Мыекъуапэ имэз парк чIыпIэу «Мэздахэм» изэтегъэпсыхьан лъагъэкIуатэ. IофшIэнхэм япроцент 65-р хагъэкIыгъах.

Федеральнэ проектэу «Iэрыфэгъу къэлэ щыIакIэр гъэпсыгъэныр» зыфиIорэм къыдыхэлъытагъэу чIыпIэм ишIын рагъэ­жьагъ. УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае аштагъэхэм ар ащыщ. Ащ къыдыхэлъытагъэу Урысыем икъэлэ цIыкIухэм яобщественнэ чIыпIэхэр лъэхъаным диштэу шIыгъэнхэм, цIыфхэм ахэм защагъэпсэфыным ищыкIэгъэ пстэур ащыгъэуцугъэ­ным фытегъэпсыхьэгъэ зэнэкъокъур илъэс къэс зэхащэ. Къалэхэм проектэу къагъэхьазырыгъэхэр зэрагъапшэхэзэ зэтырагъэпсыхьащтыр къыхахы.
Республикэр ащ зыхэлажьэм, проектитIум текIоныгъэр къыдахыгъ. Зыр мэз парк чIыпIэу «Мэздахэм» ипроект. Ащ изэтегъэпсыхьан мы илъэсым имэлылъфэгъу мазэ и 13-м рагъэжьагъ, тыгъэгъазэм и 31-м нэс аухынэу ары зэрагъэнэфагъэр.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, пшъэдэкIыжьэу ыхьырэмкIэ гъунэпкъэ гъэнэфагъэ зиIэ хъызмэтшIапIэу «Бак Строй» зыфиIорэм IофшIэнхэр ащ щегъэцакIэх. КIэлэцIыкIу джэгупIэхэр, спортым зыщыпылъыщтхэ площадкэхэр щагъэ­псынхэу, тIысыпIэхэр, хэкIидзапIэхэр, къэнэфырэ пкъыгъохэр, нэмыкI архитектурнэ псэолъэ дахэхэр щагъэуцунхэу, камерэхэр палъэнхэу, лъэсрыкIохэмрэ кушъхьэфачъэхэмрэ апае гъогухэр щашIынхэу, чъыгхэр, куандэхэр, къэгъагъэхэр щагъэтIысхьанхэу проектым къыдыхэлъытагъ.
Мы уахътэм электричествэм икIуапIэхэр агъэпсых, лъэсрыкIо ыкIи кушъхьэфачъэхэм апае гъогухэм плиткэ атыралъхьэ, остыгъэхэр зыпалъэщтхэ пкъэухэр агъэуцух, нэмыкI псэуалъэхэр зытетыщтхэ площадкэхэр ашIых.
«Мэздахэм» изэтегъэпсыхьан пстэумкIи сомэ миллион 200-м ехъу пэIухьащт. Ащ щыщэу сомэ миллиони 105,3-р федеральнэ бюджетым къыхэхыгъ. Министерствэм къызэритыгъэмкIэ, сомэ миллион 89,2-р, ар процент 84,7-р ары, агъэфедэгъах.
Мэз-парк чIыпIэу «Мэздахэр» къэлэдэсхэм ямызакъоу, хьакIэу Адыгеим икъэлэ шъхьаIэ къа­кIохэрэми зэлъашIагъэу щыт. Жьы къабзэм хэтэу къакIухьаныр зикIасэхэми, спортым пылъхэми ар шIу алъэгъу. Джы ар лъэхъаным диштэу зэтегъэ­псыхьэгъэ чIыпIэ дахэ хъущт, Мыекъуапэ имызакъоу, Адыгеир зэрэщытэу къыгъэдэхэщт.

ХЪУТ Нэфсэт.
Сурэтхэр: Iэшъынэ Аслъан.