Сэнаущыгъэ зыхэлъ ныбжьыкIэхэм яшъолъыр зэхахьэу «Фыщт-2024-р» Адыгеим щэкIо. Ащ хэлажьэхэрэр тыгъуасэ гъогу те­хьагъэх.

АР-м и ЛIышъхьэу КъумпIыл Мурат игукъэкIкIэ зэхащэгъэ Iофтхьабзэм сэнаущыгъэ зы­хэлъ ныбжьыкIэ чанхэмрэ хабзэм илIыкIохэмрэ зыщызэIукIэхэрэ чIыпIэу хъугъэм ренэу нахь зеушъомбгъу.
Мы илъэсым Къэбэртэе-Бэлъ­къарым, Къэрэщэе-Черкесым, Краснодар краим, Къалмыкъым ыкIи апэрэу Херсон хэкум якIа­лэхэмрэ япшъашъэхэмрэ ащ хэлажьэх. Ахэм анэмыкIэу тиреспубликэ имуниципалитет пстэуми къарыкIыгъэхэри ахэтых. ПстэумкIи кIэлэ ыкIи пшъэ­шъэ 500 фэдиз къэзэ­рэу­гъоигъ.
Тыгъуасэ мы Iофтхьабзэм хэлажьэхэрэр лъэсэу Фыщт ылъапсэ екIугъэх. Гъогур Кавказ биосфернэ заповедникым икъушъхьэлъэ чIыпIэ да­хэ­хэм апхырэкIы. Хэгъэгур шъхьа­фит шIыжьыгъэным фэзэогъэ дзэкIолIхэм ясаугъэтхэм ахэр якIолIэщтых, Хэгъэгу зэошхом фэгъэхьыгъэ зэдэгущыIэгъухэр зэдыряIэщтых.
Аужырэ чIыпIэу зыщызэIу­кIэщтхэр къэуцупIэу «Фыщт» дэжь. Мыщ гъэсэныгъэм, спортым, культурэм япхыгъэ Iоф­тхьэбзабэ щызэшIуахыщт, мы­лылъэ чIыпIэхэм, хыкъумхэм, къушъхьэлъэ чIыпIэхэм якIолIэщтых. НыбжьыкIэхэр нэIуасэ зэфэхъущтых, аIэкIэлъ хъугъэ сэнаущыгъэмрэ IэпэIэсэныгъэм­рэкIэ зэдэгощэщтых.
Слетым ихъугъэ-шIэгъэ ­шъхьаIэу хъущтыр Адыгеим и ЛIышъхьэ дыряIэщт зэIукIэгъур ары. А лъэхъаным кIалэхэмрэ пшъашъэхэмрэ япроектхэмрэ ягухэлъхэмрэ ащагъэгъозэ-­
щтых, шъхьэихыгъэу зыгъэгу­мэкIыхэрэ упчIэхэр республикэм и ЛIышъхьэ ратыщтых.
Мыщ ыпэкIэ гъэсэныгъэм епхыгъэ Iофтхьабзэу Мые­къуапэ щызэхащэгъагъэр Адыгэ къэралыгъо университетым щыкIуагъ. Сэнаущыгъэ зыхэлъ ныбжьыкIэхэр зекIонымкIэ, экологиемкIэ, экономикэмкIэ, я Хэгъэгу фэшъыпкъэхэу лIэ­ужхэр пIугъэнхэмкIэ экспертхэм аIукIагъэх. Ащ нэмыкIэу республикэм ихьакIэхэм къалэу Мыекъуапэ тарихъ чIыпIэу иIэхэр арагъэлъэгъугъэх.
Адыгэ Республикэм
и ЛIышъхьэ
ипресс-къулыкъу
къытыгъэ къэбархэмкIэ
Тхьаркъохъо Сафыет.