«Дунаир къызэIух — ори зыкъызэIух!» — зыфиIорэ псалъэм я III-рэ Дунэе кIэлэцIыкIу культурнэ форумыр къыфэджагъ.

Урысые Федерацием икъэлэ гупчэу Москва щыкIогъэ Iоф­тхьабзэм Адыгеим икIыгъэ куп хэлэжьагъ. Адыгэ Республикэм искусствэхэмкIэ иколледжэу Тхьабысымэ Умар ыцIэ зыхьырэм, ансамблэу «Мыекъуапэ инэфылъэхэр» зыфиIорэм илIыкIохэм заушэтыгъ. Купым ипащэу, Урысыем культурэмкIэ изаслуженнэ IофышIэу, Адыгеим изаслуженнэ артистэу Нэныжъ Айдэмыр онлайн шIыкIэм тетэу тыдэгущыIагъ.
Ащ тызэрэщигъэгъозагъэмкIэ, кIэлэцIыкIу форумым къэралыгъо 15-мэ къарыкIыгъэ нэбгырэ мини 2,5-рэ къекIо­лIагъ. Ахэр музыкальнэ, театральнэ, художественнэ еджапIэхэм ачIэсых, къэшъокIо ыкIи орэдыIо купхэр къагъэлъагъох. Мыщ ишIуагъэкIэ Урысыемрэ нэмыкI хэгъэгухэм­рэ арыс кIэлэцIыкIу сэнаущхэм культурэмрэ искусствэмрэ алъэ­ныкъокIэ дунаимкIэ гъэхъа­гъэу щыIэхэм нэIуасэ зафашIын амал яIагъ. КIэлэцIыкIухэр къэ­ралы­гъо, общественнэ Iофы­шIэхэм, культурэм илIыкIохэм, кIэлэ­егъэджэ цIэрыIохэм аIукIагъэх.
Апэрэ мафэм Воробьевэ Iуашъхьэм щызэрэугъоигъэх, мэфэкI концерткIэ зэхахьэр рагъэжьагъ.
Iофтхьабзэр къызэIуихыгъ Урысые Федерацием и Правительствэ итхьаматэ игуадзэу Татьяна Голиковам.
— Культурэм, искусствэм цIыфыр апIу, щыIэныгъэм фагъасэ. Урысыем и Къэралыгъо быракъ и Мафэ Iофтхьабзэр зэрэтефагъэм къеушыхьаты дунаим тет цIыф лъэпкъхэм зыкIыныгъэ тиIэу, мамырэу ты­зэрэзэдэпсэурэр. МыщкIэ лъап­сэу тшIыгъэм зедгъэушъомбгъу­зэ тигъэхъагъэхэм зэрахэдгъэ­хъощтым щэч хэлъэп, — къы­Iуагъ Татьяна Голиковам.
Нэныжъ Айдэмыр къызэриIуа­гъэмкIэ, Iофтхьабзэм къыдыхэлъытагъэу десэхэр, зэIукIэгъу­хэр, мастер-классхэр, къэгъэлъэ­гъонхэр кIэлэцIыкIухэм афызахащагъэх. Зэхахьэм къы­щы­шъуагъэх, IэшIэгъабэхэм яшIыкIэ-амалхэр зэрагъэшIагъэх, кIэлэцIыкIухэр нэIуасэ зэфэшIыгъэнхэм епхыгъэ зэIукIэгъухэр рагъэкIокIыгъэх.

— Форумым къыдыхэлъытагъэу культурэм иIофышIэхэм зэIукIэгъухэр адытиIагъ, лекциехэм, мастер-классхэм, арт-еджа­пIэхэм, экскурсиехэм, артист цIэрыIохэм ядесэхэм ыкIи нэмыкI Iофтхьабзэхэм тахэлэ­жьагъ. Форумым ипрограммэ къэралыгъо, общественнэ IофышIэхэр, культурэм илIы­кIохэр, кIэлэцIыкIу къэшъокIо купхэр хэлэжьагъэх. Ахэм тэри тащыщ. Лъэпкъ зэфэшъхьафхэм ащыщ кIэлэцIыкIухэр ныбджэгъу зэфэ­хъугъэх, хореограф цIэрыIоу Егор Дружининым имастер-классэу «Непэрэ мафэм диштэрэ къэшъуакIэхэр» зыфиIорэм ашIогъэшIэгъонэу хэлэжьагъэх. Московскэ Губернскэ театрэм ипащэу, артист цIэрыIоу Сергей Безруковым, Московскэ къэралыгъо циркым ипащэу Эдгард Запашнэм таIукIагъ, — къы­Iуагъ Нэныжъ Айдэмыр. «Мые­къуапэ инэфылъэхэм» зэ­фэ­хьысыжь концертым адыгэ къэшъо пчъагъэ зыщызэхэугъоегъэ къэгъэлъэгъонэу «Си Адыгей» зыфиIорэр къыща­шIыгъ.
ЯтIонэрэ мафэм культурэм иIофышIэхэм аIукIагъэх, лекциехэр, экскурсиехэр ыкIи нэ­мыкI Iофтхьабзэхэр зэхащагъэх.
Гуфэбэныгъэрэ шIэныгъэрэ къызхахыгъэ форумыр зэфа­шIыжьыгъ. Лъэпкъ зэфэшъхьаф­хэу ащ щызэIукIагъэхэм язэ­къош­ныгъэ лъагъэкIотэщт.