Гъэмэфэ еджапIэхэм яIофшIэн аухыгъ
Я Vll-рэ гъэмэфэ биологическэ еджапIэр ыкIи я III-рэ гъэмэфэ химическэ еджапIэр бэдзэогъум и 28-м къыщегъэжьагъэу шышъхьэIум и 17-м нэс Мыекъопэ районым щыкIуагъэх.
Адыгэ къэралыгъо университетым иегъэджэн гупчэу «Горная легенда» зыфиIорэм Адыгеим, Мордовием, Татарстан, Москва, Санкт-Петербург, Волгоградскэ, Вологодскэ, Липецкэ, Московскэ, Ростовскэ, Свердловскэ, Самарскэ, Тульскэ ыкIи Тюменьскэ хэкухэм къарыкIыгъэ нэбгыри 112-рэ ахэм ахэлэжьагъ.
Адыгэ Республикэм гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетыр, республикэ естественнэ-хьисап еджапIэр, сэнаущыгъэ ин зыхэлъ ныбжьыкIэхэр къызыщыхагъэщырэ ыкIи хэхъоныгъэхэр зыщарагъэшIырэ шъолъыр гупчэу «Полярис-Адыгея» зыфиIорэр Iофтхьабзэм кIэщакIо фэхъугъэх.
Гъэмэфэ еджапIэхэм биологиер, химиер нахь игъэкIотыгъэу ащызэрагъашIэх, зэнэкъокъу зэфэшъхьафхэм кIэлэеджакIохэр ахэлэжьэнхэм фэшI теоретическэ ыкIи практическэ шIэныгъэу аIэкIэлъын фаер арагъэшIагъ, куп зэфэшъхьафхэм ахэтхэу яшIэныгъэхэр къызэрагъэлъэгъощтым фагъэсагъэх.
Гъэсэныгъэ программэм къыдыхэлъытагъэу лекциехэр, семинархэр, практическэ гъэцэкIэжьынхэр афызэхащагъэх. Егъэджэн Iофтхьабзэхэм анэмыкIэу культурнэ ыкIи спорт Iофтхьэбзэ зэфэшъхьафхэр яIагъэх. Джащ фэдэу Адыгэ культурэм и Мафэ зэхащагъ.
Iофтхьабзэм къыдыхэлъытагъэу шIэныгъэлэжь цIэрыIохэр лекциехэм къяджагъэх. Ахэм ащыщых Москва икъэралыгъо университетэу М. В. Ломоносовым ыцIэ зыхьырэм ипрофессорэу, биологие шIэныгъэхэмкIэ докторэу, нейрокомпьютернэ интерфейсым епхыгъэ апэрэ лабораториер зэхэзыщэгъэ Александр Каплан, ИТМО-м информатикэмкIэ инаучнэ-гъэсэныгъэ гупчэ ипащэу, профессорэу Екатерина Скорб, МГУ-м философиемкIэ икафедрэ ипащэу, биоэтикэмкIэ экспертэу, философие шIэныгъэхэмкIэ кандидатэу Елена Брызгалинар.
Хабзэ зэрэхъугъэу, гъэмэфэ еджапIэхэм Адыгэ къэралыгъо университетым, республикэ естественнэ-хьисап еджапIэм ыкIи гъэсэныгъэ гупчэу «Полярис- Адыгея» зыфиIорэм икIэлэегъэджэ анахь дэгъухэм Iоф ащашIэ. Мы илъэсым джащ фэдэу Урысыем иапшъэрэ еджэпIэ анахь дэгъухэм къарыкIыгъэ кIэлэегъэджэ пэрытхэр кIэлэеджакIохэм гущыIэгъу афэхъугъэх.
Адыгэ къэралыгъо университетым
ипресс-къулыкъу.