Гъогухэм къатехъухьэрэ хъугъэ-­шIагъэхэм ыкIи ахэм къыздахьырэ гумэкIыгъохэм цIыфхэр ащыухъумэгъэнхэм фэшI гъогу-патруль къулыкъум иотряд иротэу N 1-м Адыгэ Республикэм и Къэралыгъо авто­инспекцие ихэушъхьафыкIыгъэ батальон игъусэу Мыекъуапэ ыкIи Мые­къопэ районым тхьамафэ къэс «Водитель ешъуагъэр» зыфиIорэ Iофтхьабзэр ащырагъэкIокIы.
УФ-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и ГъэIорышIэпIэ шъхьаIэ ышIыгъэ унашъом къыпкъы­рыкIыхэзэ, гъогу-патруль къулыкъум иIофышIэхэр япчъагъэкIэ бэ хъухэу Iофтхьабзэм хэлажьэх. Гъогухэр ыкIи урамхэр водительхэм къаухьанхэ амылъэкIынэу уплъэкIунхэр зыщырагъэкIокIыщт чIыпIэхэр къулыкъу­шIэхэм агъэнафэх. Водитель пэпчъ къагъэуцузэ ешъуагъэу рулым Iус­хэмэ ауплъэкIу.
Полицием иподполковникэу ПIатIыкъо Ичрам.