КIэлэцIыкIу унэ-лицееу Шъэумэн Хьазрэт ыцIэ зыхьэу къалэу Красноярскэ дэтым чIэс нэбгырэ 40 шIушIакIом ичылэ гупсэу Афыпсыпэ щахьэкIагъэх. Ахэр Шъэумэн Хьазрэт къызщыхъугъэ къуаджэм къызэрэкIуагъэхэр апэрэ.

ХьакIэ ныбжьыкIэхэр афыпсыпэхэмкIэ хъугъэ-шIэгъэ ин хъу­гъэ ыкIи ифэшъуашэу апэгъо­кIыгъэх. НэIосэныгъэр Шъэумэн Хьазрэт ыцIэ зыхьырэ клиникэу къуаджэм дэтым къыщырагъэ­жьагъ. Ащ иврач шъхьаIэу Былымыхьэ Нурдин кIэлэцIыкIухэр къырищэкIхэзэ IэзапIэм нэIуасэ фишIыгъэх. ГъэцэкIэжьынхэм ауж, жъоныгъуа­кIэм, ащ ипчъэхэр къызэIуихыжьыгъэх. Итеплъэ имызакъоу, IэзэнымкIэ агъэфедэрэ пкъыгъо­хэри кIэу агъэуцугъэх. Анахьэу сабыйхэм агъэшIэгъуагъэр яунэ-лицей ишхапIэ IэзапIэм иер зэрэфэдэр ары.
— Мыгъэ IэзапIэр дгъэкIэжьы зэхъум а унэ-лицеим щыщ горэ къыхэтхынэу тыфэягъэти, шхапIэр джаущтэу тшIыгъэ. Ар ащ фэдэу инэп, ау чIэтхэр, шъохэр зэфэдэ къабзэх. КIэлэцIыкIухэр чIахьэхэмэ, ягопэщт, — еIо Шъэумэн Хьазрэт ыцIэ зыхьырэ ШIушIэ фондым ипащэу Шъэумэн Асиет.

Красноярскэ кIэлэцIыкIухэр шышъхьэIум и 9-м къыщегъэ­жьагъэу Шъачэ изыгъэпсэфыпIэхэм ащыщ щыIэх. Къатефэрэ мэфэ 21-м къыхахи Шъэумэн Хьазрэт ихэку нэIуасэ зыфашIынэу къэкIуагъэх. Ащ фэдиз гуфэбэныгъэрэ шIулъэгъурэ къязытырэ Шъэумэн Хьазрэт ичылэ гупсэ зэрэдаплъэхэрэр лъэшэу ягуап, къызщыхъугъэр, ицIыкIугъор зыщигъэкIуагъэр зэралъэгъурэр ашIолъапI.
Анастасия Сизых — унэ-лицееу Шъэумэн Хьазрэт ыцIэ зыхьэу къалэу Красноярскэ дэтым ипащ:
— ТшIогъэшIэгъон, тыгу рехьы. Гукъао, зэкIэри къэтщэшъугъэхэп. Зыхэм чIэтIупщыгъо ушэтынхэр атых, адрэхэр зэIэзэжьых е нэмыкI ушъхьагъу­хэр яIэх. Ары нахь, дэгъугъэ­-дэигъэкIэ ахэм тахадэрэп. Тисабыйхэр зэкIэ «4», «5»-кIэ еджэх. Уарыгушхонэу щыт. Унагъо зиIэм емыхъуапсэхэу, зы бынэу унэ-лицеим щэпсэух. ПстэумкIи непэ нэбгырэ 62-рэ чIэс. Илъэси 7-м къыщегъэжьагъэу 18-м нэс ахэм аныбжь. Илъэс 20-м чIэтIупщыгъо 14 тшIыгъэ, нэбгыри 100 нахьыбэм аныбжь икъуи, щыIэныгъэм хэдгъэхьагъэх.

