Унагъом и Илъэс къыдыхэлъытагъэу ащ имэхьанэ къизыгъэлъэгъукIырэ арт-псэуа­лъэхэр кIэлэцIыкIу IыгъыпIэхэм ыкIи гурыт еджапIэхэм ащышIыгъэнхэр мысатыушI ор­ганизациеу «Талантида» зыфиIорэм лъе­гъэкIуатэ.

Организациеу «Движение Пер­вых» зэхищэгъэ грантхэмкIэ зэнэкъокъум хэлэжьэнхэу 2024-рэ илъэсым Урысыем ишъолъыр 88-мэ ялIыкIохэм ­ялъэIу тхылъ мини 6 фэдиз къы­ра­хьылIагъ. Проектэу «Творческая перезагрузка школьных пространств «Окно в культуру» зыфиIорэр ары ныIэп АдыгеимкIэ зэнэкъокъум щатекIуа­гъэр.
ЫпэкIэ проектэу «Окно в культуру» зыфиIорэм къыдыхэлъытагъэу Адыгеим арт-псэуа­лъэхэр Тэхъутэмыкъое, Мые­къопэ районхэм ыкIи къалэу Мыекъуапэ ащашIыгъэх.
ШышъхьэIум и 19-м псэупIэу Красногвардейскэ кIэлэцIыкIу IыгъыпIэу N 1-м ыкIи мы псэу­пIэм дэт гурыт еджапIэу N 11-м арт-псэуалъэхэм якъызэIухын фэгъэхьыгъэ Iофтхьабзэхэр ащы­кIуагъэх.
ШышъхьэIум и 20-м псэупIэу Джаджэм дэт гурыт еджапIэм мыщ фэгъэхьыгъэ зэхахьэ щырекIокIыгъ.
Псэуалъэр еджапIэм ичIэ­хьэгъу дэжь щагъэпсыгъ. ДжырэкIэ зыгъэпсэфыгъом щыIэ кIэлэеджакIохэм илъэсыкIэ еджэ­гъур зырагъэжьэжькIэ, ар шIухьафтын афэхъущт.

Илъэс пчъагъэхэм дэпкъ нэкIым Хэгъэгум, ащ изыкIыныгъэ, зэгурыIоныгъэм, лъэпкъ зэфэшъхьафхэм язэныбджэгъу­ныгъэ ыкIи чIыпIэ хъопсапIэхэр къизгъэлъэгъукIырэ сурэтхэр атырашIыхьагъэх. Гъэмэфэ зыгъэпсэфыгъоу тефагъ нахь мы­шIэми, яеджапIэ щыхъугъэ зэ­хъокIыныгъэхэр зэрагъэлъэгъун­хэу кIэлэцIыкIубэ Iофтхьабзэм къекIолIагъ ыкIи агу рихьыгъ.
— НыбжьыкIэхэм Хэгъэгум, лъэпкъым, культурэм шIулъэ­гъоу афыряIэр сурэтхэмкIэ къидгъэлъэгъукIы тшIоигъуагъ. Урысыем и Къэралыгъо быракъ и Мафэ ехъулIэу IофшIэнхэр дгъэцэкIагъэх. Сурэтхэр зэмы­шъогъух, дахэх, нэр агъэгушIо. Ахэм мэхьэнэ куу акIоцIылъ. Унагъомрэ еджапIэмрэ языкIыныгъэ ишыхьатых, — къыIуагъ проектыр зигукъэкIэу, мысатыушI органи­за­циеу «Талантидэм» ипащэу Ка­рен Каракьян.

Пащэм къызэри­IотагъэмкIэ, «Движение Первых» зы­фиIорэм иIэпыIэгъу­кIэ проектыр гъэцэкIагъэ мэхъу. Ащ зэхищэгъэ зэнэкъо­къум хэлэжьа­гъ ыкIи текIоныгъэр къыщыдихыгъ. Сурэт­хэм яшIын сурэ­тышI­хэмрэ волонтер­хэмрэ фэгъэзагъэх. ПстэумкIи арт-псэолъи 9 къыдыхэлъытагъ. Зэрэрахъухьагъэм­кIэ, республикэм икъалэхэм ыкIи ирайонхэм ягурыт еджэпIэ зырыз ащ къызэлъиубытыщт.
Джэджэ районым ыуж Хьакурынэхьаблэ дэт еджапIэм проектыр щагъэцэкIэщт.
«Окно в культуру» зыфиIорэм шэн-хабзэхэр, гъэпсыкIэ-шIыкIэхэр, еплъыкIэ-шIошIхэр, гу­пшысэкIэ амалыр, хэти зэрэфэ­лъэкIэу ишIуагъэ къыгъакIоу щы­Iэныгъэм хэуцон ылъэкIыныр, шIэныгъэ-гъэсэныгъэ зэрагъэгъотыныр, пIуныгъэ дэгъу ахэлъхьэгъэныр къыдыхэлъытагъэх.
ГущыIэу «культурэм» имэхьанэр пIуныгъэм лъэпсэшIу фэшIыгъэныр, нэбгырэ пэпчъ итворческэ амалхэр ыгъэфе­дэжьышъоу егъэсэгъэныр ары. Культурэр хэти мафэ къэс ищы­Iэныгъэ къыщыготыным мэхьанэшхо иI, ащ ишапхъэхэр зышIэрэр ыпэкIэ лъыкIотэн ылъэкIыщт. Джары тишъолъыр щыпсэурэ пстэуми ащ анаIэ зыкIытырагъэтын фаер. ЦIыфымрэ къытэшIэкIыгъэ дуна­имрэ пытэу зэрэзэпхыгъэхэр къыдэтлъытэзэ, творческэ гъэ­хъэгъэ инхэр зиIэхэм тиныбжьыкIэхэр аIудгъэкIэнхэм, ахэм ягущыIэ кIэдгъэдэIукIынхэм мэ­хьанэшхо иI.

— ШIухьафтынэу къытфа­шIы­гъэмкIэ «Талантидэм» илIыкIо­хэм тафэраз. ЕджапIэм къы­зэрычIахьэхэу арт-псэуа­лъэу унагъомрэ еджапIэмрэ язы­кIыныгъэ къизыгъэлъэгъукIырэм кIэлэеджакIохэр IукIэщтых. Хэгъэгур ны папкIэу зэрыщытыр ахэм зыхашIэщт, — къыIуагъ Джаджэ дэт еджапIэм ипащэу Елена Воробьевам.
Лъэпшъыкъо Фатим.
Сурэтхэр авторым иех.