НыбжьыкIэ театральнэ купыр Тыркуем икъалэу Бурса щылэжьэрэ Адыгэ хасэм рагъэблэгъагъ. Адыгэ чылэу Натырбыехьаблэ ихьакIагъэх.

Ныдэлъфыбзэхэм язэгъэшIэн изытет непэ зэрэдунаеу егъэгумэкIы, егъэджэ­кIэ-шIыкIэ амалхэм алъэхъух. АщкIэ кIэлэцIыкIу театрэу «Щыгъыжъый» зыфиIорэм ипащэу, Адыгэ Республикэм изаслуженнэ ыкIи инароднэ артисткэу, АР-м и Къэралыгъо шIухьафтын илауреатэу Уджыхъу Марыет шIыкIэ къыгъо­тыгъ. Лъэпкъыбзэм изэгъэшIэнкIэ екIо­лIэкIэ гъэшIэгъонхэм яамалэу театрэмрэ сценэмрэ ыгъэфедэзэ, кIэлэцIыкIухэм бзэр арегъашIэ. «Щыгъыжъыем» теат­ральнэ къэгъэлъэгъонхэр егъэуцу. Мы мафэхэм купыр Тыркуем кIуагъэу къэгъэлъэгъонхэр къыщеты.
Натырбыехьаблэ дэс тилъэпкъэгъу­хэмрэ «Щыгъыжъыем» хэтхэмрэ пчыхьэзэхахьэм щызэIукIагъэх, ныбжьыкIэхэр нэIуасэ щызэфэхъугъэх. Хэхэс адыгэхэмрэ театральнэ купымрэ зэблагъэ хъугъэх. Ахэм чэщдэс яIагъ, адыгэ джэгу зэхащагъ.
Театрэм Iутхэм IофшIэнышхо агъэцакIэ, кIэлэцIыкIухэр адыгэ культурэм нэIуасэ фашIых, тиныдэлъфыбзэ уасэ фашIыным ыкIи рыгущыIэнхэм фагъасэх. Ныдэлъфыбзэр къызэтегъэнэжьыгъэным, ныбжьыкIэхэм бзэр шIу алъэгъуным, ар зэрагъашIэным дэлажьэх.
КIэлэцIыкIу театрэу «Щыгъыжъыем» иактерхэр ныбжьыкIэх нахь мышIэми, ясэнэхьат хэшIыкIышхо фыряI. Культурэ ин зэрахэлъыр къахэщэу артист ныбжьыкIэхэм сценэм зэрифэшъуашэу зыкъыщагъэлъагъо. Актер ныбжьыкIэхэр мыгуlэхэу, гукlэ ащэчырэр къыбгурагъа­lоу, lофышхоу ашlэрэм ори уадыхэтэу къыпщагъэхъоу якъэгъэлъэгъонхэр агъэ­псы. Пщынэо ныбжьыкIэу Биданыкъо Тембот Iофтхьабзэхэр къыгъэкIэрэкIагъ.

— Лъэпкъым шIуагъэ къыфэтхьызэ Iоф зэрэтшIэщтым тыпылъ, — къыIуагъ театрэм ипащэу Уджыхъу Марыет. — Убзэ шIу плъэгъуныр, ащ уасэ фэпшIыныр хэтрэ цIыфи зэрипшъэрылъыр лIэужыкIэм гурыдгъэIоным тынаIэ тедгъэтыщт.
Ныдэлъфыбзэр ныбжьыкIэхэм ягъэсэныгъэ-пIуныгъэкIэ амалышIоу зэрэщытыр, Адыгеимрэ Тыркуем щыпсэурэ тилъэпкъэгъухэмрэ яшIэныгъэхэмкIэ зэхъожьынхэр Iофтхьабзэм ипшъэрылъ шъхьаIэу зэрэщытыр пстэуми хагъэунэфыкIыгъ.
Тилъэпкъ инеущырэ мафэ нэфэу, хахъо иIэу, гъэхъэгъэ инхэр ышIыхэу, ищытхъу зиIэтызэ лъыкIотэнэу тыфаемэ, непэ тиныбжьыкIэмэ ягъэсэныгъэ-пIуныгъэ тынаIэ лъэшэу тедгъэтын фае. Егъа­шIэм тиадыгэ лъэпкъ зыгъэдахэрэр, зыгъэлъапIэрэр шэн-зекIокIэ дахэу иIэхэр ары. Джащ фэдэу зэдеIэжьыныр, гукIэгъуныгъэр, шъхьэкIэфэныгъэр, цIыфы­гъэр, зэфэныгъэр, шьыпкъэныгъэр ти­шэ­­ных, а пстэуми «Щыгъыжъыер» язехьакIу.
НэкIубгъор зыгъэхьазырыгъэр
Лъэпшъыкъо Фатим.