ХэушъхьафыкIыгъэ дзэ операцием ивете­ранхэм азыфагу щызэхащэрэ шъолъыр
зэхэубытэгъэ физкультурнэ Iофтхьабзэу «Хэгъэгум иухъумакIохэм я Кубок» зы­фи­Iорэр Ставрополь къыщызэIуахыгъ.

Зэнэкъокъум Къыблэ ыкIи Темыр-Кавказ федеральнэ шъо­лъырхэм, джащ фэдэу Донецкэ ыкIи Луганскэ народнэ респуб­ликэхэм къарыкIыгъэхэ, хэу­шъхьафыкIыгъэ дзэ операцием иветеран нэбгыри 130-м ехъу хэлажьэ.
Мы зэнэкъокъур ятфэнэрэу зэхащэ. Мыщ ыпэкIэ ахэр Кузбасс, Уфа, Калугэ ыкIи Хабаровскэ ащыкIуагъэх. ШэкIогъум и 14 — 17-м ащ икIэуххэр «Сириусым» щызэфахьысыжьыщтых, шъолъырхэм азыфагу щырекIокIыгъэ зэнэкъокъум текIоныгъэ къыдэзыхыгъэхэр мыщ щагъэшIощтых.

Iофтхьабзэм икIэщакIох къэралыгъо фондэу «Хэгъэгум иухъумакIохэр» зыфиIорэр, Уры­сыем и Паралимпийскэ комитет, УФ-м спортымкIэ и Министерствэ, Ставрополь краим и Правительствэ ыкIи зи­Iэпкъ-лъэпкъ фыкъуагъэ фэ­хъугъэхэм спортымкIэ я Урысые федерацие.
«Мыщ фэдэ зэнэкъокъухэмкIэ Хэгъэгум иухъумакIохэм щысэ зэкIэми къытагъэлъэгъу. Ахэм спорт ухьазырыныгъэ дэгъу къагъэлъагъо, нэбгыришъэ ыкIи мин пчъагъэмэ агухэр къыдащае. Непэ Ставрополь, я 5-рэ Кубокым икъыдэхын, атлет нэбгыри 130-м ехъу къе­кIолIагъ, ахэм ащыщэу нэбгырэ 30-р дзэкъулыкъушIэх. Джащ фэдэу зэнэкъокъум икъызэIухын Урысыем и ЛIыхъужъ нэбгырэ 27-рэ хэлэжьагъ. Ащ къегъэ­лъагъо Iофтхьабзэм осэшхо зэриIэр. ТилIыхъужъхэр щыIэныгъэм хэгъэгъозэжьыгъэнхэмкIэ «Хэгъэгум иухъумакIохэм я Кубок» мэхьанэу иIэм зыкъыгъэшъыпкъэжьыгъ ыкIи ренэу мыщ фэдэ зэнэкъокъухэр зэ­хащэнхэр хэбзэшIу хъугъэ, — къыIуагъ Урысыем зыкъэу­хъу­мэжьынымкIэ иминистрэ игуа­дзэу, къэралыгъо фондэу «Урысыем иухъумакIохэр» зыфиIорэм итхьаматэу Анна Циви­левам.
ХэушъхьафыкIыгъэ дзэ опера­цием иветеранхэм язэнэкъокъу спорт лъэпкъихымкIэ зэхащэ: щысхэу волейбол ешIэгъэныр, щэрыоныр, щабзэмкIэ онхэр, теннис цIыкIур, пауэрлифтингыр ыкIи армрестлингыр. Спортсмен пэпчъ зы лъэныкъомкIэ ыкIи лъэныкъуитIумкIэ (волейболыр хэмытэу) зиушэтын ылъэкIыщт.

