Республикэм ит гурыт еджапIэхэр илъэсыкIэ еджэгъум фагъэхьазырых, агъэкъабзэх, зэтырагъэпсыхьэх ыкIи агъэкIэжьых. Къэралыгъо программэм къыдыхэлъытагъэу илъэс къэс мыщ фэдэ игъэкIотыгъэ IофшIэнхэр ахэм ащэкIох.

Мы программэр республикэм зэрифэшъуашэу щагъэцэ­кIэным АР-м и ЛIышъхьэ ынаIэ тет. Гурыт еджапIэхэр илъэсыкIэ еджэгъум фэхьазырынхэ зэрэфаер, гъэцэкIэжьынхэм яшIуагъэкIэ ахэм теплъакIэ яIэ зэрэхъущтыр, аужырэ шапхъэ­хэм адиштэу зэрэзэтырагъэпсы­хьащтхэр КъумпIыл Мурат къы­хегъэщы.
Мыекъуапэ пштэмэ, мы илъэ­сым игъэкIотыгъэ гъэцэкIэжьынхэр гурыт еджапIэхэу N 15-м, 10-м, лицееу N 35-м ыкIи зи­псауныгъэкIэ илэгъухэм акIэмыхьэрэр зычIэсхэ еджапIэм ащэкIох. ЗэкIэмкIи мыхэм язэтегъэпсыхьан пэIуагъэхьанэу сомэ миллион 360-рэ къатIупщыгъ. ЗэрагъэнафэрэмкIэ, Iоныгъом и 1-м ахэр къызэIуа­хыжьыщтых.
Мы мафэхэм лицееу N 35-м тыщыIагъ, гъэцэкIэжьынхэр зэ­рэщыкIохэрэр нэрылъэгъу тфэ­хъугъ. Ащ ипащэу Анастасия Эйхвальд къытпэгъокIыгъ, Iоф­хэм язытет къытфиIотагъ.
— ТиеджапIэ илъэс 23-кIэ узэкIэIэбэжьымэ къызэIуахы­гъагъ, ащ фэдизэу мыжъыми, игъэкIотыгъэ гъэцэкIэжьынхэр ищыкIэгъагъэх. Тэрэзэу къэфабэщтыгъэп, гъэрекIо ощх-жьыбгъэ зэхэтхэм ауж кIашъор къы­кIэзыгъагъ, къыкIэщхыщтыгъ. Федеральнэ программэм тызэрэхэфагъэр, тиеджапIэ шапхъэхэм адиштэу къызэрэтфагъэпсырэр лъэшэу тигуапэ, — еIо тигущыIэгъу.
ЕджапIэр къатищэу зэтет. ЫкIоцIкIэ дэпкъхэр аукъэбзызэ икIэрыкIэу штукатуркэр Iужъоу тыралъхьагъ, джэхашъохэр ратхъыжьхи, классхэм ламинат, коридорхэм шапхъэхэм ади­штэ­рэ плиткэр арадзагъэх, пчъэхэр зэблахъугъэх. ЕджапIэм ышъхьэ тырахыгъэп, ау игъэкIотыгъэ гъэцэкIэжьынхэр рашIылIагъэх.

— БлэкIыгъэ илъэсым ыкIэм лицеир къэтыунэкIынэу едгъэ­жьэгъагъ, лицееу N 34-м смени­тIоу тыщеджагъ. Мэзаем гъэ­цэ­кIэжьынхэр аублагъэх, ыпэрапшIэу гурыт еджапIэм игъэ­фэбапIэхэр, псырыкIуапIэхэр, электричествэр къызэрыкIощтыр зэблахъугъэх, канализациер зэтырагъэпсыхьажьыгъ, — еIо пащэм.
ЕджапIэм пхъэ-шъхьангъупчъэ 200 фэдиз хэтыгъ, ахэр зэ­блахъугъэх. ДжырэкIэ апэрэ къатым IофшIэнхэр щэкIох, клас­схэр зэкIэ хьазырых, джащ фэ­дэу кIэлэеджакIохэм языгъэ­псэфыгъо уахътэ зыщагъэкIон алъэкIыщт чIыпIэр, шхапIэр зэрифэшъуашэу зэтырагъэпсы­хьагъэх, ящыкIэгъэ Iэмэ-псы­мэхэр ачIагъэуцожьых.
IофшIэнхэм апэIухьанэу федеральнэ, республикэ ыкIи му­ниципальнэ бюджетхэм къахэ­хыгъэ сомэ миллиони 100-м ехъу къафатIупщыгъ. Ащ нэ­мыкIэу бюджет зэфэшъхьафхэм къахахыгъэ ахъщэ тедзэу къа­IэкIэхьагъэм ишIуагъэкIэ партхэр, пхъэнтIэкIухэр, доскэхэр, кIэлэегъаджэхэм ящыкIэгъэщтыр зэкIэ къытфащагъ. ШхапIэм гъэучъыIалъэр, аужырэ шап­хъэхэм адиштэрэ Iэмэ-псымэхэр чIагъэуцуагъэх.

ТызыкIогъэ мафэм лицеим иапэрэ къат IофшIэнхэр щыкIощтыгъэх, щагум асфальт тыралъхьэщтыгъ, чэур шапхъэхэм адиштэу зэтырагъэпсыхьэщтыгъ. IофшIэнхэм япроцент 92-р гъэцэкIэгъах, гъэкъэбзэжьын Iоф­шIэнхэр къафэнагъэх.
ЫпшъэкIэ зигугъу къэтшIыгъэ программэм ишIуагъэкIэ гъэсэныгъэм иучреждение джырэ шапхъэхэм адиштэу, дахэу ыкIи гупсэфэу хъущт. Iоныгъом и 1-м кIэлэеджакIохэр ыкIи кIэлэ­егъаджэхэр лъэхъаным диштэрэ еджапIэм къекIолIэжьыщтых, ар гуIэтыпIэ афэхъущт. Мы илъэ­сым апэрэ классым нэбгы­ри 136-рэ аштэщт, ахэр классиплIэу зэтеутыгъэщтых.
ДЕЛЭКЪО Анет.
Сурэтхэр: Iэшъынэ Аслъан.