Адыгэ Республикэм и Правительствэ зычIэт унэм терроризмэм пэшIуекIогъэнымкIэ комиссиемрэ оперативнэ штабымрэ зэдыряIэгъэ зэхэсыгъор щыкIуагъ. Адыгеим и ЛIышъхьэу КъумпIыл Мурат тхьамэтагъор ащ щызэрихьагъ.

Iофыгъо шъхьаIэхэу зытегущыIагъэхэм ащыщ шIэныгъэм и Мафэ изэхэщэн зызэрэфагъэхьазырырэр. Зэщыхъон-зэпэуцужьын цIыфхэм къахэмытэджэнымкIэ Iофтхьэбзэ тедзэхэу гъэсэныгъэ ягъэгъотыгъэнымкIэ организациехэм, джащ фэдэу ныбжьыкIэхэм адызэрахьагъэхэм атегущыIагъэх. АР-м гъэсэны­гъэмрэ шIэныгъэмрэкIэ иминистрэу Евгений Лебедевыр, АР-м хэгъэгу кIоцI Iоф­хэмкIэ иминистрэу Олег Безсмельницыныр, АР-м ныбжьыкIэ IофхэмкIэ и Комитет итхьаматэу Максим Галушкиныр ащ къыщыгущыIагъэх.
Адыгеим гъэсэныгъэ зыщызэрагъэгъо­тырэ иорганизацие 296-мэ шIэныгъэм и Мафэ яIофшIэн рагъэжьэжьыщт. ГумэкIыгъо къэхъумэ зытеIункIэнхэ алъэкIыщт кнопкэхэмкIэ псэуалъэхэр зэкIэ зэтырагъэпсыхьагъэх. ИкIыгъэ илъэс еджэгъум къэгъэгъунэным фэгъэ­зэгъэ организациехэм Iоф ащызышIэхэрэм, кIэлэегъаджэхэм, еджа­кIохэм инструктажхэр афызэхащагъэх, псэуалъэхэм ыкIи цIыфхэм якъэгъэ­гъунэн, ахэм щынэгъончъэным ылъэ­ныкъокIэ яIофхэм язытет зыфэдэр уплъэкIугъэным тегъэпсыхьэгъэ Iоф­тхьабзэхэр зэрахьагъэх.
Гъэсэныгъэ зыщарагъэгъотырэ организациехэу республикэм итхэм яIофхэм язытет лъыплъэщтхэм, хэбзэухъумэкIо къулыкъухэм, джащ фэдэу аварие къэ­хъумэ, къэгъэнэжьын Iофтхьабзэхэм афэгъэзэгъэ къулыкъухэм макъэ языгъэIущтхэм атегъэпсыхьагъэу спискэхэр зэхагъэуцуагъэх. Шъолъыр зэфэшъхьафхэм мы лъэныкъомкIэ IофшIэкIэшIоу аIэкIэлъ хъугъэм кIырыплъыхэзэ, ахэм анэмыкIэу джыри Iофтхьэбзэ тедзэхэр зэрахьагъэх.
Къулыкъу комиссиехэм гъэсэныгъэ зыщарагъэгъотырэ организациехэм шIэныгъэм и Мафэ ехъулIэу яIофхэм язытет агъэунэфыгъ. Организациехэр терроризмэм щыухъумэгъэнхэмкIэ ­игъоу алъэгъухэрэр акт гъэнэфагъэкIэ зэхагъэуцуагъэх. Муниципальнэ образованиехэм япащэхэм, гъэсэныгъэм икъулыкъухэм ыкIи район прокурорхэм а щыкIагъэхэм афэгъэхьыгъэ къэбарыр алъагъэIэсыгъ. Iофтхьабзэхэр зэхащэнхэм ыпэкIэ гъэсэныгъэ зыщарагъэгъотырэ псэуалъэхэм ыкIи ахэм къапэIулъ чIыпIэхэм язытет полицием ­ыуплъэкIущт, нэужым ахэр къыгъэгъунэщтых. Экстремизмэм инэшанэхэр къахэмыфэнхэм пае Адыгэ Республикэм иорганизациехэу гъэсэныгъэ зыщарагъэгъотыхэрэм Iофыгъо гъэнэфагъэхэмкIэ лекциехэм къащеджэх, творческэ зэнэкъокъухэр, олимпиадэхэр ащызэхащэх. Республикэм икIэлэегъаджэхэм апае методическэ зэхэфынхэр, IэпыIэгъухэр агъэфедэх. КIэлэегъэджэ-психологхэм, социальнэ кIэлэегъаджэхэм, организациехэм япащэхэм пIуныгъэ IофымкIэ ягуадзэхэм яшIэныгъэхэм ахэгъэхъогъэнымкIи Iоф­тхьэбзэ гъэнэфагъэхэр зэхащэх.
«Зигугъу тшIырэр тикIэлэцIыкIухэм ящынэгъончъэн, лъэныкъо зэфэшъхьафхэмкIэ пэщэныгъэ зезыхьэхэрэм гъэсэныгъэм къыхиубытэрэ псэуалъэхэр зэрищыкIагъэу къэухъумэгъэнхэм япхыгъэ Iофыгъохэм лъэшэу анаIэ атырагъэ­тын, пшъэдэкIыжь зыхьырэ къулыкъу­хэми а IофшIэныр зэрэкIорэр ауплъэкIун фае», — къыIуагъ КъумпIыл Мурат.
Мэкъэтыныр зыщыкIощт мафэм псэуалъэхэр икъоу терроризмэм щыухъу­мэгъэнхэм фэгъэхьыгъэу къэгущыIагъ АР-м хэдзынхэмкIэ и Гупчэ комиссие итхьаматэу Сэмэгу Нурбый.
Мы илъэсым мэкъэтынхэр зыщыкIощт мэфэ зыкIым Адыгэ РеспубликэмкIэ муниципальнэ образованиеу «Кировскэ къоджэ псэупIэр» зыфиIорэм инароднэ депутатхэм я Совет идепутатхэм яхэ­дзын кIощт. Мэкъэтыныр зы маф зэрэкIощтыр – 2024-рэ илъэсым Iоныгъом и 8-м. ХэдзэкIо 4600-рэ фэдиз пстэумкIи хэдзынхэм ахэлэжьэщтыр.
Полицием хэдзынхэмкIэ чIыпIэ комиссиехэм ялIыкIохэр, ахэм къяпхыгъэ министерствэхэмрэ къулыкъухэмрэ игъусэхэу, чIыпIэ комиссиехэр зычIэты­щ­тхэ унэхэр ауплъэкIущтых, терроризмэм пэуцужьыгъэнымкIэ шапхъэхэм ахэр адештэхэмэ агъэунэфыщт.
Хэдзынхэм ялъэхъан хэгъэгу кIоцI IофхэмкIэ АР-м и Министерствэ иследственнэ-оперативнэ купхэм яIофшIэн нахь агъэлъэшыщт. Мэкъэтыныр зыщыкIощт чIыпIэхэр ипIалъэм къыпэу ауп­лъэкIущтых, кинологхэр ягъусэхэу къэон зылъэкIыщт пкъыгъохэр ахэм ачIэлъхэмэ агъэунэфыщт. Хэдзынхэр зыщыкIощтхэ мафэм хэбзэухъумэным фэгъэзэгъэ къулыкъухэм, щынэгъончъэным къыпкъы­рыкIыхэзэ металлодетекторхэр агъэфедэхэзэ, уплъэкIун-лъыплъэн Iофтхьаб­зэхэр зэхащэщтых.
АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.