Урысые Федерацием и Къэралыгъо быракъ и Мафэ фэгъэхьыгъэ Iофтхьабзэ Адыгэ Республикэм истадион щыкIуагъ.

Акционернэ мысатыушI организациеу «Физическэ культурэмрэ спортымрэ хэхъоныгъэ ягъэшIыгъэнымкIэ Гупчэм» ипроектэу «Активные люди 4» зыцIэм мы Iофтхьабзэр ыгъэцэкIагъ. АР-м физическэ культурэмкIэ ыкIи спортымкIэ и Комитетрэ АР-м ибзылъфыгъэхэм я Союзрэ кIэщакIохэм IэпыIэгъу афэхъугъэх. Лъэпкъ зэгурыIоныгъэм, хэгъэгум тызэрэрыгушхорэм, ащ итарихърэ ихабзэхэмрэ зэрэдгъэлъапIэхэрэм ямэфэкIэуи ар щыт.
Iофтхьабзэм ипроектэу «Активные люди 4» зыцIэм именеджерэу Галина Каташевскаям зэхахьэр къызэIуихыгъ.
— Быракъыр къэралыгъо тамыгъэу щыт, хэгъэгум лIэшIэгъубэ хъурэ тарихъ гъогоу къыкIугъэм ар ишыхьат ыкIи цIыфыбэ зэрепхы. Мы Iофтхьабзэр пстэуми апэу зыфэгъэхьыгъэр респуб­ликэм имызакъоу, зэрэ Урысыеу патриотизмэр щыгъэпытэгъэныр, ныбжьыкIэхэр яхэгъэгу фэшъыпкъэхэу пIугъэнхэр ары,— къыIуагъ Г. Каташевскаям.
Унагъом и Илъэс къыдыхэлъытагъэу проектыр агъэцэкIагъ. Унагъом ис ныжъ-тыжъхэр, ны-тыхэр ыкIи ясабыйхэр зэгъусэхэу Урысыем и Къэралыгъо быракъ Iофтхьабзэм щаIэтыгъ. ЛIэужищ зыхэлэжьэрэ Iофтхьабзэм пIуныгъэмкIэ мэхьанэшхо зэриIэр къекIолIагъэхэм зэхашIагъ. Унэгъо зэфыщытыкIэхэр гъэпытэгъэнхэм, унэгъо шэн-хэбзэ зэхэтыкIэхэм ямэхьанэ зэрэиныр мыщ фэдэ Iофтхьабзэм къыхэщыгъ.
Муниципальнэ образованиеу «Къалэу Мыекъуапэ» инароднэ депутатхэм я Совет идепутатэу Владимир Стасевым Урысые Федерацием и Гимн къыIозэ, УФ-м и Къэралыгъо быракъэу квадрат метрэ 200 хъурэр къекIолIагъэхэм аIэтыгъ.
— ЛIэужыбэм язэпхыныгъэ гъэпытэгъэнымкIэ, Хэгъэгум уфэшъыпкъэн зэрэфаемкIэ лIэшIэгъу пчъагъэхэм щыIэ хъугъэ хэбзэ шIагъохэм тадэмыхыным мэхьанэшхо иI Урысыемрэ ащ и Къэралыгъо быракърэ ящытхъу джыри нахь лъагэу зиIэтынымкIэ, гъэхъэгъакIэхэр тшIынхэмкIэ. Унагъом и Илъэс фэгъэ­хьыгъэ Iофтхьабзэхэм зыкIыныгъэ тхэлъэу тахэлэжьэщт,— къыIуагъ депутатым.
— ЗэкIэми зэдытипшъэрылъыр къыткIэхъухьэхэрэр къэралыгъо тамыгъэхэм шъхьэкIэфэныгъэ афашIэу, ахэм мэхьанэшхо зэряIэр къагурыIоу, я Хэгъэгу лъытэныгъэ ин фыряIэу тпIунхэр, Хэгъэгушхом епэсыгъэ цIыфхэу ахэр къэдгъэтэджынхэр ары, — къыIуагъ Iофтхьабзэм изэхэщакIохэм ащыщэу Марина Мельник.
ХэушъхьафыкIыгъэ дзэ операцием щыIэ дзэкIолIмэ апае цIыфэу къекIолIагъэхэм письмэхэр «Народнэ фронтым» иныбжьыкIэ волонтерхэм арагъэтхыгъ. «Урысыем текIоныгъэр къыдихыщт» зыфиIорэ лозунгым ныбжьыкIэхэм зэрэдырагъаштэрэр къагъэлъэгъуагъ.
— Къэралыгъом итамыгъэ шъхьа­Iэхэм быракъыр зыкIэ ащыщ, тихэгъэгу ишъхьафитыныгъэ, итарихъ ыкIи икультурэ, неущрэ мафэм ицыхьэ зытелъы­жьэу зэрэфакIорэм, цIыф лъэпкъыбэмэ зыкIыныгъэрэ зэдегъэштэныгъэрэ азыфагу илъэу Урысыем зэрэщыпсэухэрэм ар яшыхьат. Си Хэгъэгу лъэшэу шIу сэлъэгъу, Урысыем и Къэралыгъо быракъ непэ лъагэу зэрэIэтыгъэм сырэгушхо, — къыIуагъ гимназиеу N 22-м июнармейцэу Ульяна Стеноваям.
Нэужым республикэм итворческэ коллектив анахь дэгъумэ ащыщэу «Иван-да-Марья» зыфаIорэр зыхэлэжьэгъэ концерт къэзэрэугъоигъэхэм къафагъэлъэгъуагъ. Флешмоб къашъор къекIолIэгъэ цIыкIуи ини къызэдашIыгъ.
Лъэпшъыкъо Фатим.
Сурэтыр: Iэшъынэ Аслъан.