ХэушъхьафыкIыгъэ дзэ операцием иветеранхэм азыфагу зэхащэрэ шъолъыр зэхэубытэгъэ физкультурнэ Iофтхьабзэу «Хэгъэгум иухъумакIохэм я Кубок» зыфиIоу Ставрополь щыкIуагъэм икIэуххэр зэфахьысыжьыгъэх. ТекIоныгъэ къыдэзыхыгъэхэр къыхагъэщыгъэх. Iофтхьабзэм лъэпкъ ансамблэхэр ыкIи артистхэр хэлэжьагъэх.

Зэнэкъокъум Къыблэ ыкIи Темыр-Кавказ федеральнэ шъолъырхэм, джащ фэдэу Донецкэ ыкIи Луганскэ народнэ респуб­ликэхэм къарыкIыгъэ хэушъхьафыкIыгъэ дзэ операцием иветерани 130-м ехъу хэлэжьагъ.
Урысыем и Паралимпийскэ комитет ипрезидентэу Павел Рыжковым къыIуагъ:
«Паралимпийцэхэр зыхэлэжьэрэ зэнэкъокъухэмкIэ мыр анахь мэхьанэ зиIэхэм ащыщ хъугъэ. Мафэхэр дахэу рекIокIыгъэх, спортсменхэм акIуачIэ рахьылIэзэ зэнэкъокъугъэх. ЗэкIэми сышъуфэгушIо, анахьэу чемпион хъугъэ­хэм ыкIи хагъэунэфыкIырэ чIыпIэхэр къыдэзыхыгъэхэм. ШэкIогъум «Хэгъэгум иухъумакIохэм я Кубок» зыфиIорэм икIэух зэфэхьысыжьэу Сириусым щыкIощ­тым джыри тызэфищэщт».

Урысыем и ЛIыхъужъэу, фондэу «Хэгъэгум иухъумакIохэм» и ЛъыплъэкIо совет хэтэу Алексей Романовым къы­Iуагъ:
«Iофтхьабзэр апэрэу мыщ фэдэ чIыпIэм, жьы къабзэм щызэхэтщагъ. Кубокым икъыдэхын хэлажьэхэрэм ыкIи ахэм яIахьылхэм ямызакъоу къалэм щыпсэухэрэри зэнэкъокъум лъыплъэнхэ амал яIагъ. ЦIыфыбэ къекIолIагъ, гъэшIэгъонэу Iофтхьабзэр рекIокIыгъ».
ХэушъхьафыкIыгъэ дзэ операцием хэлэжьагъэу, медалэу «За отвагу» зыфиIорэр къызфагъэшъошагъэу, тIогъогогъо Москва ичемпионэу ыкIи пауэрлифтингымкIэ Урысыем ичемпионэу Ринат Васильевым къыIуагъ:
«Кубокым икъыдэхын фэгъэхьыгъэ Iофтхьабзитфымэ сахэлэжагъ. Ахэр лъэгэпIэ инхэм атетэу зэхащагъэх ыкIи мыщ фэдэ зэнэкъокъухэм спортсменхэр нахьыбэу къякIуалIэхэ хъугъэ. Зэо зэфэшъхьафхэм яветеранхэм унаIэ атебгъэтыным фытегъэпсыхьэгъэ IофшIэнышхоу мыр щыт».
ХэушъхьафыкIыгъэ дзэ операцием иветеранэу, «Хэгъэгум иухъумакIохэм я Кубок» хэтэу Николай Гончаренкэм къыIотагъ:
«Волейбол тешIагъ, а уахътэм синыбджэгъухэм саIукIагъ, гуфэбэныгъэ хэлъэу гущыIэгъу тызэфэхъугъ. Сыгу ихъыкIыгъэр гущыIэхэмкIэ къыпфэIощтэп. IаплI зэтщэкIыгъ, тызэдэгущыIагъ, зэнэкъо­къухэм гъэхъэгъэшIу ащытшIынэу тызэфэлъэIожьыгъ. Мыщ фэдэ Iофтхьабзэ зэхэзыщэгъэ Фондэу «Хэгъэгум иухъумакIохэр» зыфиIорэм инэу тыфэраз».
Кубокым икъыдэхын фэгъэхьыгъэ программэм спорт лъэныкъуих хэхьагъ: пауэрлифтингыр, щэрыоныр, теннис цIыкIур, армрестлингыр ыкIи волейболыр.
ШэкIогъум и 14 – 17-м шъолъыр зэхэубытэгъэ физкультурнэ Iофтхьабзэу «Хэгъэгум иухъумакIохэм я Кубок» зыфиIорэм ифинал едзыгъо Сириусым щыкIощт. Къэралыгъом ишъолъырхэм текIоныгъэ къащыдэзыхыгъэхэр ащ щызэIукIэщтых.
Адыгеир ветераниплIымэ къагъэлъэгъуагъ. Ятфэнэрэ чIыпIэр къыдихыгъ Александр Гурьяновым, яхэнэрэ хъугъэ Эдурд Бараевыр.
Зэнэкъокъухэм якъызэIухын фэгъэ­хьыгъэ Iофтхьабзэм хэлэжьагъ Урысыем зыкъэухъумэжьынымкIэ иминистрэ игуадзэу, къэралыгъо фондэу «Урысыем и УхъумакIохэр» зыфиIорэм итхьаматэу Анна Цивилевар. Мыщ фэдэ спорт Iоф­тхьабзэхэм мэхьанэшхо зэряIэр ащ хигъэунэфыкIыгъ.

Хэутыным фэзыгъэхьазырыгъэр КIАРЭ Фатим.
Сурэтхэр: фондэу «Хэгъэгум иухъумакIохэр»