БлэкIыгъэ тхьамафэм АР-м и Къэралыгъо Совет – Хасэм и Тхьаматэу Владимир Нарожнэр Мыекъопэ районым ит поселкэу Удобнэм щыIагъ. Амброзием игъэкIодын епхыгъэ Iофыгъохэр ары ащ ушъхьагъу шъхьаIэ фэхъугъэр.

Анахь лъэшэу зызыушъомбгъурэ уц шIойхэм ащыщэу амброзием зэрарэу къыхьырэр гъунэнчъ. Ащ мэкъумэщ хъыз­мэтым ичIыгухэр егъэкIодых, шынэгъакIэу ахэлъыр къахещы, лэжьыгъэу къатырэм къыщегъакIэ, иIухыжьыни къины къешIы. Зэрарышхо тыкъэзыуцухьэрэ дунаим къызэрэфихьырэм имызакъоу цIыфым ипсауныгъэ лъэшэу иягъэ регъэкIы. Ар къэгъагъы зыхъукIэ сэпэшхоу къыпытэкъу­рэм аллергиер къыздехьы.
ГухэкIми, мы уцым игъэкIодын къы­зэрыкIоу щытэп. ЦIыфхэр зэдеIэжьзэ игъом ащ пэшIуекIорэ IофшIэнхэр зэшIуа­хынхэ фае, нэмыкIэу узэребэнын шIыкIэ щыIэп. А зэпстэур къыдэлъытагъэу, АР-м и Парламент идепутатхэм амброзием игъэкIодын нахь чанэу ыуж итынхэр шIокI зимыIэ Iофэу зэрэщытыр къызщиIорэ джэпсалъэу къэралыгъо хэбзэ къулыкъу пстэумэ, цIыфэу респуб­ликэм исхэм афэгъэзагъэр 2019-рэ илъэсым аштагъ. Ащ къыщыублагъэу илъэс къэс цIыфхэм япсауныгъэ икъэ­ухъумэн, тыкъэзыуцухьэрэ дунаим ыкIи чIыгу­лэжьыным уц шIой­хэм яягъэ арамы­гъэкIыным лъып­лъэ­гъэ­ным афэгъэзэгъэ IофшIэкIо купыр ягъу­сэу Парламентым ипащэхэмрэ идепутатхэмрэ псэупIэхэр къакIухьэх, джэ­псалъэр гъэцэкIагъэ зэрэхъурэм зыщагъэгъуазэ.
Владимир Нарожнэр зыдэкIогъэ псэупIэр уц шIоим лъэшэу зэлъикIугъэхэм ащыщ. Ащ дэсхэр амброзием игъэкIодынкIэ ыкIи псэупIэр санитар шапхъэхэм адиштэу гъэкъэбзэгъэнымкIэ IэпыIэгъу афэхъунхэу къыкIэлъэIугъэх. Парламентым итхьаматэ ахэм адыриIэгъэ зэIукIэгъум хэлэжьагъэх район администрацием ипащэу Михаил Марьиныр, народнэ депутатхэм я Совет итхьаматэу Алексей Кшняковыр, лъыплъэкIо къулыкъухэм ялIыкIохэр, нэмыкIхэр.

Поселкэм изытет уигъэгумэкIынэу щыт, тыдэкIи раутыгъэм фэдэу амброзиер къыщэкIы. Фэтэрыбэу зэхэт унэхэм ящагухэми, унэе псэупIэхэм яекIо­лIапIэхэми, общественнэ чIыпIэхэми, гъогу гъунэми уц шIоир ащыолъэгъу. Ахэр елбэтэу упкIэгъэнхэ фаеу зэрэщытыр зэIукIэгъум къыщыхагъэщыгъ. ЦIыфхэм япсауныгъэрэ экологием изытетрэ ащ бэкIэ зэрепхыгъэр нафэ.
Шъолъыр Парламентым ипащэ амброзием пэшIуекIорэ IофшIэнхэр Iэпэдэлэл зэрашIыгъэхэр къыхигъэщыгъ.
— Уц шIоим игъэкIодын ащ фэдэ екIолIакIэ фызиIэм хэбзэгъэуцугъэр еукъо, — къыIуагъ Владимир Нарожнэм. — Хэукъоныгъэхэр охътэ кIэкIым дэгъэ­зыжьыгъэнхэ фае. Къулыкъоу мыщ зиIоф хэлъ пстэур, агу къагъэкIыжьын имыщыкIагъэу, зэдеIэжьхэзэ амброзием зэдебэнынхэр шIокI зимыIэ Iофэу щыт. Ары пакIошъ, ар япшъэрылъ шъхьаIэхэм ащыщ. Мы Iофыгъор мызэу, мытIоу къэтIэтыгъ. Амброзием пэшIуекIорэ IофшIэнхэр Iэпэдэлэл зышIыхэрэм хэбзэгъэуцугъэм тетэу, пхъашэу пшъэдэкIыжь ахьын фаеу сэлъытэ.
ПсэупIэм уц шIоир зэрэщаупкIагъэм анаIэ зэрэтетыщтым Парламентым и Тхьаматэ къыкIигъэтхъыгъ.
Сурэтхэр: АР-м и Къэралыгъо Совет – Хасэр.