КIэлэцIыкIу IыгъыпIакIэу Шъэ­умэн Хьазрэт Афыпсыпэ щигъэ­уцущтыр зыфэдэщтым икъэгъэлъэгъон фэгъэхьыгъэ Iофтхьабзэм Красноярскэ къикIыгъэ хьакIэ цIыкIухэр хэлэжьагъэх. Ар зашIыкIэ чIэсыщт сабыйхэм апае шIуфаIохэр зытетхэгъэ тхьапэу капсулэм ралъхьагъэр афыпсыпэхэм къаратыгъ.
КIэлэцIыкIу IыгъыпIакIэр еджа­­пIэм къыготыщт. Аужырэ шапхъэхэм адиштэщт. Нэбгыри 150-мэ ателъытэгъэщт, ыкIоцIкIэ джэгупIэ, спортивнэ унэхэр хэтыщтых, щагум куп пэпчъ хэхыгъэ чIыпIэ щыриIэщт, иунэе зыгъэпскIыпIи хэтыщт. Зыго­­тыщт IэзапIэм ышъокIэ диштэу, плъыжьышэр хэлъэу гъэпсы­гъэщт.
Виктор Орлов — АР-м иминистрэхэм я Кабинет и Тхьаматэ игуадз, АР-м финансхэмкIэ иминистр:
— Федеральнэ ыкIи респуб­ликэ мылъкухэм яшIуагъэкIэ Адыгеим щытшIэрр бэ. Тэхъутэмыкъое районым еджэпIитIумэ яшIын къыщаухыгъ, джыри зыр ыкIэм фэкIо, кIэлэцIыкIу Iыгъы­пIэхэр щагъэуцух. Ары нахь мышIэми, Шъэумэн Хьазрэт ишIушIагъи зэпыурэп. Мары кIэлэцIыкIу IыгъыпIэу ыгъэуцущтэу тызэплъыгъэр дэхэ дэд. Зыщыщ чылэм фишIэщтыр ­игугъу. Джы ыцIэ зыхьырэ кIэлэцIыкIу унэ-лицееу Красноярскэ дэтым чIэсхэм къызщыхъу­гъэ къуаджэр аригъэлъэгъунэу къыщагъэх. Арышъ, республикэм фишIагъэмкIи фишIэрэмкIи «тхьауегъэпсэу» етэIо. Шъэумэн Хьазрэт Адыгеим къызэрэщыхъу­гъэм тырэгушхо.

Шъэо Аскэр — Тэхъутэмыкъое район администрацием ипащ:
Шъэумэн Хьазрэт шIушIагъэу иIэр зэкIэ къэспчъыщтэп, ар бэ. Ау къыхэзгъэщы сшIоигъор зы — ащ фызэшIокIырэр зиамалыр зырыз дэд. Зиамалхэм зэкIэми ар къызфагъэфедэрэп. Арышъ, шIу зышIэрэ цIыф макIэхэм ар ащыщ. Красноярскэ къикIыгъэ сабыйхэу непэ ти­къуаджэ къеблэгъагъэхэр Шъэу­мэн Хьазрэт ишIушIагъэ ишыхьатых. Къызщыхъугъэ чIыгуми бэ дэд ащ фишIагъэр. Мары джыри тызхэлажьэрэр игупыкI къып­къырыкIырэ Iоф — кIэлэцIыкIу IыгъыпIакIэу Афыпсыпэ щишIыщтым икапсулэ игъэтIы­лъын. Ар зигъэуцукIэ, Афыпсыпэ исабый закъохэр арэп кIощт­хэр, гъунэгъу къуаджэхэу Пэнэхэс, Псэйтыку ыкIи Хьащ­т­ыку къарыкIыщтых. Джащ фэд IэзапIэу ащ ыцIэ зыхьырэри. Тэхъутэмыкъое районым имызакъоу, республикэм ыкIи гъу­нэгъу шъолъырхэм къарэкIых. Арышъ, тэгушIо ащ фэдэ цIыф зэрэтиIэмкIэ.
Непэ къуаджэу Афыпсыпэ щылэжьэрэ кIэлэцIыкIу IыгъыпIэр гурыт еджапIэм хэтэу Iоф ешIэ. Нэбгыри 122-рэ чIэс. Пчъагъэм хэтэп IофышIэ дэкIырэмэ Краснодар зыдащэрэ сабыйхэр. Арышъ, Афыпсыпэ къоджэ псэупIэм ипащэу ШIуцIэ Казбек къызэриIуагъэмкIэ, еджа­пIэм хэмытэу, хэушъхьафыкIыгъэ кIэлэцIыкIу IыгъыпIэ яIэным фэныкъо дэдэх.

Шъэумэн Хьазрэт – шIушIакIо:
— ЗимыIэм удэIэпыIэныр къытхалъхьэзэ тапIугъ. Ар – сихьакъ. Тянэ-тятэхэри ащ фэдагъэх, сыдигъуи лэжьагъэх, тикъоджэгъухэми IэпыIэгъу афэхъущтыгъэх, заоми хэлэжьагъэх. Амал сиIэ зэхъум, шIу сшIэнышъ, лъэуж горэ къэзгъэ­нэныр тэрэзэу слъытагъэ. КIэлэцIыкIухэу гъунэ зылъысфыхэрэм, чылэм къыщысажэхэрэм сищыIэныгъэ лъагъэ­кIуатэ, сагъэгушIо. Арышъ, кIэлэцIыкIу IыгъыпIэ анахь дэгъур агъэуцунэу ясIуагъ.
Красноярскэ къикIыгъэ кIэлэцIыкIухэм джыри мэфэ заулэ Адыгеим щагъэкIощт. Программэ гъэшIэгъон ыкIи бай афызэхагъэуцуагъ. Непэ АР-м и ЛIышъхьэу КъумпIыл Мурат IукIэщтых, республикэм икъэлэ шъхьаIэ ичIыпIэ дахэхэр зэрагъэлъэгъущтых, нэужым къушъхьэхэм ащэщтых, чIыопсым идэхагъэ хащэщтых.

Анцокъо Ирин.