Урысые Федерацием и Къэралыгъо быракъ и Мафэ фэгъэхьыгъэ зэхэхьэ шъхьаIэр Лениным ыцIэ зыхьырэ гупчэм щыкIуагъ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет – Хасэм и Тхьаматэу Владимир Нарожнэр, АР-м иминистрэхэм я Кабинет хэтхэр, депуатхэр, общественнэ, лъэпкъ-культурнэ объединениехэм, ныбжьыкIэ движениехэм ялIыкIохэр, республикэм икъэлэ шъхьаIэ щыпсэу­хэрэм ыкIи ихьакIэхэм ащыщхэр.
Республикэм и ЛIышъхьэ Iофтхьабзэм хэлажьэхэрэм закъыфигъазэзэ къыхигъэщыгъ ти Хэгъэгу шIулъэгъоу фытиIэр, ащ и Къэралыгъо быракъ зэрэдгъэлъапIэрэр, цIыф лъэпкъ зэфэшъхьафыбэу тихэгъэгу щыпсэухэрэм тызэрарыгушхорэр къэдгъэлъэгъонымкIэ амал дэ­гъоу мы мафэр зэрэщытыр.
Къэралыгъо быракъыр, гербымрэ гимнымрэ ягъусэу, тихэгъэгу итарихъ, ащ икультурэ бай, цIыфэу щыпсэухэрэм язэкъотныгъэ, ащ изыкIыныгъэ ята­мыгъ. Быракъыр щыIэныгъэм илъэныкъо пстэумкIи лIэужхэм гъэхъагъэу ашIыгъэ­хэм яшыхьат.

«Урысыем и Президентэу Владимир Путиным къызэрэхигъэщыгъэу, бы­ракъым чIэтхэу тихэгъэгогъухэм къагъэлъагъох IофшIэнымкIэ, наукэмкIэ, культурэмкIэ ыкIи спортымкIэ гъэхъэгъэшхоу ашIыгъэ­хэр, ащ чIэтхэу лIыхъужъныгъэ зэрахьэ, Урысыем ыкIуачIэрэ илъэкIрэ агъэпытэ», — къыIуагъ КъумпIыл Мурат.
Джащ фэдэу ЛIышъхьэм къыхигъэ­щыгъ Адыгеим икIалэхэу, Урысыем идзэкъулыкъушIэхэу хэушъхьафыкIыгъэ дзэ операцием щыIэхэм зэрарыгушхохэрэр.
«ХэушъхьафыкIыгъэ дзэ операцием ишъолъыр зэрифэшъуашэу зипшъэрылъхэр щызыгъэцакIэхэрэм тарэгушхо». Тиреспубликэ IэпыIэгъу зэритырэ дзэ частьхэм ыкIи ахэм ахэтхэм яунагъохэм тадеIэ. Шъхьафит ашIыжъыгъэ чIыпIэхэм ти Къэралыгъо быракъ Урысыем идзэкъу­лыкъушIэхэм къащаIэты зыхъукIэ тарэгушхо», — къыIуагъ КъумпIыл Мурат.
ИкIэухым республикэм и ЛIышъхьэ Адыгеимрэ Урысыемрэ яфедэ зыхэлъ ублэпIэ пстэуми гъэхъагъэхэр ащашIынхэу тиреспубликэ щыпсэухэрэм афэ­лъэIуагъ.
Къэзэрэугъоигъэхэм шIуфэс псалъэкIэ закъыфигъэзагъ АР-м и Къэралыгъо Совет – Хасэм и Тхьаматэу Владимир Нарожнэм. Хэгъэгум щыпсэурэ пстэу­хэмкIи мы мэфэкIым мэхьанэшхо зэриIэр къызыхегъэщым ыуж республикэ парламентым ипащэ къафэлъэIуагъ Урысыемрэ ащ и Къэралыгъо быракърэ ящы­тхъу нахь зиIэтынымкIэ гъэхъэгъакIэхэр джыри ашIынхэу.
Ащ нэужым творческэ купхэр зыхэлэжьэгъэхэ концерт щыIагъ.
АР-м и ЛIышъхьэ ипресс-­къулыкъу къытыгъэ къэбархэмкIэ
Тхьаркъохъо Сафыет.