Адыгеим и ЛIышъхьэу КъумпIыл Мурат республикэм и Правительствэ зычIэт унэм щыригъэблэгъагъэх Адыгеим и Президентыгъэу, дышъэ къычIэхыным зиIахьышхо хэзышIыхьэгъэ ыкIи гупыкIышхо зиIэ Шъэумэн Хьазрэт имылъкукIэ ыгъэпсыгъэ КIэлэцIыкIу унэ-лицеим чIэсхэр.

ГъэрекIо гъэмафэм Адыгеим икIыгъэ­гъэ лIыкIо купэу Красноярскэ кIогъа­гъэм иджэуап хъугъэ ахэр джы къызэрэкIуа­гъэхэр. КIэлэцIыкIухэр, адыгэ къашъом­кIэ ансамблэу «Мыекъуапэ инэфылъэ­хэр», творческэ куп зэфэ­шъхьафхэр, артистхэр ыкIи общественнэ IофышIэшхохэр кIогъагъэхэм ахэтыгъэх. КIэлэцIыкIу ибэхэр ыкIи ны-тыхэм анаIэ зытемытыжьхэр зыщаIыгъхэ учреждениер Красноярскэ краим икъэлэ шъхьаIэ 2023-рэ илъэсым щашIыгъагъ. ГупыкIышхо зиIэ цIыфым ишIушIэ фонд икъэкI­уа­пIэхэмкIэ ар агъэпсыгъагъ ыкIи ащ ыцIэ ехьы.
ЗэIукIэгъум щыIагъэх Урысыем Iоф­шIэнымкIэ и ЛIыхъужъэу, тхакIоу ыкIи общественнэ IофышIэшхоу МэщбэшIэ Исхьакъ, АР-м культурэмкIэ иминистрэу Аулъэ Юрэ, Хь. Шъэумэным ыцIэкIэ щыт ШIушIэ фондым итхьаматэу Шъэумэн Асиет, Хь. М. Шъэумэным ыцIэкIэ щыт КIэлэцIыкIу унэм ипащэу Анастасия Сизых, АР-м и Театральнэ зэхахьэ ихудожественнэ пащэу Ацумыжъ Рустам, джащ фэдэу КIэлэцIыкIу унэм чIэс нэбгырэ 35-рэ.
Адыгеим фэгъэхьыгъэ фильм кIэлэцIыкIухэм къафагъэлъэгъуагъ. Республикэм итарихъ, икультурэ, иджырэ гъэхъагъэ­хэм афэгъэхьыгъэу ащ къеIуатэ. ­Адыгеим и ЛIышъхьэ кIэлэцIыкIухэм гущыIэгъу зафэхъум Шъэумэн Хьазрэт цIыфыгъэшхоу хэлъым ыкIи IофшIэнымкIэ гъэхъа­гъэу иIэхэм къащыуцугъ, ренэу цIыфмэ IэпыIэгъу аритыным зэрэпылъыр къыхигъэщыгъ.
«Шъэумэн Хьазрэт къызщыхъугъэ лъэныкъом имызакъоу, зэрэхэгъэгоу гъэпсын IофшIэным емызэщырэ цIыфэу зэрэщытымкIэ зэлъашIагъ. ИзекIуакIэхэми ар икъоу къаушыхьаты. IофтхьэбзэшIоу зэрихьэхэрэмкIэ шъолъырхэр ащ зэрипхыгъэх, цIыфхэм яшIоигъоныгъэ зэфэшъхьафхэр афегъэцакIэх, адеIэ. Непэ лъэшэу тигуапэ шъо, кIэлэцIыкIу­хэр, Адыгеим шъукъызэрэкIуагъэр. Тиреспубликэ шъугу зэрэрихьыщтым ыкIи шIукIэ ар шъугу къызэринэщтым сицыхьэ телъ. Зэпхыныгъэу ащ дышъуиIэ хъу­гъэр шъумыгъэкIод», — къыIуагъ КъумпIыл Мурат.
