Программэу «Урысыем инеущырэ маф» зыфиIорэм къыдыхэлъытагъэу теннис цIыкIумкIэ Адыгэ Республикэм изэIухыгъэ зэнэкъокъу Мыекъуапэ щырагъэжьагъ.

Iофтхьабзэм иапэрэ мафэ зыныбжь илъэс 12-м шIомыкIыгъэ спортсменхэр щызэнэкъокъу­гъэх. Ахэр Адыгеим, Краснодар ыкIи Ставропольскэ крайхэм, Донецкэ ыкIи Луганскэ народнэ республикэхэм, Къырым, Запорожскэ, Волгоградскэ, Брянскэ, Курскэ ыкIи Ростовскэ хэкухэм ялIыкIох.
Апэ зызыушэтыгъэхэр пшъашъэ­хэр ары, ахэр нэбгырэ 35-рэ хъущтыгъэх. Рейтингым пэрытныгъэ щызыIыгъэу, Таганрог къэзыгъэлъэгъорэ Мария Лавриненкэр, къинышхо ымылъэгъоу, финалым ихьагъ ыкIи Шытхьалэ щыщ Арина Евсюковам 3:0-у текIуагъ. ПсэупIэу Михайловскэм къикIыгъэ Мария Платоновам ящэнэрэ чIыпIэр къыдихыгъ.

КIалэхэр пштэмэ, нэбгырэ 40 зэнэкъокъугъ. Адыгеим щыщхэмкIэ къэгъэлъэгъон анахь дэгъу зиIэр Адам Матюшиныр ары, ащ я 11-рэ чIыпIэр къыдихыгъ. ЗыкIи къатемыкIохэу финалым нэсы­гъэх Шытхьалэ щыщ Даниил Казарцевымрэ станицэу Мостовскоир къэзыгъэлъэгъорэ Арсений Семеновымрэ. Д. Казарцевыр нахь лъэшыгъ, ащ дышъэ медаль къы­хьыгъ, А. Семеновыр ятIонэрэ хъугъэ. Ставропольскэ краим щыщ Иван Черезовым ящэнэрэ чIыпIэр къыфагъэшъошагъ.
Спортсменхэр джыри мэфитIо зэнэкъокъущтых. Непэ зыныбжь илъэс 14-м нэмысыгъэхэм якуп текIоныгъэр ыкIи хагъэунэфыкIырэ чIыпIэхэр къыщыдэзыхыгъэхэр къэнэфэщтых. Шэмбэтым ­зыныбжь илъэс 18-м шIомыкIыгъэ кIалэхэм ыкIи пшъашъэхэм заушэтыщт.
Iофтхьабзэр Адыгэ къэралыгъо университетым иордэунэу Кобл Якъубэ ыцIэ зыхьырэм щэкIо, учIэхьаным пае ыпкIэ лъыптын ищыкIагъэп.