Адыгеим ыкIи Къэбэртэе-Бэлъкъарым ялъэпкъ гъэзетхэу «Адыгэ макъэмрэ» «Адыгэ псалъэмрэ» яжурналистхэу Тэу Замирэрэ НэкIэпыджэ Замирэрэ Черкесскэ щыIэх. Мы тхьамафэм редакциеу «Черкес хэкум» ахэр щылэжьэщтых.

Адыгэ, Къэбэртэе-Бэлъкъар, Къэрэщэе-Черкес республикхэм ялъэпкъ гъэзетхэм язэдэлэжьэныгъэ ыкIи гъэзетэу «Черкес хэкур» къызыдэкIырэр мыгъэ илъэси 100 зэрэхъурэм афэгъэхьыгъэу КъЧР-м щызэхащэрэ Iофтхьабзэхэм адиштэу мыщ фэдэ журналист зэхъожьыныр зэдэлэжьэныгъэм ишэпхъакIэу зэIофшIэгъухэм къызэдыхахыгъ.
Зэкъош гъэзетищым яредакторхэм язэхахьэу 2023-рэ илъэсым Налщык щыкIуагъэм ар щызэдаштэгъагъ.
Проектым игъэцэкIэн зыублагъэр «Черкес хэкур» ары. КъЧР-м лъэпкъ IофхэмкIэ, коммуникацие жъугъэхэмкIэ ыкIи хэутынымкIэ и Министерствэ иIэпыIэгъукIэ мы Iофтхьабзэм изэхэщэн гъэзетым иредактор шъхьаIэу Абидокъо Люсанэ зэшIуихыгъ.
Тэу Замирэрэ НэкIэпыджэ Замирэрэ пстэумэ апэу къош гъэзетым щылэжьэрэ яIофшIэгъухэм заIуагъэкIагъ, лъэпкъ журналистикэр непэ зэрэлъыкIуатэрэм, зигъо Iофыгъоу гъэзетхэм къыхаутыхэрэм атегущыIагъэх.
КъЧР-м лъэпкъ IофхэмкIэ, коммуникацие жъугъэхэмкIэ ыкIи хэутынымкIэ иминистрэу Мурат Есенеевым зэIукIэгъу дыряIагъ. Зэкъош шъолъырищым язэпхыныгъэ лъэпкъ гъэзетхэр зэрэдэлажьэхэрэм министрэм уасэ фишIэу къыхигъэщыгъ:
— Хъытыум ухэхьэ къодыемэ къэбарыр къызэрыпхыщт нэкIубгъохэр жъу­гъэу итых. Непэ къэбарынчъэ ухъун плъэкIыщтэп телефоныр пIэкIэлъмэ. Ау лъэпкъ гъэзетым пшъэрылъ шъхьаIэу иIэр бзэм икъэухъумэн ары. НыдэлъфыбзэкIэ къы­хаутырэ гъэзетхэр щыIэнхэ фае. Ахэм къэралыгъо IэпыIэгъу ящыкIагъ. Тэри зэрэтфэлъэкIэу тадэлажьэ. Непэ Къэ­рэщэе-Черкесым икъэралыгъуабзэхэмкIэ – черкесыбзэкIэ, абэзабзэкIэ, нэгъо­ибзэкIэ, къэрэщаибзэкIэ ыкIи урысыбзэкIэ – лъэпкъ гъэзетитф къыдэкIы. Пстэуми яфитыныгъэхэр къыдэлъыта­гъэх. Адыгеим ыкIи Къэбэртэе-Бэлъкъарым яжурналистхэр «Черкес хэкум» щылэжьэнхэу къызэрэкIуагъэхэр зэдэлэжьэныгъэм ишэпхъэкIэ гъэшIэгъон. Ащи едгъэхъун фае. Тилъэпкъ гъэзетхэр грантхэм якъыдэхын хэлэжьэнхэ фаеу сэлъытэ. Лъэпкъ журналистхэм яIэпэIэсэныгъэ ащ хигъэхъощт, амалыкIэхэр къаритыщтых.
Гъэзетэу «Черкес хэкур» къызыдэкIырэр илъэ­си 100 зэрэхъурэм ипэгъокIэу редактор шъхьаIэу Абидокъо Люсанэ якIэщакIоу Iофтхьэбзэ зэфэшъхьафхэр зэхащэх. Илъэ­сишъэм гъэзетым редактор шъхьаIэу нэбгырэ 24-рэ щылэжьагъ. Апэрэм – Ботэщ Ибрахьимэ Мыр­зэ ыкъом гъэзетым лъап­сэ фишIыгъ. Я 25-р апэрэ бзылъфыгъэ редактор шъхьаIэу Абидокъо Люсан, ар КъЧР-м изаслуженнэ журналист.
Гъэзетым ыныбжь илъэ­си 100 зэрэхъурэм фигъэшъуашэу ащ иIофы­ш­Iэу Хьэтай Мадинэ Iошъхьэ­мафэ зэрэдэкIоягъэр «Адыгэ макъэм» къыхиутыгъагъ.
Агъэнэфэгъэ Iофтхьабзэхэм ахэтэу шIэжь чъыг­хатэ агъэтIысхьанэу ямурад.
Зэдэлэжьэныгъэм ипроект хэтэу Тэу Замирэрэ НэкIэпыджэ Замирэрэ лъэныкъо зэфэшъхьафхэмкIэ гъэхъагъэхэр зышIыгъэ цIыф хьалэмэтхэм аIуагъэкIэщтых.