ГандболымкIэ бзылъфыгъэ Суперлигэм щешIэ­рэ «АГУ-Адыифым» илъэсыкIэ зэнэкъокъум зыфегъэхьазыры, тхьамэфитIукIэ ар рагъэ­жьэщт.

Ащ къыдыхэлъытагъэу къэралыгъом икомандэ анахь лъэшхэм ащыщэу «Ростов-Доным» ныбджэгъу зэIукIэгъу дыриIагъ, ар къалэу Ростов-на-Дону щы­кIуагъ. ЧемпионатымкIэ аужырэ зэIукIэгъоу яIагъэр 37:13-у аухыгъ, текIоныгъэр «Ростов-­Доным» къыдихыгъ.
Адыгеим икомандэ зэнэкъо­къум зэрэфэхьазырыр, джырэ уахътэм ехъулIэу гандболисткэхэм ухьазырыныгъэу аIэкIэлъыр гъэунэфыгъэнымкIэ мы ешIэгъум мэхьанэшхо иIагъ. Ащ изэфэхьысыжьхэм закъыфэбгъазэмэ, бысымхэр хэпшIыкIэу нахь лъэшыгъэх, пчъагъэр 38:19-у ахэм те­кIоныгъэр къыдахыгъ.
ЗэIукIэгъум ыуж «Ростов-Доным» итренер шъхьаIэу Ирина Дибировам ныбджэгъу зэIукIэгъум еплъыкIэу фыриIэр къыри­IотыкIыгъ, тапэкIэ анахьэу анаIэ зытырагъэтыщт лъэныкъохэр къы­гъэнэфагъэх.

— Мыекъуапэ икомандэ тадэжь къызэрэкIуагъэмкIэ инэу тыфэраз. Джырэ уахътэм тэркIэ анахь мэ­хьанэшхо зиIэр зэнэкъокъум зэ­рифэшъуашэу зыфэдгъэхьазырыныр, тиспортсменхэм яфизическэ ухьазырыныгъэ хагъэхъон амал яIэныр ары. Ау пшъэрылъэу зыфэдгъэуцужьыгъэхэр гъэцэкIагъэхэ хъугъэп. Тигандбо­листкэхэм хэукъоныгъабэ ашIыгъ. Арышъ, тиешIакIэ зэрэхэдгъэхъо­щтым тынаIэ нахь тедгъэтын фае, — къыIуагъ бысымхэм ятренер шъхьаIэ.
Суперлигэм хэт командэу «АГУ-Адыифым» зэнэкъокъур Мыекъуапэ щыригъэжьэщт. Iо­ныгъом и 6-м «Астраханочкэр» тихьакIэщт.