КIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение Первых» зыфиIорэм хэтхэм ащыщхэр шышъхьэIум и 13-м къыщегъэжьагъэу и 15-м нэс космодромэу Байконур щыIагъэх, ракетэу «Союз-2.1а» зыфиIорэр, транспорт къухьэлъатэу «Прогресс МС-28» игъусэу, ошъогум зэрэдэкIуаерэр кIэлэеджакIохэм алъэгъун амал яIагъ.

Урысые проектэу «Космическая экспедиция Первых» зыфиIорэм текIоныгъэ къыщыдэзыхыгъэ нэбгырэ 89-рэ мыщ щыIа­гъэх, ахэм ахэтыгъ «Движение Первых» зыфиIорэм и Адыгэ шъолъыр къутамэ хэт Вероника Ефимцевар.
КIэлэеджакIохэр Байконур щэIэфэхэкIэ монтажнэ-ушэтыпIэ корпусым ащагъэх, ракетэхэу «Протон», «Гагаринский старт» зыфиIохэрэм япэублэ комплекс ыкIи команднэ пунктыр арагъэлъэгъугъ. Джащ фэдэу Сергей Королевыр, Юрий Гагариныр зыщыпсэущтыгъэхэ унэхэр, къу­хьэлъатэу «Буран» зыфиIорэм имакет, космодромым имузей ыкIи космонавтхэм ягъэхьазырынкIэ Гупчэм икъутамэ ыкIи космонавтхэм я Аллее нэрылъэгъу афэхъугъэх.

— Ракетэр космосым зэрэдэкIуаерэр слъэгъун амал къысэзытыгъэ «Движение Первых» зыфиIорэм ыкIи «Роскосмосым» лъэшэу сафэраз. СицIыкIугъом къыщегъэжьагъэу космосыр сшIогъэ-­
ш­Iэгъон ыкIи мыщ сыкIонэу къызысаIом лъэшэу сигопагъ, слъэгъугъэр бэрэ сыгу илъыщт. Тарихъым хэхьэгъэ чIыпIэ зэфэшъхьафыбэ тагъэлъэгъугъ, ахэм ащыщ Юрий Гагариныр зыщыпсэущтыгъэ унэр. Ракетэхэр зэраугъоихэрэр нэрылъэ­гъу тфэхъугъ, ар ошъогум дэкIуае зэ­хъум сшIогъэшIэгъон дэдагъ, сызэрэгушIорэм нахь хэмылъэу нэпсхэр къысэхыщты­гъэх, — еIо Вероника Ефимцевам.
Ракетэу «Союз-2.1а» зыфиIорэр, транспорт къухьэлъатэу «Прогресс МС-28» игъусэу, быбыным зэрэфагъэхьазырырэр ыкIи ошъогум зэрэдэкIуаерэр кIэлэеджакIохэм нэрылъэгъу афэхъугъ. Дунэе форумэу «Урысыер» зыфиIорэм Iоф ешIэфэ кIэлэцIыкIухэм гупшысэу ашIыгъэхэр, зыкIэхъопсыхэрэр зэрытхагъэхэр зэрылъ капсулэр кIэухым дунэе космическэ станцием рагъэ­хьыгъ.
КIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение Первых» зыфиIорэм и Адыгэ шъолъыр къутам.