Iоныгъом и 1-р тыдэрэ чIыпIи — тихэгъэгушхоу Уры­сыеми, ащ хэхьэрэ субъектхэми, шIэныгъэм и Мафэу ащыхагъэунэфы-кIы, илъэсыкIэ еджэгъур рагъэжьэжьы.

Мы мафэр къэралыгъомкIи, унагъомкIи, еджапIэмкIи, ны-­тыхэмкIи, кIэлэеджакIохэмкIи студентхэу еджэпIэ зэфэшъхьаф­хэм ащеджэхэрэмкIи ыкIи ахэм лъэгъо нэфыр пхыращыныр зыпшъэ ифэрэ кIэлэегъэджэ миншъэ пчъагъэхэмкIи анахь уасэрэ мэхьанэрэ зиIэ мэфэкI. Ар зыфэлажьэрэр цIыфыкIэм, лIэужыкIэм ипIун-гъэсэн ары.
Тикъэралыгъо ыкIи тирес­публикэ ныбжьыкIэ пIуныгъэ-­гъэсэныгъэм уасэу щыратырэр зэрэиным ишыхьат ыпэкIэ фэ­мыдэу, ублэпIэ, гурыт сэнэхьат ыкIи апшъэрэ сэнэхьат зыщарагъэгъотырэ еджэпIэшхохэр кIэу зэрашIы­хэ­рэр, зэрагъэкIэжь­хэрэр. Ащ дакIоу егъэджэн-гъэ­сэныгъэмкIэ ящыкIэгъэщт псэо­лъэ пстэур къа­зэрафащэфырэр, къэнэ­жьырэ закъор еджакIо пэпчъ, ишъып­къэ еджэным- рихьылIэнышъ, шIэныгъакIэхэм афэкIоныр ары.
Мы мэфэкIыр къэсы зыхъукIэ, бэ гум, шъхьэм ащызэблэкIырэр; ны-тыхэу апэрэу зисабый еджапIэм кIощтхэм етIупщы­гъэу мы мафэм зыфагъэхьазыры, кIэлэцIыкIур еджапIэм зэрехъу­лIэщтым егъапэх, кIэлэегъаджэм гукIэгъу тIэкIу хэлъыщта, афэ­чэфыщта ыкIи зэфэдэу афыщытыщта апэрэу еджапIэм ипчъэ елъэбэкъогъэ нэбгырэ 25 — 30-м. Ау кIэлэегъэджэ дэгъу ури­хьылIэмэ, зэкIэ Iофыгъуабэу къэу­цурэр дахэу зэшIуихыщт. ТафэлъаIо анахь цIыкIухэу ­мыгъэ еджэпIэ пчъэшъхьаIум елъэбэкъощтхэм псауныгъэ ­пытэ яIэу, еджэныр шIэгъошIу къафэ­хъунэу, ялэгъу цIыкIухэр ныб­джэгъушIу къафэхъунхэу, анахь кIэлэегъэджэ дэгъур апэ къи­кIынэу, еджэным, шIэныгъэм гушIогъуабэ хагъотэнэу.
ИлъэсыкIэ еджэгъур къэблагъэ зыхъукIэ ухэтми, шъхьэм бэдэд щызэпэкIэкIыжьырэр: мары шъхьац блэгъэ кIыхьитIум бант фыжьыбзэр ахэшIагъэу, еджэкIо джэнэ шхъомчышъо зэтедзагъэм пэIупхэ фыжьыбзэр телъэу, Мамхыгъэ гурыт еджапIэм хэтыгъэ ублэпIэ еджапIэм апэрэ лъэбэкъур чIэсыдзагъ.
Сигуапэу зэкIэмкIи илъэс 20-рэ седжагъ. Сикъоджэ гупсэу Мамхыгъэ сыщезгъэджэгъэ кIэлэегъэджэ дэгъу дэдэхэм, Адыгэ педучилищым шIэны­гъабэкIэ къыщытэтэгъэ егъэ­джакIохэм ыкIи Адыгэ кIэлэ­егъэджэ институтым филологиемкIэ ифакультет очнэу илъэси 5-рэ сызыщеджэм, цIыф акъы­лышIо-еджэгъэшхоу сызIукIа­гъэхэм яхьатыркIэ цIыфы сы­хъугъ, акъыли шIэныгъи згъо­ты­гъэ. Зынахь лъапIэ сэркIэ щы­­мыIэ ныдэлъфыбзэмкIэ журналистикэ хьасэм сыхэтэу ­илъэс 30 хъугъэу Iоф сэшIэ, гущыIэм хэлъ-хэсыр мафэ къэс сэпщы, сэгъэунэшкIу.
Сщыгъупшэрэп Адыгэ къэ­ралыгъо кIэлэегъэджэ институтыр къызысэухым, Мыекъопэ гурыт еджапIэу N 16-м кIэлэ­егъаджэу IофшIэныр зэрэщезгъэжьэгъагъэр. Нэбгырэ 42-рэ сикласс исыгъ, машалахьэу ащ дэжьым сабыйхэр нахьыбэу къэхъущтыгъэх. СиеджэкIо цIыкIухэсм яхыегъэ-фэбагъэ джы къызнэсыгъэм сщыгъупшэрэп. Зы илъэс еджэгъур зэкIом, Адыгэ хэку тарихъ краеведче-
скэ музеим научнэ IофышIэу сыIухьагъ, ащ къыкIэлъыкIуагъ журналист IофшIэныр.
Тыдэ Iоф зыщысэшIи, сикIэлэегъэджагъэхэм къысатыгъэ шIэныгъэр сигъогогъоу сыкъырэкIо.
ШIэныгъэм и Мафэ ехъулIэу кIэлэеджэкIо цIыкIу пэпчъ ыкIи нахь инхэм, студентхэу еджэпIэ зэфэшъхьафхэм ащеджэхэрэм, еджэгъу илъэс тынчхэр, нэфы­нэхэр, кIэлэегъэджэ анахь дэгъухэр апэкIэ къикIынхэу, еджэ­ныр якIасэу, къин къащымы­-
хъоу, гушIуагъо хагъуатэу зэшIуахынэу, ямурад инхэм акIэ­хьанхэу, агукIэ якIэсэ сэнэхьатхэр агъотынхэу, заохэр тыдэрэ чIыналъи щыкIодынхэшъ, дунаир зэкIэ мамыр хъужьынэу, щыIэкIэ гупсэф яIэнэу сафэлъаIо.
Гъогу мафэ шъутехь!
Мамырыкъо
Нуриет.