Программэу «Урысыем инеущырэ маф» зыфиIорэм къыдыхэлъытагъэу теннис цIыкIумкIэ Адыгэ Республикэм изэIухыгъэ зэнэкъокъу Мыекъуапэ щыкIуагъ. Къэралыгъом ишъолъыр 13-мэ къарыкIыгъэ спортсменхэр ащ хэлэжьагъэх.

Апэрэу республикэм икъэлэ шъхьаIэ къэкIуагъэх Белгородскэ, Брянскэ ыкIи Курскэ хэкухэм якомандэхэр. Ахэм зэнэкъокъум зызэрэщаушэтыгъэм дакIоу егъэ­джэн-зыгъэсэн Iофтхьабзэхэми ахэлэжьагъэх.
Зэнэкъокъугъэхэр купищэу гощыгъагъэх: зыныбжь илъэс ­12-м, 14-м ыкIи 18-м ашIомыкIыгъэ­хэр. Адыгеир къэзыгъэлъэгъуагъэ­хэр къалэу Мыекъуапэ, Кощ­хьэблэ, Красногвардейскэ, Тэхъу­тэмыкъое ыкIи Теуцожь районхэм арыт спорт еджапIэхэм ялIыкIохэр ары. Пшъашъэхэми кIалэхэми хагъэунэфыкIырэ чIыпIэ къыдахыгъэп, ау яIэпэIэсэныгъэ хагъэ­хъуагъ.

Адыгэ къэралыгъо университетым иордэунэу Кобл Якъубэ ыцIэ зыхьырэм щыкIогъэ зэнэкъо­къум спортсмен 316-рэ хэлэ­жьагъ. Аныбжь елъытыгъэу текIоныгъэр къыдахыгъ: Даниил Казарцевым (Шытхьал), Мария Лавриненкэм (Таганрог), Данил Рязановым (Старый Оскол), Вероника Сидоровам (Ставрополь), Сергей Коршунковым (Брянск) ыкIи Дарья Кузнецовам (Лабинск).
ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм Урысыем, Адыгеим теннис цIыкIумкIэ яфедерациехэм, Мые­къуапэ физическэ культурэмкIэ ыкIи спортымкIэ и Комитет къагъэхьазырыгъэ шIухьафтын лъапIэхэр афагъэшъошагъэх.
Программэу «Урысыем инеущырэ маф» зыфиIорэм къыды­хэлъытэгъэ Iофтхьабзэр мыгъэ ятIонэрэу Адыгеим щызэхащагъ. Илъэсыр имыкIызэ джыри зэнэкъо­къуитIу щырагъэкIокIыщт, анахь благъэр — чъэпыогъум.