Паркым дэт хъэренэхэр гухэлъ бзаджэ фыряIэу зэхэзыкъутагъэхэмрэ паркым илъэс гъогу мотоциклистэу щызечъэщтыгъэмрэ Адыгеим щалъэгъух. Адыгеим и ЛIышъхьэ ащ фэгъэхьыгъэу социальнэ хъытыухэм къащиIотагъ, респуб­ликэм исхэмрэ ихьакIэхэмрэ обще­ственнэ чIыпIэхэм афэсакъынхэу къя­джагъ.
— Тиреспубликэ икъэлэ шъхьаIэ итеплъэ хэпшIыкIэу нахьышIум ылъэныкъокIэ зызэблехъу. Ау, гухэкI нахь мышIэми, зэхъокIыныгъэшIухэм уасэ афэзымышIыхэрэр щыIэх. Мы аужырэ уахътэм ашIэзэ мыхъо-мышIагъэхэр бэрэ зэрахьэхэ хъугъэ: хъэренэхэр паркхэмрэ скверхэмрэ ащакъутэх, чъыгхэр, къэгъа­гъэхэр, куандэхэр агъэфыкъох, — къы­Iуагъ КъумпIыл Мурат.
Адыгэ Республикэм и ЛIышъхьэ агу къыгъэкIыжьыгъ псыхъо Iушъом Iут кIэ­лэцIыкIу хъэренэхэр бэмышIэу зэракъу­тагъэхэр. Ащ фэдэ зекIуакIэр къэлэдэс­хэм къызэрэрамыгъэкIугъэмкIэ адырегъаштэ. ХэбзэухъумэкIо къулыкъухэр джыдэдэм мы Iофым изэхэфын пылъых. А парк дэдэм, псыIушъом дэжь лъэсрыкIо гъогумрэ хъэренэ зыдэщыт чIыпIэмрэ яIэгъо-благъу мотоциклист горэ зэрэщызечъэщтыгъэм гу лъатагъ. Ащ фэдэ хэбзэнчъэ зекIуакIэхэмкIэ зызыгъэпсэфырэ цIыфхэр щынэгъуапIэ рагъэуцох. Хэукъоныгъэ зышIыгъэхэр камерэхэм къагъэлъэгъуагъэх, ОМВД-мрэ ГИБДД-мрэ яIофышIэхэм къэбархэр аIэкIагъэ­хьагъэх.
— Мыекъуапэ дэсхэми, ихьакIэхэми акъылыгъэ къызхагъэфэнэу, зекIокIэ пхэнджхэм задырамыгъэхьыхынэу, дэхагъэм пае агъэпсырэ пстэуми афэсакъынхэу сыкъяджэ, — къыщиIуагъ АР-м и ЛIышъхьэ ителеграм-канал.