«ХэушъхьафыкIыгъэ дзэ операциер зырагъэжьагъэм къыщыублагъэу Ставропольер зэуапIэм Iут тидзэкIолIхэм ыкIи ветеранхэм лъэшэу IэпыIэгъу афэхъу. Ежь дзэкIолIхэм анэмыкIэу яунагъо исхэми ренэу яшIуагъэ арагъэкIы. ХэушъхьафыкIыгъэ дзэ операцием иветеранхэр зыхэлэжьэхэрэ Iоф­тхьабзэр тишъолъыр зэрэщы­зэхащэрэм тэркIэ мэхьанэшхо иIэу щыт. Сицыхьэ телъ лъэгэпIэ инхэм атетэу Iофтхьабзэр зэрэрекIокIыщтым. ШэпхъэшIу­хэм адиштэу спортсменхэр зэ­нэкъокъум хэлэжьэнхэмкIэ тфэлъэкIыщтыр зэкIэ тшIагъэ. ЗыкIыныгъэ ыкIи дзэ зэкъошныгъэ ахэлъэу тиспортсменхэр турнирым хэлэжьэнхэу тафэ­лъаIо, — къыIуагъ Ставрополь краим игубернаторэу Вла­димир Владимировым.
«Илъэсым къыкIоцI Урысыем и Паралимпийскэ комитет ыкIи Къэралыгъо фондэу «Хэгъэгум иухъумакIохэр» зыфиIорэм яшIуагъэкIэ «Хэгъэгум иухъумакIохэм я Кубок» хахьэу фе­деральнэ шъолъырхэм зэкIэми зэнэкъокъухэр ащыкIуагъэх. А уахътэм хэушъхьафыкIыгъэ дзэ операцием иветеранхэм пар­алимпийскэ спортым нахь щыгъуазэ ыкIи ашIогъэшIэгъон хъугъэ. Мыщ ехьыщыр зэнэ­къокъухэр Урысыем ишъолъыр­хэм ащызэхащэ хъугъэ, ахэм ветеранхэр бэу ахагъэлажьэх. Непэ хэушъхьафыкIыгъэ дзэ операцием иветеранхэр, ыпэкIэ зэхащэгъэ зэнэкъокъухэм ахэлэжьагъэхэр шъолъыр ыкIи лъэпкъ хэшыпыкIыгъэ командэхэм ахэтых, тикъэралыгъо ичемпионат, дунэе зэнэкъо­къухэм ахэлажьэх, хагъэунэфыкIырэ чIыпIэхэр къыдахых. Хэу­шъхьафыкIыгъэ дзэ операцием иветеранхэмкIэ мэхьанэшхо зиIэр Афганистан, Темыр Кавказым, Къыблэ Осетием ащыкIогъэ зэо зэфэшъхьафхэм ахэлэжьагъэхэу, дунэе зэнэкъо­къухэм текIоныгъэ къащыдэзыхыгъэхэм паралимпийскэ урокхэр ыкIи мастер-классхэр къызэрагъэлъагъохэрэр ары. ХэушъхьафыкIыгъэ дзэ опе­рацием иветеранхэу спортым пылъхэмкIэ ахэм IэпэIэсэны­гъэу аIэкIэлъыр щысэшIоу щыт, — къыIуагъ Урысыем и Пар­алимпийскэ комитет ипрезидентэу Павел Рожковым.
Зэнэкъокъу Iофтхьабзэр мэфэкI шIыкIэм тетэу Ставрополь игупчэу «Крепостная гора» зыфиIорэм шышъхьэIум и 15-м къыщызэIуахыгъ. Программэ хэхыгъэ иIэу а Iофтхьабзэм хахьэу шъолъыр патриотическэ фестиваль щыIэщт.

Шъугу къэдгъэкIыжьын, Къэ­ралыгъо фондэу «Хэгъэгум иухъумакIохэр» Урысыем и Пре­зидентэу Владимир Путиным иунашъокIэ агъэпсыгъ. Ащ пшъэрылъ шъхьаIэу иIэр хэу­шъхьафыкIыгъэ дзэ операцием иветеранхэм ыкIи ахэм яунагъохэм зэрищыкIагъэу IэпыIэгъу афэхъугъэныр ары. Ухъума­кIохэм медицинэ IэпыIэгъу зэ­рарагъэгъотырэм ыкIи щыIэ­ныгъэм зэрэхагъэгъозэжьхэрэм имызакъоу, сэнэхьат тедзэхэмкIэ рагъаджэх, IофшIэпIэ чIыпIэхэр къафагъотых, юридическэ IэпыIэгъу арагъэгъоты, сэкъатныгъэ зиIэхэм яфэIо-фашIэхэр афагъэцакIэ. 2023-рэ илъэсым мэкъуогъум и 1-м къыщыублагъэу фондэу «Хэгъэгум иухъумакIохэм» якъутамэхэм IэпыIэгъу фаехэу лъэIу тхылъ миллионрэ мин 386-рэ къаIэкIэхьагъ. Ащ щыщэу миллионрэ мин 241-р афагъэцэкIагъ.

Хэутыным фэзыгъэхьазырыгъэр
КIАРЭ Фатим.
Сурэтхэр: фондэу «Хэгъэгум иухъумакIохэр».