Мыщ фэдэ цIэ зиIэ концерт Адыгеим и Къэралыгъо филармоние къыщатыгъ.

АР-м иконцертнэ зэхахьэ и Къэралыгъо симфоническэ оркестрэрэ Камернэ музыкальнэ театрэу Хьанэхъу Адамэ ыцIэ зыхьырэмрэ зэкIыгъухэу ар агъэ­хьазырыгъ.
Камернэ музыкальнэ теат­рэу Хьанэхъу Адамэ ыцIэ зы­хьырэм ихудожественнэ пащэу, Урысыем, Адыгеим искусствэ­хэмкIэ язаслуженнэ IофышIэ­шхоу Юныс Сулеймановымрэ АР-м исимфоническэ оркестрэ ихудожественнэ пащэу ыкIи идирижер шъхьаIэу СтIашъу Къэплъанрэ къэгъэлъэгъоным щызэдэлэжьагъэх.
Опереттэ пычыгъохэр, мюзикл мэкъамэхэр, поп ыкIи рок къэIуакIэхэр зыщызэхэугъоегъэ къэгъэлъэгъоным искусствэр зикIасэхэр зэфищагъэх.
Концертым икъэтын хэлэ­жьагъэх Камернэ музыкальнэ театрэм иIофышIэхэу АР-м и народнэ артистэу Ирина Кириченкэр, АР-м изаслуженнэ артистэу Елена Лепиховар, артист-вокалистхэу Алина Соценкэр, Светлана Сочило­вар ыкIи Александр Мальцевыр.
Къэралыгъо симфоническэ оркестрэм имузыковедэу Хьа­къуй Заремэ концертыр дахэу зэрищагъ.
— Симфоническэ оркестрэм­рэ Камернэ музыкальнэ те­ат­рэмрэ бэшIагъэу проектым игъэхьазырын тыпылъ. «Узыгъэ­гушхорэ пкъы ищыгъэр» зыфи­Iорэ къэгъэлъэгъоным театрэм иартистхэм шъошакIэм илъ орэдхэр къыщаIуагъ. ТапэкIи оркестрэмрэ театрэмрэ про­ектыкIэхэр зэдэдгъэцэкIэщт, — къыIуагъ СтIашъу Къэп­лъан.
Концертым къыщыIугъэ орэдхэм псэ къыпагъакIэ, мэкъамэм тамэу ратыгъэр зэкIащы. Симфоническэ оркестрэм къыригъэIорэ музыкэр лъэпкъ гупшысэм къыпкъырэкIы.
— «Узыгъэгушхорэ пкъы ищыгъэр» зыфиIорэ къэгъэлъэгъоным мэхьанэу иIэм уригъэгупшысэзэ, уиакъыл, уизэхашIэ къыгъэущызэ уедэIу. Сэнаущыгъэшхо зыхэлъ симфоническэ оркестрэмрэ камернэ музыкальнэ театрэмэ тызэгъусэу проектыр дгъэцэкIагъэ. ТапэкIи Iоф­тхьэбзэ гъэшIэгъонхэр зэхэт­щэнхэ гухэлъ тиI,— къыIуагъ Юныс Сулеймановым.
Мэкъэ IэтыгъэкIэ къыхадзэрэ орэдхэм уядэIузэ, артистхэм яIэпэIэсэныгъэ осэ ин фэошIы. Филармонием изал цIыфыбэ чIэсыгъ.

Дунэе музыкальнэ искусст­вэм хэхьэгъэ произведениехэр, Адыгеим икомпозиторхэм аусы­гъэхэр оркестрэм къыригъаIо­хэзэ, цIыфхэр культурэм, искусствэм афещэх.
Артистхэм яIэпэIэсэныгъэ искусствэ лъагэм дештэ. Орэды­Iохэм макъэр зэрагъэпсырэм узыIэпещэ. Лъэпкъыр зэгурыIоным, зэдэпсэуным, хъярымрэ гушIуагъомрэ цIыфхэм зэдагощы­ным, щыIэныгъэм лъэгъо дахэу щыпхыращырэм зегъэушъомбгъугъэным афэгъэхьыгъэ оперэр лъэхъаным диштэу артистхэм къагъэлъэгъон алъэкIыгъ.
Лъэпшъыкъо Фатим.