Урысые политическэ партиеу «Единэ Россием» ишъолъыр ­къутамэу Адыгеим щыIэр ыкIи Адыгеим ибзылъфыгъэхэм я Со­юз кIэщакIо фэхъухи, Мыекъуапэ ишъхьэкIэупхъухьэ волонтер нэбгырэ 37-мэ партием и Штаб зэIукIэгъу фабэ ащадыряIагъ.

ХэушъхьафыкIыгъэ дзэ операциер къызежьагъэм къыщыублагъэу Мые­къуапэ исалонхэм Iоф ащызышIэрэ шъхьэкIэупхъухьэхэм ащыщхэр волонтер купэу зэкъоуцуагъэхэу, тидзэкIолIхэу госпиталым чIэлъхэм ыпкIэ хэмылъэу ашъхьацхэр афыкIаупхъухьэх.
«Единэ Россием» ишъолъыр къутамэ, джащ фэдэу бзылъфыгъэхэм я Союз ялIыкIохэм мы купым хэтхэм заIуагъэ­кIагъ, шIушIэ Iофтхьабзэу зэрахьэрэм пае рэзэныгъэ гущыIэхэр апагъохыгъэх, «тхьашъуегъэпсэу» араIуагъ.
— Шъощ фэдэхэр ары тикъэралыгъо зыщыгугъырэр. Шъугу зэIухыгъэу волонтерхэм агъэцэкIэрэ IофшIэнышхо зе­шъохьэ, госпиталым къычIэфэгъэ тидзэ­кIолIхэм яфэIо-фашIэхэр афэшъогъэцакIэх. ШIушIэ Iофтхьабзэу зешъухьэрэм тидзэкIолIхэм гу кIуачIэ ыкIи гугъэ къа­реты текIоныгъэ къыдахыгъэу къызэрагъэзэжьыщтымкIэ. Шъощ фэдэхэр зэкIэхэмкIи щысэтехыпIэу щытых, ащ пае «тхьашъуегъэпсэу» шъосэIо, — къы­Iуагъ Урысые политическэ партиеу «Единэ Россием» ишъолъыр къутамэу Адыгеим щыIэм игъэцэкIэкIо комитет ипащэу АфэшIэгъо Рэмэзан.
Волонтер купым изэхэщакIоу Елена Медведевам агухэр зэIухыгъэу къыкъоу­цогъэ иIофшIэгъухэм лъэшэу зэрафэра­зэр къариIуагъ. Мы шIушIэ Iофтхьабзэм лъапсэ фэхъугъэм зэIукIэм къекIолIагъэ­хэр щигъэгъозагъэх. Ащ къызэриIуагъэм­кIэ, инэIосэ бзылъфыгъэу госпиталым Iоф щызышIэрэр къыфытеуи, шъхьацыр зэрэкIаупхъухьэрэ Iэмэ-псымэхэр охътэ гъэнэфагъэкIэ ритынэу къыкIэлъэIугъ. Ащ ришIэщтымкIэ зеупчIым, къыриIуагъ уIагъэ зытещэгъэ дзэкIолIхэм апае зэ­рящыкIагъэхэр. Джащыгъум иIофшIэгъу­хэми къыдырагъашти, ыпкIэ хэмылъэу фэIо-фашIэхэр афагъэцэкIэнхэу рахъу­хьагъ. Нэужым нэмыкI салонхэм яIофы­шIэхэм ащыщхэри купэу зэхащагъэм къыхэхьагъэх.
— Мыщ фэдэ волонтерхэм Iофэу ашIэрэм уасэ фэпшIын фае. Ахэм якъэ­бар зызэхэтэхым, заIудгъэкIэн ыкIи ти­рэзэныгъэ гущыIэхэр ятIонэу итхъу­хьагъ. Бзылъфыгъэхэм я Союз хахьэу хэушъхьафыкIыгъэ дзэ операцием хэла­жьэхэрэм яунагъохэм IэпыIэгъу афэ­хъугъэнхэмкIэ комитет зэхэтщагъэу Iоф ешIэ. Операциер къызежьагъэм къыщыублагъэу Союзым чанэу Iоф ешIэ, шIушIэ IэпыIэгъухэр госпиталым ыкIи дзэ часть­хэм аIэкIэтэгъахьэ. Шъори шIушIэ Iоф­тхьабзэу жъугъэцакIэрэм фэшI лъэшэу тышъуфэраз, — къыIуагъ Адыгеим ибзылъфыгъэхэм я Союз итхьаматэу Вэрэкъо Хьалимэт.
Нэужым Урысые политическэ пар­тиеу «Единэ Россием» ишъолъыр къутамэу Адыгеим щыIэм ыкIи Адыгеим ибзылъфыгъэхэм я Союз ярэзэныгъэ тхылъхэр ыкIи шIухьафтын цIыкIухэр шъхьэкIэуп­хъухьэ волонтерхэм аратыжьыгъэх.
— Республикэм и ЛIышъхьэу, партиеу «Единэ Россием» ишъолъыр къута­мэ и Секретарэу КъумпIыл Мурат хэу­шъхьафыкIыгъэ дзэ операцием хэла­жьэхэрэм яIофыгъохэм, ахэм шIушIэ IэпыIэгъу ягъэгъотыгъэным лъэшэу ынаIэ тет. Ащ пшъэрылъ къызэрэтфишIыгъэм тетэу тидзэкIолIхэр зыпарэми зэращытымыгъэкIэщтхэм ыуж тит, тиамал къы­зэрихьэу тадэIэпыIэ, — къыIуагъ АфэшIэгъо Рэмэзан.
Джащ фэдэу шъолъыр къутамэм игъэ­цэкIэкIо комитет ипащэ къызэриIуагъэм­кIэ, координационнэ гупчэу зэхащагъэм мы уахътэм ехъулIэу волонтер нэбгырэ 38-рэ фэдизмэ Iоф щашIэ. БэмышIэу тонн 20-м ехъурэ шIушIэ IэпыIэгъур, джащ фэдэу псы тонн 20 Курскэ хэкум афарагъэщагъ. Джыри тонн заулэ ­аугъоигъ, мы мэфэ благъэхэм ахэри атIупщыщтых.
— Адыгеим щыщхэу хэушъхьафыкIыгъэ дзэ операцием хэлажьэхэрэр зэрэт­щымыгъупшэхэрэр, тызэракъотыр зэхашIэнэу ыкIи агу къыдэтщэенэу тыфай, — къыIуагъ АфэшIэгъо Рэмэзан.
КIАРЭ Фатим.