Адыгеим и ЛIышъхьэу КъумпIыл Мурат къалэу Мыекъуапэ иурамэу Димитровым фэтэрыбэу зэхэт унэу тетхэм ащыщхэу N 1-мрэ N 3-мрэ ящагухэм язытет зэригъэлъэгъугъ. Республикэм и ЛIышъхьэ щагухэр зэрэзэтырагъэ­псыхьэхэрэм зызщегъэгъозэ нэуж къалэм ипащэрэ гъэIорышIэкIо компаниемрэ щыкIагъэу ылъэгъухэрэм ащыщхэр ариIуагъэх.

Iофтхьабзэм хэлэжьагъэх къалэу Мыекъуапэ ипащэу Геннадий Митрофановыр, АР-м псэолъэшIынымкIэ и Министерствэ, къэлэ архитектурэм ялIыкIохэр, унэхэм афэгъэзэгъэ тхьаматэхэм, ахэм ащыпсэухэрэм, подряднэ организациехэм япащэхэм ащыщхэр.
Мы илъэсым бэдзэогъум и 1-м ехъу­лIэу щагухэм язэтегъэпсыхьанкIэ Iоф­шIэнхэр ухыгъэ зэрэхъугъэхэр къыхэгъэщыгъэн фае. КIэлэцIыкIухэр зыщыджэгущтхэ чIыпIэр, къэшIыхьэгъэ губгъо цIыкIоу футбол зыщешIэщтхэр, тIысыпIэ-зыгъэпсэфыпIэ цIыкIухэр яIэ хъугъэх. Проектым тетэу щагухэм адэхьэрэ гъо­гухэм зарагъэушъомбгъугъ, транспортыр зыдэщытыщт чIыпIэхэр зэтырагъэпсыхьагъэх ыкIи нэмыкIхэр зэшIуа­хыгъэх. Программэу «Къэлэ щыIэкIэ Iэрыфэгъур» зыфиIорэмрэ лъэпкъ проектэу «ПсэупIэмрэ къэлэ щыIакIэмрэ» зыфиIохэрэмрэ къызэрэдалъытэрэм тетэу 2024-рэ илъэсым щагу 21-рэ зэтырагъэ­псыхьагъ, 2023-рэ илъэсым – 23-рэ. Программэр зыщагъэцэкIэрэ илъэсхэм къакIоцI пстэумкIи къалэу Мыекъуапэ щагу 228-рэ щагъэцэкIэжьыгъ.
«Тэ тызыфаер унэхэм ачIэсхэм проектхэм язэхэгъэуцон кIо зыхъукIэ гъэ­тэрэзыжьынхэр ахэм афэшIыгъэным иамал зэрэщыIэр къагурыIоныр ары. ГъэцэкIэжьын IофшIэнхэр заухыхэкIэ, ахэм афэсакъынхэ, къэбзэныгъэм лъыплъэнхэ ыкIи зэщамыгъэкъонхэм анаIэ тырагъэтын фае. МыщкIэ пшъэрылъ гъэнэфагъэхэр яIэх унэхэм афэгъэзэгъэ тхьаматэхэм. Шэмбэтхэм, къэбзэныгъэм имафэхэм язэхэщэн нахь игъэкIотыгъэу ахэм цIыфхэр къахагъэлэжьэн фае», — къыIуагъ КъумпIыл Мурат.

Республикэм и ЛIышъхьэ анахьэу анаIэ зытыраригъэдзагъэр муниципалитетхэмрэ гъэIорышIэкIо компаниехэмрэ япащэхэр цIыфхэм зэгурыIоныгъэ-зэдэ­лэжьэныгъэ адыряIэнымкIэ шIыкIэ-­амалыкIэхэм алъыхъунхэр, ахэр кIэщакIо зыфэхъухэрэ IофтхьэбзэшIухэмкIэ яшIуа­гъэ арагъэкIыныр ары.
Щагухэр хъоо-пщаоу щытынхэмкIэ зизэрар къэкIорэ гаражхэми хэу­шъхьафыкIыгъэу атегущыIагъэх.
КъумпIыл Мурат жъы хъугъэ гаражхэр IухыжьыгъэнхэмкIэ, чIыпIэ нэкIэу щагухэм яIэр зэрэзэтырагъэпсыхьажьыщтым епхыгъэ Iофтхьабзэхэу зэшIуа­хыщтхэмкIэ а унэхэм ащыпсэухэрэм гущыIэгъу афэхъу­нхэм къыфэджагъ.

Унэхэм япхыгъэ Iофтхьабзэхэм афэгъэзагъэхэм гущыIэгъу зафэхъум респуб­ликэм и ЛIышъхьэ УплъэкIокIо гъэIорышIапIэм пшъэрылъ фишIыгъ цIыфхэм язэIукIэхэм афэхъугъэ кIэуххэу, ахэм къаIэтыгъэ Iофыгъохэу тхыгъэу щыIэхэр зэригъэпшэнхэу. Рес­публикэм ипащэ щагухэм язэтегъэ­псыхьан иIофыгъохэм цIыфхэр икъоу къызэрахамыгъэлажьэхэрэр къыхигъэ­щыгъ, гъэпсын IофшIэным зэкIэри зэфэдэу ыгъэгумэкIынхэ, ащ яфедэ зэрэхэлъыр нахь дэгъоу зэхягъэшIыкIыгъэн фае.