ШIэныгъэм ыкIи IофшIэпIэ чIыпIэхэм ныбжьыкIэхэм гъэ­хъагъэхэр ащашIынхэм ылъэныкъокIэ обществэу «ШIэныгъ» зыфиIорэм зэхищэрэ Iофтхьа­бзэхэр лъегъэкIуатэх.

Мыекъопэ къэралыгъо технологическэ университетым мы мафэхэм тематическэ Iофтхьабзэ щызэхащагъ, бизнес-тренерэу зэнэкъокъоу «Лидеры России» зыфиIорэм текIоныгъэ къыщыдэзыхыгъэ Олег Лебедевыр ныбжьыкIэхэм гущыIэгъу афэхъугъ.
Сыд фэдэрэ сэнэхьаткIи хэхъоны­гъэхэр пшIынхэмкIэ Iэрыфэгъу хъун ылъэкIыщт лъэныкъохэр ащ ныбжьыкIэхэм къафиIотагъ. ЯзекIуакIэхэр зэха­фыжьынхэ зэралъэкIыщтхэр, сэнаущыгъэу ахэлъхэр зэрагъэунэфыщтхэр, ахэм зэрахагъэхъощтыр ыкIи нэмыкIыбэхэм атегущыIагъэх.
ГущыIэм пае, Олег Лебедевым ныбжьыкIэхэр игъусэхэу, «Окно Джохари» зыфиIорэ концепциер къызфагъэфедэзэ, къэзыуцухьэрэ цIыфхэр къызэ­рафыщытхэр агъэунэфыгъ, ахэм нахь агурыIоным пае ашIэн фаехэр аушэ­тыгъэх. Ягулъытэ нахь зыфэгъэзэгъэн фаер ащ къыгъэлъэгъуагъ.
— ЦIыфхэм узэралъытэрэр ыкIи уизе­кIуакIэ еплъыкIэу фыряIэр къызыпшIэкIэ, ахэм нахь уагурыIощт, цыхьэ къыпфашIыщт, — еIо Олег Лебедевым.
Джащ фэдэу «Тест Белбина» зыфиIорэри зэхафыгъ, ащ ишIуагъэкIэ куп зэхэтым ныбжьыкIэм мэхьанэу иIэр къыгурыIон ыкIи шIуагъэ къызыпыкIыщт Iофыгъохэр зэготхэу зэрашIэн зэра­лъэкIыщтыр аушэтыгъ.
НыбжьыкIэхэм къызэраIуагъэмкIэ, зэдэгущыIэгъур ашIогъэшIэгъоныгъ ыкIи шIуагъэ пылъэу алъытагъ. Олег Лебедевым упчIэхэр ратынхэу, Iофыгъо зэ­фэшъхьафхэм нахь игъэкIотыгъэу атегущыIэнхэу амал яIагъ.
— НыбжьыкIэхэм чанэу зыкъагъэ­лъэгъуагъ, студентхэм ащыщхэр зэ­дэгущыIэгъум ыуж къэнагъэх, упчIэхэр къатыгъэх, — къыIуагъ кIэухым экспертым. — ЩыIэныгъэм чIыпIэ гъэ­нэфагъэ щызыубытынэу фаем зыгорэ ышIэн фае. Лъэбэкъу цIыкIухэмкIэ ащ уфэкIон фае, сыда пIомэ гъэ­хъэгъэ инхэм сыдигъокIи мэкIэ-макIэу якIуалIэх.
Анастасия Черницына.