Илъэсым иохътэ зэшиплIым анахь тынчэу, дэрмэнэу, гъомы­лэпхъэ Iэнэ ушъагъэкIэ емызэщыжьэу къытпэгъокIырэ бжы­хьэр мафэ къэс нахь къэблагъэ.

Тыгъэ цэкъалэр хэпшIыкIэу зэкIэ­кIуагъ, къиплъыкIэу, уилыпкIэу зэрэщытыгъэр IукIотыгъэу, ифэбэ IаплI гуапэ чIым къытырегуащэ.
ТхьамафэкIэ къихьащт Iоныгъом и 1-р, мы мафэм зэфэдэкIэ тихэгъэгушхо ит еджапIэхэм еджэныр ащырагъэ­жьэжьыщт. МэфэкI лъапIэу шIэныгъэм и Мафэ ахэм ащыкIощт.
Адыгеим икIэлэцIыкIу мини 6-м ­ехъум апэрэу еджэпIэ пчъэшъхьаIур зэпачыщт ыкIи еджэным фежьэщтых. Псауныгъэ яIэу, ны-тыхэр, ныжъ-тыжъхэр къашъхьэщытхэу, кIэлэегъэджэ дэгъухэр апэ къикIынхэшъ, шIэныгъэ зэ­фэшъхьафыбэр псэу зыIуащэнэу, еджэгъэ-гъэсагъэ ыкIи хэти агъэгушIоу цIыф дэгъу хъунхэу тафэлъаIо.
Апэрэ одыджыныр анахь цIыкIухэм апае жъынчэу къытеощт.
Мы мэфэкI ялыер ныбжьырэу кIэлэцIыкIухэм агу къинэжьыщт, ащ мызэу, мытIоу мэфэкI дэхабэ къыкIэлъыкIощт. Уахътэм дэIорышIэхэу кIэлэцIыкIухэм зырачыщт: шIэныгъэхэр игъорыгъоу агъотыщт, апэрэ кIэлэегъаджэр апсэу якIэсэщт, аузэ, ины хъунхэшъ, щыIакIэм хэуцощтых. ЗэплъэкIыгъо уимыфагъэу, тыгъосэрэ кушъэхэлъыр макIо, мачъэ, къэгущыIэ, етIанэ еджакIо мэхъу, зэхэтыкIэ-зэфыщыткIэхэм ахэгъуазэ, еджэныр иIофшIэн шъхьаIэу зэрэщытыр ­къыгурыIоу дэгъоу зэреджэщтым фэсакъы мэхъу.
Н. Дзэукъожь.