БюджетымкIэ еджэщтхэр къэнэфагъэх
Мыекъуапэ дэт апшъэрэ еджэпIитIумэ бюджет шIыкIэм тетэу ачIэхьэгъэ нэбгырэ пчъагъэр къэнэфагъ.
Адыгэ къэралыгъо университетым ипресс-къулыкъу къызэритырэмкIэ, ныбжьыкIэ 850-рэ бюджет мылъкумкIэ еджэнхэ алъэкIыщт. Ахэм ащыщэу бакалавриатым ипрограммэ епхыгъэу нэбгырэ 711-рэ чIэхьагъ, магистратурэм ылъэныкъокIэ нэбгыри 125-рэ студент хъугъэх. Специалитетым нэбгыри 10 аштагъ. ХэушъхьафыкIыгъэ дзэ операцием щыIэхэм, ахэм яунагъохэм арысхэм фэгъэкIотэнхэр яIагъэх, нэбгырэ 19 мы илъэсым ыпкIэ хэмылъэу еджэщтых.
Урысыем ишъолъыр 65-мэ къарыкIыгъэ ныбжьыкIэхэр АКъУ-м чIэхьагъэх. Мы илъэсым апшъэрэ еджапIэм щеджэнэу фэе нэбгырэ мини 7-м ехъумэ ятхылъхэр приемнэ комиссием рахьылIагъэх. НыбжьыкIэхэм азыныкъо къэралыгъо фэIо-фашIэхэмкIэ порталым исервисэу «Онлайн шIыкIэм тетэу апшъэрэ еджапIэм чIэхьэгъэныр» зыфиIорэмкIэ ятхылъхэр къагъэхьыгъэх.
Адыгэ къэралыгъо университетым бакалавриатым, специалитетым, магистратурэм ыкIи аспирантурэм япрограммэхэм япхыгъэ лъэныкъо 62-мкIэ ныбжьыкIэхэр рагъаджэх. Сэнэхьат пстэумкIи зэнэкъокъур иныгъэ. Ыпэрэ илъэсхэм афэдэу апэрэ чIыпIэм итыр юриспруденциер ары. Мыгъэ джащ фэдэу нахь къыхахыгъэхэм ащыщых рекламэм ыкIи общественнэ зэпхыныгъэхэм афытегъэпсыхьэгъэ сэнэхьатыр, джащ фэдэу прикладной хьисапыр, зекIонымкIэ ыкIи психолог-кIэлэегъэджэ сэнэхьатыр бэмэ къыхахыгъ.
Мыекъопэ къэралыгъо технологическэ университетыр пштэмэ, мы илъэсым бюджет шIыкIэмкIэ еджэнхэу нэбгырэ 703-рэ аштагъ, ахэм ащыщэу Мыекъуапэ дэт апшъэрэ еджэпIэ шъхьаIэм нэбгырэ 673-рэ, Яблоновскэм дэт къутамэм нэбгырэ 30 ачIэхьагъ. Магистратурэм, бакалавриатым ыкIи специалитетым ыпкIэ хэлъэу чIахьэ зышIоигъохэм джыри уахътэ яI. 2024-рэ илъэсым бакалавриатым илъэныкъо 32-м щыщэу 22-мэ ыкIи сэнэхьати 7-кIэ бюджет чIыпIэхэр яIагъэх, непэрэ мафэм ехъулIэу ахэм ачIэхьагъэх. ЗэкIэмкIи мы апшъэрэ еджапIэм щеджэ зышIоигъо нэбгырэ 5178-мэ ятхылъхэр къырахьылIэгъагъ. ГъэрекIо елъытыгъэмэ, процент 17-кIэ ар нахьыб. Мыхэм азыныкъом пэIудзыгъэ шIыкIэр къызфагъэфедагъ, «Онлайн шIыкIэм тетэу апшъэрэ еджапIэм чIэхьэгъэныр» зыфиIорэмкIэ къагъэхьыгъэх.
Мыекъопэ къэралыгъо технологическэ университетым иприемнэ комиссие къызэрэщаIуагъэмкIэ, хабзэ зэрэхъугъэу, ныбжьыкIэхэр анахьэу къызэкIуалIэхэрэр медицинэм епхыгъэ сэнэхьатхэр ары. Апэрэ чIыпIэр аIыгъ Iэзэн Iофым, стоматологием, педиатрием. Джащ фэдэу псэолъэшIынымкIэ, чIыдагъэмкIэ ыкIи газымкIэ, электроэнергетикэмкIэ, электротехникэмкIэ, джырэкIэ нахь ящы-
кIэгъэ нэмыкI сэнэхьатхэмкIэ зэнэкъокъур иныгъэ.
ДЕЛЭКЪО Анет.