2018-рэ илъэсым къыщегъэжьагъэу Урысые проектэу «Билет в будущее» зыфиIорэр щыIэныгъэм щыпхыращы. Илъэситфым къыкIоцI кIэлэеджэкIо мин 11,5-мэ яшIэныгъэхэм ахагъэхъуагъ.

ГъэрекIо кIэлэцIыкIу мини 3,9-рэ ащ кIэу къыхэ­хьагъ. ХэушъхьафыкIыгъэ диагностикэр нэбгырэ мини 9-м ехъумэ акIугъ. Ахэр я 6 — 11-рэ классхэм ащеджэх. ИлъэсыкIэ еджэгъум шъолъырым ит гурыт еджэпIэ 90-м ехъу джыри къыхэхьащт.
Проектым хэлажьэхэрэм гъэшIэгъоныбэ апэ илъ. АР-м гъэсэныгъэмрэ шIэныгъэмрэкIэ и Министерствэ къызэрэщаIуагъэмкIэ, проектым иIофшIэн анахьэу зыфэгъэзагъэр шъолъырым ищыкIэгъэ специалистхэр гъэхьазырыгъэнхэр ары. КIэлэеджакIохэм нэужым промышленнэ ыкIи мэкъумэщ лъэныкъохэм япхыгъэ сэнэхьатхэр къыхахых ыкIи Iоф арашIэ.
— Компание зэфэшъхьафхэм яIофшIэн зэрэзэхащэрэр кIэлэеджакIохэм ядгъэлъэгъуным фэшI зэзэгъыныгъэхэр адэтэшIых. Ащ ишIуагъэкIэ агукIэ нахь зыфэщэгъэ сэнэхьатхэр ныбжьыкIэхэм къыхахых, — къыIуагъ проектым ишъолъыр операторэу Наталья Щербинам.
«Билет в будущее» зыфиIорэм зэзэгъыныгъэ зыди­шIырэ предприятиехэм япчъагъэ зэхапшIэу хэхъуагъ. Ахэм ащыщых: «Мыекъопэ машинэшI заводыр», лимонад зыщашIырэ фабрикэу «Майкопская», «Югагропродукт», «Домбытхим», «Хлебокомбинат Тульский», «Кошехабльский маслозавод» зыфиIохэрэр, мэкъумэщ фермер хъызмэтшIапIэу «Животноводыр». Мы предприятиехэм кIэлэеджэкIо 600 фэдиз кIонэу агъэнафэ.