Сэнаущыгъэ зыхэлъ ныбжьыкIэхэм язэхахьэу илъэс къэс зэхащэрэм хэлэжьагъэх Адыгеим, Краснодар краим, Къэбэртэе-Бэлъкъарым, Къэрэщэе-Черкесым, Херсон хэкум ыкIи Къалмыкъым къарыкIыгъэ кIэлэ ыкIи пшъэшъэ 500-м ехъу. Iофтхьэбзэ шъхьаIэхэр къушъхьэу «Фыщт» ылъапэ дэжь щыкIуагъэх.

Мэфи 4-рэ кIогъэ зэIукIэгъум лъэныкъо зэфэшъхьафхэм афэгъэхьыгъэ Iофхэр къащаIэты­гъэх: гъэсэныгъэм, культурэм, спортым ыкIи шIэныгъэхэм язегъэушъомбгъун. Гъэсэныгъэм тегъэпсыхьэгъэ Iофтхьабзэр республикэм икъэлэ шъхьаIэ, Адыгэ къэралыгъо университетым, щаублагъ. Ащ къекIолIагъэ­хэр зекIонымкIэ, тыкъэзы­уцухьэрэ дунаим икъэухъумэнкIэ, экономикэмкIэ, я Хэгъэгу шIу алъэгъоу ныбжьыкIэхэр пIугъэн­хэмкIэ Iофыгъо зэфэшъхьафхэм анэсыгъэх. А пстэуми анэмыкIэу республикэм ихьакIэхэм тарихъ чIыпIэхэр зэрагъэлъэгъугъэх.
Нэужым Яворово гъэхъунэкIэ заджэхэрэм лъэсэу къыщежьэхи, зекIо чIыпIэу «Фыщт» нэсыгъэх. Мэфищым къыкIоцI ахэр спорт зэнэкъокъухэм ахэ­лэжьагъэх, лъэпкъ IэпэщысэхэмкIэ яIэпэIэсэныгъэ къагъэлъэгъуагъ, адыгэ джэгу зэхащэгъагъ, Адыгеим итарихъ, икультурэ, ичIыопс нэIуасэ зафашIыгъ, мылылъэ чIыпIэхэм, хьыкъумхэм ыкIи къушъхьэ шыгухэм анэсыгъэх.

ДзюдомкIэ олимпийскэ чемпионэу Арсен Галстян афызэхищэгъэгъэ Iофтхьабзэу «чемпионым тыригъусэу зарядкэ тэшIы» зыфиIорэр анахьэу агу къинэжьыщтхэм ащыщ.
КъыткIэхъухьэхэрэр я Хэгъэ­гу фэшъыпкъэхэу, шIу алъэгъоу пIугъэнхэм фытегъэпсыхьэгъэ игъэкIотыгъэ Iофтхьабзэм къыдыхэлъытагъэу Урысыем, Адыгеим, ТекIоныгъэм и Быракъы­шхо зэкIоцIыхыгъэхэу аIыгъыгъэх.
Анахь мэхьанэшхо ныбжьыкIэхэм зэратыгъэ хъугъэ-шIа­гъэхэм ащыщыгъ АР-м и ЛIышъхьэу КъумпIыл Муратрэ респуб­ликэм иминистрэхэм я Кабинет хэтхэмрэ пхъэмашIом дэжь щызэдыряIэгъэ зэдэгущыIэгъур. Зэхахьэм хэлэжьэрэ шъолъыр пстэуми ялIыкIохэр а зэдэгущыIэгъум хэлэжьагъэх, ахэм ахэтыгъэх студентхэм ыкIи ныбжьыкIэ общественнэ организациехэм, Урысыем иныбжьыкIэхэм я Союз, Движение Первых, «Единэ Россием» и Гвардие ныбжьыкIэ, Адыгеим игуфакIохэм, Москва дэс врачхэм я Хасэ, Адыгеим и Адыгэ Хасэ иныбжьыкIэ къутамэхэм ыкIи Краснодар краим и Адыгэ Хасэ ялIыкIохэр.

ЗэIукIэгъур къызэIуихызэ республикэм и ЛIышъхьэ Геническэ районым иныбжьыкIэхэми шIуфэс арихыгъ. Ахэр апэрэу мыщ фэдэ слетым хэлажьэх.
«Адыгеир Херсон хэкум и Геническэ район зынаIэ тезыгъэтырэ шъолъырэу щыт. Хэгъэгум ишъолъырыкIэхэм мамыр щыIакIэр зыпкъ ащигъэуцогъэнымкIэ, къэралыгъо фэIо-фашIэхэр цIыфхэм икъоу афызэшIохыгъэнхэмкIэ, социальнэ, гъэсэныгъэ, медицинэ лъэныкъохэмкIэ IэпыIэгъу ятыгъэнымкIэ республикэм иIофышIэхэм ащыщхэм бэ афашIагъэр. Тэ къыдгурэIо цIыфхэр чIыпIэ зэжъу зэрифагъэхэр ыкIи тапэкIи а IэпыIэгъур лъыдгъэкIотэщт. ТиIофтхьабзэхэм къа­хэдгъэлэжьэщтых шъолъырыкIэхэм арыс ныбжьыкIэхэри. Ащ фэдэ Iофтхьабзэхэм яшIуагъэ къэкIощт ялэгъухэм нахь дэ­гъоу нэIуасэ афэхъунхэмкIэ ыкIи зэдызэхагъэуцогъэ проектхэр зэшIуахынхэмкIэ», — къыIуагъ КъумпIыл Мурат.

