Урысыем и Къыблэ хэхьэрэ шъолъырхэр зыхэлэжьэщтхэ фиджитал-спорт фестивалэу «Неущырэ мафэм ичIыпI» зыфиIорэр Мыекъуапэ щырагъэкIокIыщт. Мы спорт лъэпкъым физическэ ыкIи киберспортивнэ лъэныкъохэр къыдыхэлъытагъэх.

Проектэу «Неущырэ мафэм иджэгукIэхэр» зыфиIорэм къыдыхэлъытагъэу фиджитал-спорт лъэпкъым хэхъоныгъэ ешIы. Рес­публикэм икъэлэ шъхьаIэ щы­кIощт фестивалыр лъэныкъо зэфэшъхьа­фхэмкIэ зэтеутыгъэщт: «Спортыр» (фиджитал-футбол, фиджитал-бас­кетбол), «Тактикэр» (Counter-Strike 2, лазертаг), «Стратегиер» (Dota 2, лазертаг), «Техноло­гиехэр» (VR ритм-симулятор, къэшъонымкIэ ритм-симулятор, дронхэм якъызэдэчъэн).

Зыныбжь илъэс 14-м ехъугъэ­хэр зэнэкъокъум хэлэжьэнхэ алъэкIыщт. Джырэ уахътэм ехъу­лIэу шъолъыритфымэ – Адыгэ Республикэм, Ингушетием, Къэ­рэщэе-Черкесым, Краснодар краим ыкIи Ростов хэкум ялIыкIохэр Iофтхьабзэм зыщаушэтыным фэхьазырхэу ятхьапэхэр къагъэхьыгъэх.
Зэнэкъокъур шышъхьэIум и 26-м щегъэжьагъэу и 28-м нэс Адыгэ къэралыгъо университетым иордэунэу Кобл Якъубэ ыцIэ зыхьырэм щыкIощт. Хэлажьэ зышIоигъохэм фестивалым исайт зыщарагъэтхын алъэкIыщт.