Республикэм и ЛIышъхьэ зыIокIэхэ нэуж кIэлэцIыкIухэр АР-м и Лъэпкъ музей еблэгъагъэх. Апэрэхэм ащыщэу арагъэлъэгъугъэр Шъэумэн Хьазрэт фэгъэхьыгъэ къэгъэлъэгъонэу «Шъэумэн Хьазрэт. ЧIыгум ­игъогухэмкIэ» зыфиIорэр ары.

Ар Лъэпкъ музеим мы гъатхэ къыщызэIуахыгъ. ШIушIакIор къызыхъугъэ мафэм ипэгъокIэу агъэпсыгъ. ИцIыкIугъом щегъэжьагъэу непэрэ мафэхэм къанэсыжьэу къыкIугъэ гъогур ащ къыщыгъэлъэгъуагъ. Сабыйхэм ягущыIэхэмкIэ яунэ къифэжьыгъэхэу къащыхъугъ. Шъэумэн Хьазрэт фэгъэхьыгъэ музееу яунэ-лицей хэтым ар фагъэдагъ.
— Шъэумэн Хьазрэт сэ сызэреджэрэр «пап». Сятэу сэлъытэ. Мыщ фэдэ музееу тиIэм сыкIонэу сыгу рехьы. Шъошъуиери лъэшэу дахэ, гъэшIэгъоны. Тэтыем фэд, мыр тIэкIу нахь иныIо нахь, — къыддэгощагъ изэхашIэхэмкIэ илъэс 11 зыныбжь Николай Улахович.
Фэшъхьаф къэгъэлъэгъонхэу АР-м и Лъэпкъ музей къыщызэIуахыгъэхэри кIэлэцIыкIухэм арагъэлъэгъугъэх. Адыгэ лъэпкъым, итарихъ, икультурэ ахэм ашIогъэшIэгъоныгъ.
Никита Лихачев — Шъэумэн Хьазрэт ыцIэ зыхьырэ унэ-лицееу Красноярск дэтым чIэсыгъ:
— Музей гъэшIэгъон дэд. Мыщ чIэтхэр апэрэу сэлъэгъух. Ахэм тарихъэу апылъыр, аныбжьыр – зэкIэ сэгъэшIагъо. Лъэшэу сыгу рихьыгъэр адыгэ хъулъфыгъэм ишъуаш, ар дэхэ дэд.
Никитэ ишъэогъоу Назар Улахович адыгэ быракъыр ыгу рихьыгъ. Ащ тешIыхьэгъэ жъуагъохэмрэ щэбзащэхэмрэ якъэбар зэригъэшIагъэу ыкIыб илъэу къырехьакIы. ЫгъэшIагъорэр республикэм зэрэщыфэбэ дэдэр ары.

— Адыгеир дахэ. Афыпсыпэ тыгу рихьыгъ. Джы Мыекъуапэ тыкъэкIуа­гъэшъ, ари тшIодах. Шъыпкъэр пIощтмэ, сэ Адыгеир нахь иныIу сшIошIыгъ, ау, къызэрэчIэкIыгъэмкIэ, республикэм исыр тэ тикъэлэ закъо щыпсэурэм нахьи нахь макI,— къыIуагъ ащ.
Музеим фэшъхьафэу республикэм икъэлэ шъхьаIэ илъэгъупхъэ чIыпIэхэр хьакIэ цIыкIухэм арагъэлъэгъугъэх: Шъхьэ­гощэ нэпкъ ращэлIагъэх, къалэм итарихъ Iахь нэIуасэ фашIыгъэх. Джы непэ ахэр къушъхьэлъэ Адыгеим рагъэ­блэгъэщтых. Адыгэ Республикэм щагъэ­кIогъэ мафэхэр гукъэкIыжь дахэхэу Красноярскэ зыдащэжьыщтых.
Анцокъо Ирин.
Сурэтхэр: Iэшъынэ Аслъан.