Ары зыфэгъэхьыгъагъэр АР-м и Къэралыгъо Совет – Хасэм и Тхьаматэу Владимир Нарожнэмрэ ащ игуадзэу Цэй Эдуардрэ зэхэсыгъоу зэхащэгъагъэр. Ащ хэлэжьагъэх АР-м мэкъу-мэщымкIэ иминистрэу Къуанэ Анзаур, «Россельхозцентрэм» икъутамэу АР-м щыIэм ипащэу Анна Минаковар, нэмыкI къулыкъоу Iофым фэгъэзагъэхэм ялIыкIохэр.

Лэжьыгъэу Iуахыжьырэм иушэтын, ар ыкIи ащ хашIыкIырэ гъомылапхъэхэр шапхъэхэм зэрадиштэхэрэм лъыплъэгъэ­ныр ары анахьэу зигугъу ашIыгъэр. Та­моженнэ союзым ирегламентэу «Лэжьыгъэм ищынэгъончъагъэ фэгъэхьыгъэм» ишапхъэхэм къызэрадэлъытагъэм тетэу коц къаумэу тыдэ ащэрэми тхылъэу ищыкIагъэхэр апылъых. Ахэм лэжьыгъэр шапхъэхэм зэрадиштэрэр къаушыхьатын фае. Лабораториеу ушэтынхэр зыщашIыщтхэр лэжьыгъэр бэдзэршIыпIэм изыщэрэм ежь къыхихын фит.

Арэу щытми, Евразийскэ экономическэ комиссием и Совет регламентым зэхъокIыныгъэхэр къыхилъхьанхэу рихъу­хьагъ. Коцыр шапхъэхэм зэрадиштэрэр къэзыушыхьатырэ схемэм игъэпсынкIи, лабораторием икъыхэхынкIи чIыгулэжьхэм шъхьафитныгъэу яIэм къыщыгъэкIэгъэным ахэр фытегъэпсыхьагъэх. Проектэу агъэхьазырыгъэм лабораторие лъэпкъитIу щагъэнэфагъэр. Зыр ежь лэжьыгъэр зием иушэтыпIэ лабораторий, адрэр аккредитацие зиIэ лабораториеу ЗыкI реестрэм хагъэхьагъэр ары.
Ежь иунаеу лабораторие зиIэ чIыгулэжьхэм ахэтэп пIоми хъущт. Арышъ, ятIонэрэу зыцIэ къыраIорэ лабораторием зэкIэми ращэлIэщт. «Россельхозцентрэм» илIыкIохэм къызэраIорэмкIэ, ащ ыпкъ къикIэу аккредитацие зиIэу ЗыкI реестрэм хагъэхьагъэхэм атегъэуагъэр нахьыбэ хъущт, ушэтынхэм яшIын уахътэу пэIу­хьэрэм хэхъощт. А зэпстэур лэжьыгъэм ыуасэ дэкIоеным фэIорышIэщт.
Зэхэсыгъом хэлажьэхэрэм яеплъыкIэхэр къыраIотыкIыгъэх. Къэралыгъо ыкIи уполномоченнэ лабораториехэр Таможеннэ союзым ирегламентэу «Лэ­жьыгъэр щынэгъончъэным фэгъэхьыгъэм» хэгъэхьэгъэнхэр хэкIыпIэ тэрэзэу зэда­штагъ. Сыда пIомэ ащ фэдэ лабораториеу зиIофшIэн хэшIыкI ин фызиIэ специалистхэр зычIэсхэм, ищыкIэгъэ оборудованиери зыIэкIэлъым ушэтынхэр зэрэщытын фаем тетэу зэхищэщтых, шапхъэхэр ыукъощтхэп.
Шъугу къэдгъэкIыжьын, Адыгеим ичIыгулэжьхэм коцэу, хьэу тонн 496190-рэ, рапсэу 8984-рэ мыгъэ къаугъоижьыгъ.
НэкIубгъор зыгъэхьазырыгъэр ХЪУТ Нэфсэт.
Сурэтхэр: Iэшъынэ Аслъан.