Республикэм и ЛIышъхьэ джащ фэдэу шIуфэс арихыгъ Краснодар краим, Къэ­бэртэе-Бэлъкъарым, Къэрэщэе-Черкесым, Къалмыкъым къарыкIыгъэхэм, сэнаущыгъэ зыхэлъ ныбжьыкIэхэм яслетэу «Фыщтым» къызэрэдеIэхэрэм апае а шъолъыр­хэм япащэхэми зэрафэразэр къыхигъэщыгъ.
ХэушъхьафыкIыгъэу Адыгеим и ЛIышъхьэ къызщыуцугъэр дзэ операцием иIофыгъохэр ары.
«Урысыем и Президент къыгъэуцугъэ пшъэрылъхэр зэкIэ гъэцэкIагъэ хъунхэм мэхьанэшхо иI. ТичIыпIэгъухэм ащыщыбэхэм хэушъхьафыкIыгъэ дзэ операцием ишъолъыр япшъэрылъхэр зэрифэшъуашэу щагъэцакIэх. Тиобщественнэ организациехэу дзэкIолIхэм IэпыIэгъу афэхъу­хэрэм сызэрафэразэр къыхэзгъэщы сшIоигъу. Ащ мэхьанэшхо иI. ЗэкIэми зы Хэгъэгушху тызщыпсэурэр, Урысыер нахь дэгъу, нахь лъэш хъу къэс ащ щыпсэурэ цIыф, унагъо пэпчъи иIоф нахь дэгъу хъущт. Хэти зыфэгъэзэгъэ Iофыр дэгъоу ыгъэцакIэмэ, еджэныр е IофшIэныр арыми, Iофхэри нахьышIу хъущтых. ТекIоныгъэм хэти иIахь хишIыхьаным мэхьанэшхо иI!», — къыкIигъэтхъыгъ АР-м и ЛIышъхьэ.

Ащ нэужым лъэныкъо зэфэшъхьафхэмкIэ Iофхэм язытет зыфэдэм къытегущыIагъэх республикэм икъулыкъухэм япащэхэр: АР-м иминистрэхэм я Кабинет и Тхьаматэ игуадзэу, АР-м финанс­хэмкIэ иминистрэу Виктор Орловыр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, АР-м псауныгъэм икъэухъумэнкIэ иминистрэу Мэрэтыкъо Рустем, АР-м культурэмкIэ иминистрэу Аулъэ Юрэ, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, АР-м мэкъу-мэщымкIэ иминистрэу Къуанэ Анзаур, АР-м ныбжьыкIэхэм яIофхэмкIэ и Комитет итхьаматэу Максим Галушкиныр.
ЗэIукIэгъум хэлажьэхэрэм упчIэхэр къатыщтыгъэх, ежьхэм яшIоигъоныгъэхэми ашъхьашыгу къырахыщтыгъ. ГущыIэм пае, къызкIэупчIагъэхэм зыкIэ ащыщ къалэу Мыекъуапэ аэропорт щыгъэпсыгъэным джырэблагъэкIэ игугъапIэ щыIэмэ. КъумпIыл Мурат къыIуагъ зыгъэпсэфыпIэ чIыпIэу «Лэгъонакъэ» ишIын епхыгъэу аэропортым игъэпсын зэрэщытыр. ЗыгъэпсэфыпIэм транспортыр нэсынымкIэ амал ащ къытыщт.

Къалэу Мыекъуапэ дэт лицееу N 19-м чIэс пшъэшъэжъыем къахилъхьагъ лъэныкъо зэфэшъхьафхэмкIэ IэпэIэсэныгъэ­шхо зыхэлъ цIыфхэм апшъэрэ классхэм арыс кIэлэеджакIохэр аIукIэхэзэ ашIыным фытегъэпсыхьэгъэ проектыр. Респуб­ликэм и ЛIышъхьэ а гухэлъым къыдыригъэштагъ ыкIи ащ фэдэ зэIукIэгъум ежьыри хэлэжьэным зэрэфэхьазырыр къыIуагъ.
Культурэм, гъэсэныгъэм, тыкъэзыуцухьэрэ дунаим икъэухъумэн, чIыпIэхэм язэтегъэпсыхьан ыкIи нэмыкIхэм япхыгъэ проектхэу социальнэ мэхьанэ зиIэхэм адегъэштэгъэным иIофыгъуи тегущыIагъэх. Республикэм итворческэ коллективхэм хэгъэгум исценэхэм яамалхэр нахь игъэкIотыгъэу къащагъэлъэгъонымкIэ зыгъэгумэкIыхэрэ Iофыгъохэм ашъхьа­шыгу къырахыгъ.
СыхьатитIум ехъурэ зэIукIэгъур кIуагъэ. Адыгеим и ЛIышъхьэ ащ икIэуххэр зэфихьысыжьыхэ зэхъум упчIэ ыкIи проект гъэшIэгъонхэр къызэраIэтыгъэхэм апае ныбжьыкIэхэм зэрафэразэр къыхигъэщыгъ, республикэм ипащэхэр ахэм зэрахэплъэщтхэр къыIуагъ. Уахътэм нахь диштэрэ Iофыгъохэр зэкIэми апэу пхыращыщтых, ахэмкIэ IэпыIэгъу афэхъущтых.
АР-м и ЛIышъхьэ
ипресс-къулыкъу къытыгъэ
къэбархэмкIэ
Тхьаркъохъо Сафыет.
Сурэтхэр: М. Гордышов.