КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэ къэгъэлъэгъонэу «Осетинский колорит» зыфиIорэр шы­шъхьэIум и 16-м къыщызэIуахыгъ. Мыщ IофшIэгъэ 63-рэ хэхьагъ.

Зэхахьэр къызэIуихыгъ музе­им и Къутамэ ипащэу Шъэуап­цIэкъо Аминэт.
— Лъэпкъ тхыдэр сурэткIэ, пкъыгъо зэфэшъхьафхэмкIэ, шъуашэхэмкIэ къизыгъэлъэгъу­кIырэ къэгъэлъэгъоныр непэ тинэрылъэгъу. Кавказ шъолъырым ис лъэпкъхэм якультурэ зыщызэлъыIэсырэ чIыпIэхэр сурэтхэм ахэолъагъо. Осетинхэм яфольклор, лъэпкъ искусствэм ихэхъоныгъэхэр сурэтышIхэм дэгъу дэдэу къыраIотыкIыгъ. Мы къэгъэлъэгъоныр къытфащагъ УФ-м изаслуженнэ сурэтышIхэу Мурат Джикаевымрэ Таймураз Маргиевымрэ, Темыр Осетием — Аланием инароднэ сурэтышIэу Юрий Кцоевым. Ащ дакIоу Адыгеим ичIыпIэ дахэхэр хьакIэхэм зэра­гъэлъэгъугъ, — къыIуагъ Шъэуап­цIэ­къо Аминэт.

— ТилъэпкъкIэ къыт­пэблэгъэ осетинхэм якъэгъэлъэгъон гъэ­шIэгъонэу гъэпсыгъэ. Тызэкъот­мэ тызэрэлъэшыр Iэпэщысэхэм нафэ къытфашIы, — къыIуагъ АР-м культурэмкIэ иминистрэ игуадзэу Кушъу Светланэ.
Лъэпкъым игъашIэ дэIоры­шIэхэзэ, Iэпэ­Iасэхэм ягупшысэхэр аIапэкIэ агъэчъынхэр афы­зэшIокIы. Темыр Осетием — Аланием икъушъхьэ лъагэ, ичIыопс бай къизыгъэлъэгъукIрэ сурэтхэр нэм фэплъэкIхэрэп. Кавказым ичIыопс дэхэ зэкIужь игупсэфыныгъэ-тынчыгъэ ыкIи нэ­мыкI зэхашIэхэр осетин Iэпэ­Iасэхэм ясурэтхэм къагъэущых, дунэе гъэшIэгъоным ухащэ.
ЦIыфэу къекIолIагъэ пэпчъ ыгукIэ пэблагъэу сурэт къыхи­хыгъ. Пхъэм, гъучIым ахэшIыкIыгъэ скульптурэ гъэчъыгъэхэм лъэпкъым ишэн-хэбзэ куу къырагъэлъэгъукIы. Iэпэщысэхэм ажабзэкIэ къэгъэлъэгъогъэ тхы­дэр лIэшIэгъухэм къахэнэщт.

Iофтхьабзэм Адыгэ Респуб­ликэм ишIэныгъэлэжьхэм ащыщ­хэр, Адыгеим исурэтышIхэр, лъэпкъ интеллигенцием ина­хьыжъ гъэшIуагъэхэр, АР-м куль­турэмкIэ и Министерствэ илIыкIохэр, журналистхэр ыкIи искусствэр зикIасэхэр хэлэ­жьагъэх. МэфэкI зэхахьэр зэгъэ­фагъэу, узIэпищэу, уигъэдаIоу гъэпсыгъагъэ.
Iоныгъом и 16-м нэс къэгъэ­лъэгъоным Iоф ышIэщт.
Лъэпшъыкъо Фатим.
Сурэтхэр авторым иех.