Купым ипащэрэ ежь кIэлэцIыкIухэмрэ къаIотагъ хы ШIуцIэ Iушъом зызща­гъэпсэф ужым Адыгеим къызэрэкIуагъэ­хэм фэгъэхьыгъэу. Ахэр къуаджэу Афыпсыпэ кIогъагъэх, Хьазрэт Мэджыдэ ыкъом ихьакIагъэх, анахь мэхьанэ зэратырэ чIыпIэ гъэшIэгъонхэм нэIуасэ зафашIыгъ. Мыекъуапэ къызэкIохэм ахэр къыращэкIыгъэх, АР-м и Лъэпкъ музейрэ сэнаущыгъэ зыхэлъ кIэлэцIыкIухэм IэпыIэгъу ятыгъэным фэгъэзэгъэ Гупчэмрэ ащыIэщтых, республикэм икъушъхьэлъэ чIыпIэхэр зэрагъэлъэ­гъущтых.
Мы зэIукIэгъум хэлэжьэрэ МэщбэшIэ Исхьакъ иусэу «Лъэмыджхэр» зыфиIорэм кIэлэцIыкIухэм къафеджагъ, цIыфхэм зэгурыIоныгъэрэ зэкъошныгъэрэ азыфагу илъынхэм мэхьанэшхо зэриIэр къыхигъэщыгъ. Шъэумэн Хьазрэт къытегущыIэ зэхъум анахьэу тхакIом зигугъу къышIыгъэ нэшанэхэм ащыщых ащ игукIэгъу, цIыфхэм ялыуз, яфэныкъуагъэхэр зэхишIыкIынхэ ыкIи къошныгъэ адыриIэн зэрилъэкIырэр.
«Шъэумэн Хьазрэт фэдэ цIыфхэу непэ мэкIэ дэд узIукIэн плъэкIыщтыр. Шъо ащ джырэ уахътэм диштэрэ щыIэкIэ амал къышъуитыгъ. Ар къызфэжъугъэфед, уасэ фэшъушI. Лъытэныгъэ фэ­шъушI ыкIи шIу шъулъэгъу, дэгъоу шъуедж, къышъуфэгумэкIырэ, къыжъудэлэжьэрэ цIыфхэр къэшъумыгъэукIытэжьых», — къыIуагъ МэщбэшIэ Исхьакъ.
ШIушIэ фондым ипащэу Шъэумэн Асиетрэ КIэлэцIыкIу унэ-лицеим ипащэу Анастасия Сизыхрэ республикэм фэбагъэ хэлъэу зэрэщырагъэблэгъагъэхэм пае зэрафэразэхэр къаIуагъ ыкIи кIэлэцIыкIухэм ямызакъоу шъолъыритIумкIи – Адыгеимрэ Красноярскэ краимрэ — мыщ фэдэ Iофтхьабзэхэм мэхьанэшхо зэряIэр къыхагъэщыгъ. Шъэумэн Хьазрэт ыцIэкIэ щыт КIэлэцIыкIу унэм нэбгыри 112-рэ щэпсэу. Ахэм хэхъоныгъэ ашIынымкIэ, япсауныгъэ агъэпытэнымкIэ, цIыфыгъэ шэпхъэ дахэхэм арыгъозэнхэмкIэ амалэу щыIэр зэкIэ арагъэгъоты. Мы унэм ныбжь зэфэшъхьаф зиIэ купи 8 щапIу. Гъэмэфэ зыгъэпсэфыгъом Краснодар краим игъэпсэфыпIэхэм ахэр ащэIэх ыкIи къащяIазэх. Дэгъоу еджэхэрэм ыкIи зипшъэрылъхэр зыгъэ­цакIэхэрэм кIэгъэгушIун Iофтхьабзэхэр апагъохых, Кремлым щыIэ Елкэм ащэхэу къыхэкIы, джащ фэдэу IэкIыб къэралыгъо зэфэшъхьафхэри арагъэлъэгъух.
АР-м и ЛIышъхьэ ипресс-­къулыкъу къытыгъэ къэбархэмкIэ ­
Тхьаркъохъо Сафыет.