экспортым IэпыIэгъу етыгъэнымкIэ Гупчэм, чIыфэт компа­ние цIыкIухэм, Бизнес-инкубаторым. 2023-рэ илъэсым зэхэубытагъэу фэIо-фэшIэ мини 3,3-рэ фэдиз а организациехэм зэшIуахыгъ, 2024-рэ илъэсым иапэрэ кIэлъэныкъо фэIо-фэшIэ мин 1,5-рэ фэдиз.
Адыгеим и ЛIышъхьэ къызэрэхигъэщыгъэмкIэ, къэралыгъо IэпыIэгъум епхыгъэ Iофтхьа­бзэхэр зэкIэ зэдегъэштэныгъэ хэлъэу пхырыщыгъэнхэ фае.
«Адыгеим ихэхъоныгъэ и Стратегие тегъэ­псыхьагъэу республикэм иэкономикэкIэ уахътэм диштэрэ пшъэрылъхэр зэшIотэхых. Ащ къы­щыгъэнэфагъэх анахь мэхьанэшхо зэты­гъэн фэе лъэныкъохэр, анахь лъэшэу IэпыIэгъу тыз­фэхъун фаехэр. Къэралыгъо программэхэм, лъэпкъ проектхэм, предприниматель Iофтхьабзэхэм къыдалъытэрэ Iофыгъохэр зэкIэ зэшIохыгъэ хъунхэм пае республикэм IофшIэкIэшIу гъэнэфагъэ илъ хъугъэ. Пшъэрылъ инхэр зыфэдгъэуцужьынхэ, предприятиякIэхэм ягъэ­псынкIи кIэухышIухэм такъыфэкIон, чIыпIэ про­дукциер нахьыбэу къыдэдгъэкIын, респуб­ликэм итщырэр нахьыбэ тшIын фае», — къы­Iуагъ АР-м и ЛIышъхьэ.
АР-м и ЛIышъхьэ
ипресс-къулыкъу къытыгъэ къэбархэмкIэ
Тхьаркъохъо Сафыет.