ШышъхьэIум и 28 — 31-м адыгэ культурэм ифестиваль Адыгеим щыкIощт. Адыгэ Республикэм культурэмкIэ и Министерствэрэ лъэпкъ культурэм и Гупчэрэ ащ кIэщакIо фэхъугъэх.

Лъэпкъым икультурэ зэгъэшIэгъэным, къэIэтыгъэным, бзэм изэгъэшIэн ыкIи изэтегъэуцожьын дэлэжьэгъэным, лIэужыкIэр шэн-хабзэхэм афэгъэсэгъэным, адыгагъэ ахэлъэу ныбжьыкIэхэр пIугъэнхэм, лъэпкъ орэдыжъхэр къэзыIохэрэр, къэшъуакIохэр ыкIи лъэпкъ IэпэIасэхэр къыхэгъэщыгъэнхэм фестивалыр фэлэжьэщт.
КъыткIэхъухьэрэ лIэужхэм адыгэхэм ятарихъ, якультурэ, яIэшIагъэхэр ягъэшIэгъэныр непэрэ мафэм ианахь Iофыгъоу зэрэщытыр зэхэщакIохэм къыхагъэщы.
Адыгеим, Къэрэщэе-Черкесым, Къэ­бэртэе-Бэлъкъарым, Темыр Осетием – Аланием, Краснодарскэ краим ятворческэ купхэр фестивалым хэлэжьэщтых.
ШышъхьэIум и 29-м фестивалым къыдыхэлъытэгъэ мэфэкI концертхэр Адыгеим ирайонхэм ащыкIощтых.
ШышъхьэIум и 30-м адыгэ лъэпкъ Iэпэщысэхэм якъэухъумэн ыкIи яхэгъэ­хъон фэгъэхьыгъэ къэгъэлъэгъоныр ыкIи гала-концертыр Пушкиным и Унэу Мые­къуапэ дэтым щыкIощтых. ХьакIэу къе­кIолIагъэхэр адыгэ шхыныгъохэм ахагъэIэщтых. Къэгъэлъэгъоныр пчыхьэм сыхьатыр 5-м ыныкъом, гала-концертыр сыхьатыр 6-м аублэщтых.
Адыгэ джэгур фестивалым кIэух дахэ фэхъущт. Адыгэ культурэмкIэ шъолъыр­хэр зэзыпхырэ фестивалым фэгъэхьыгъэ мэфэкIым зэхэщакIохэм шъурагъэ­благъэ.
Лъэпшъыкъо Фатим.