УФ-м теннис цIыкIумкIэ ифедерацие ипрограммэу «Урысыем инеущ­рэ маф» зыфиIорэм къыдыхэлъытагъэу мы спорт лъэпкъымкIэ Адыгэ Республикэм изэIухыгъэ зэнэкъокъу хэлэжьэщтхэр Мыекъуапэ къыщы­зэ­рэугъоих.

Апэу къэсыгъэх Курскэ хэкум испортсмен 14. Илъэси 10 — 17 зыныбжь пшъашъэхэр ыкIи кIа­лэхэр турнирым зызэрэщаушэ­тыщтым дакIоу, Белгородскэ ыкIи Брянскэ хэкухэм ялIыкIохэр ­ягъусэхэу, нэмыкI Iофтхьабзэхэми ахэлэжьэщтых.
Адыгеим къэкIогъэ хьакIэхэм Мыекъуапэ, республикэм икультурэ нэIуасэ зафашIы. Ахэр ста­дионэу «Зэкъошныгъэм» щыIа­гъэх, къызэдэчъагъэх ыкIи нэпэ­еплъ сурэт зытырахыгъ.
ЗэрагъэнэфагъэмкIэ, неущ зэ­нэкъокъур рагъэжьэщт. Зыныбжь илъэс 12-м шIомыкIыгъэ­хэм апэ заушэтыщт. Ахэр къэралыгъом ишъолъыри 10-м ехъумэ къарыкIыгъэх. Iофтхьабзэр пчэдыжьым сыхьатыр 9-м Адыгэ къэралыгъо университетым иор­дэунэу Кобл Якъубэ ыцIэ зы­хьырэм щырагъэжьэщт, учIэхьаным пае ыпкIэ лъыптын ищы­кIагъэп.