Дунаим ихэгъэгуи 7-мэ — Молдовэм, Армением, Узбекистан, Таджикистан, Киргизием, Германием ыкIи Урысыем ишъолъыр 83-мэ къарыкIыгъэ кIэлэеджэкIо мини 3-м ехъу шIэныгъэмкIэ фес­тивалым хэлэжьагъэх.

Федеральнэ проектэу «ШIэныгъэм ыкIи технологиехэм ямэхьанэ къэIэтыгъэныр» зыфиIорэм къыдыхэлъытагъэу Урысые Федерацием гъэсэныгъэмрэ шIэныгъэмрэкIэ и Министерствэ игрант иIэпыIэгъоу Iофтхьабзэр Адыгэ къэралыгъо университетым зэхищагъ. Урысые кIэлэцIыкIу гупчэу «Ор­ленкэм» ар щыкIуагъ.
ШIэныгъэм ифестиваль ­Адыгэ къэралыгъо университетым ипро­ектэу «Наука вокруг» зыфиIорэм епхыгъэу зэхащэ. КIэ­лэеджакIохэр шIэныгъэм фэщэгъэнхэр, шIэныгъэ-техническэ творчествэр зэрэгъэшIэгъоныр зэхашIэныр, шIэныгъакIэхэр ара­гъэгъотыныр ары пшъэрылъ шъхьаIэу зэхэщакIохэм зыфагъэуцужьырэр.
— Сабыир гурыт еджапIэм джыри чIэсэу шIэныгъэм фэпщэн, шIогъэшIэгъон пшIын фае. Тыкъэзыуцухьэрэ дунаир зэригъашIэ зыхъукIэ, нахь игъэкIотыгъэу шIэныгъэхэм зафигъэзэщт. Ыныбжь хахъо къэс дунаир нахь дэгъу зэришIыщтым дэлэжьэщт. ШIэныгъэ зэфэшъхьафхэмкIэ хэхъоныгъэхэр кIэлэеджакIохэм ашIынхэм, шIэныгъэлэжь цIэрыIохэм нэIуасэ афэхъунхэм пай мы фестивалыр зыкIызэхэтщагъэр, — къыIуагъ Адыгэ къэралыгъо универ­ситетым иректорэу, проектэу «Наука вокруг» зыфиIорэм ипащэу Мамый Даутэ.

Философие шIэныгъэхэмкIэ кандидатэу, Москва икъэралыгъо университетэу М.В. Ломоносовым ыцIэ зыхьырэм философиемкIэ ифакультет икафедрэ ипащэу гъэхъэгъэшIухэр зышIырэ Елена Брызгалинам Iофтхьабзэм къыдыхэлъытагъэу ныбжьыкIэхэм гущыIэгъу афэхъугъ. Ащ иврачэу, Москва псауны­гъэр къэухъумэгъэнымкIэ и Департа­мент и Гупчэ иIофышIэу, порта­лэу «Нейроновости.ру» зыфиIо­рэм иредактор шъхьаIэу, медицинэм епхыгъэ журналистхэм я Ассоциацие хэтэу, гъэхъэгъэ­шIухэр зышIыгъэ Анна Хору­жаяр ныбжьыкIэхэм аIукIагъ. Неврологым иIофшIэн зэрэзэхищэрэр, томографыр ыкIи МРТ-р зэрагъэфедэхэрэр ыкIи шъхьэ­куцIыр ауплъэкIу зыхъукIэ ащ ихъыкIырэр къафиIотагъ.
Фестивалым къыдыхэлъытагъэу Iофтхьэбзэ зэфэшъхьафхэр, мастер-классхэр ыкIи интерактив къэгъэлъэгъонхэр, квестхэр, джэгукIэхэр, сурэттехыгъэхэмкIэ зэнэкъокъу ыкIи нэмыкIхэр афызэхащагъэх. ЗэкIэмкIи интерактив площадкэ 40-м ехъу зэхащэгъагъ, кIэлэеджакIохэр хьисапым, биологием, физикэм, астрофизикэм, химием ыкIи IT-м ылъэныкъохэм нахь игъэ­кIотыгъэу нэIуасэ афэхъугъэх.
ДНК-м имодель аугъоигъ, джэгукIэу «Нулевой пациент» зыфиIорэмкIэ джэгугъэх, телескопыр ыкIи тыгъэ системэр зэрэзэхэтыр ыкIи нэмыкIхэр зэрагъэшIагъэх.
Орленкэм щызэхащэрэ Iофтхьабзэхэр мэкъуогъум къыщегъэжьагъэу чъэпыогъум нэс щыкIощтых. ЗэкIэмкIи кIэлэцIыкIу гупчэм зыщызыгъэпсэфырэ нэбгырэ мин 20 фэдиз ащ хэлэжьэнхэу агъэнафэ.
Адыгэ къэралыгъо
университетым
ипресс-къулыкъу.