Адыгеим иархитектурнэ саугъэтхэм ягъэцэкIэ­жьын Адыгеим Iоф щыдашIэ. АгъэкIэжьырэмэ ащыщ Мыекъопэ медицинэ колледжыр.

ИлъэситIу хъугъэу лIэшIэгъум ехъу зыныбжь унэм псэолъэшI IофшIэнхэр щэкIох. ГъэцэкIэ­жьынхэр Iахь-Iахьэу зэтеуты­гъэу рекIокIых: псэуалъэм ыкIоцI­кIэ рагъэжьэгъагъ, джы унэ кIыбым игъэкIэжьын дэлажьэх. Чырбыщ гъэлагъэм ищы­пэ теплъэ къычIагъэщыжьы, ышъо къырагъэубытыжьы. ЕджапIэм ипащэу Алексей Самоквитовым къызэриIуагъэмкIэ, псэуалъэр гъэцэкIэжьынхэм афэ­ныкъо дэдагъ. Зигъо гъэтэрэзыжьын горэхэр ренэу рашIылIэщтыгъэх нахь мышIэми, ахэм япIалъэ кIэкIыгъэ, гузэжъогъур ригъэкIыщтыгъэ къодый ныIэп.
Алексей Самоквитов — медицинэ колледжым ипащ:
— Уна­шъ­хьэр, фэбэ рыкIуапIэхэр илъэ­сипшI фэдизкIэ узэ­кIэ­Iэбэжьмэ зэ­блахъугъагъэх, ау адрэ пстэум «тахэдыхьа­жьы­щтыгъ». Джэха­шъохэр ишъу­кIыгъагъэх, «зе­кIощтыгъэх». Спор­тзалыр за­шIыгъэ 1987-рэ илъэсым къы­щегъэ­жьа­гъэу игъэ­кIо­тыгъэ гъэцэ­кIэ­жьын ылъэ­гъу­гъэп. Ар зэрэщытэу, ыкIоцIи итыщтыри, зэ­блахъугъ. ­ЫкIоцIкIэ Iоф­шIэн тIэкIу джы­ри къытфэнагъ. ЩагумкIэ чIыунэм узэ­рэчIахьэрэм дэлажьэх. Анахь шъхьаIэу джырэкIэ зыуж титыр унэ кIыбыр ары.
Медицинэ колледжыр зычIэт унэр Адыгеим иархитектурнэ саугъэт. Илъэси 114-рэ ыныбжь, шъолъырым икъэлэ шъхьаIэ ыгупчэ ит. Ащ игъэцэкIэжьын Мыекъуапэ итарихъ теплъэ изэ­тегъэуцожьынкIэ IофшIэнхэм язы Iахь мэхъу. АР-м и ЛIы­шъхьэу КъумпIыл Мурат иунашъокIэ архитектурнэ саугъэтым изэтегъэуцожьын дэлажьэх, мылъкоу пэIухьэрэр республикэ бюджетым къытIупщыгъ.

— ЕджапIэм иматериальнэ-техническэ зытет нахьышIу шIыгъэным фэшI ЛIышъхьэм иунашъокIэ 2022-рэ илъэсым сомэ миллион 50,6-рэ къытфитIупщыгъ. Ар апэIухьанэу щыт гъэцэкIэжьын IофшIэнхэми, ти­щыкIагъэхэм ящэфыни. Арыти, ахъщэм иIахьышIу гъэкIэ­жьыным пэIудгъэхьагъ. ЧIыунэм шъхьа­фэу джыри сомэ миллион 18 фэдиз тефагъ, — къытфиIотагъ Алексей Самоквитовым.
ГъэцэкIэжьын IофшIэнхэр мэ­кIохэфэ Мыекъуапэ иапэрэ почтэ зычIэтыгъэ унэм ныбжьыкIэхэм егъэджэн сыхьатхэр щахьыгъэх. Ари джы колледжым ий, унитIуми медицинэ Iофы­шIэхэр ащагъэхьазырыщтых. Сыда пIомэ рагъаджэхэрэм япчъагъэ аужырэ илъэсхэм фэдитIу хэхъуагъ. Бюджет мылъкукIэ еджэнхэу мыгъэ нэбгырэ 264-рэ, еджапкIэр зытыщт нэбгыри 110-рэ аштагъ.
Анцокъо Ирин.
Сурэтхэр авторым иех.