Мы мазэм тыркуе ХьакIэмзые тызэкIом, гъунэгъу чылагъохэм такъыщыращэкIыгъ, тагъэлъэгъугъэх, дэсхэм нэIуасэ тафашIыгъ, тахьакIагъ. Джащ фэдэу Бырджы хьаблэ дэс Мэтхэм адэжь тырагъэблэгъагъ, пчыхьэшъхьашхэ щытагъэшIыгъ. Ащ нэIуасэ сыщыфэхъугъ ыкIи сыдэгущыIагъ тыркуе Шагудж хьаблэ щыщэу, лъэпкъ IэшIагъэхэмкIэ, мэкъэмэ Iэмэ-псымэхэмкIэ IэпэIасэу Шагудж Файсал.

Файсал адыгабзэр макIэу ешIэ, гущыIэ зырыз-тIурытIумэ къэгущыIэшъущт, ау зэпыгъэщагъэу къыIотэныр къехьылъэкIы. Ащ тыдэгущыIэнымкIэ ишIогъэшхо къытэкIыгъ Адыгеим ит къуаджэу Улапэ дэс Шыкъул­тырхэм япхъорэлъфэу, Щэбрыкъомэ япхъоу, тыркуе Шагудж хьаблэ щынысэу Бэджашъэ Радэ. Ащи а пчыхьэм Мэтхэм адэжь нэIуасэ тыщыфэхъугъ, егъа­шIэм тишIэрэм фэдэу къытпэгъокIыгъ, тигъэгушхуагъ.

Ыпэрэ мафэхэм Шагудж Файсал игугъу къысфашIыгъэу щытыгъ, сыдэгущыIэ зэрэсшIоигъори раIуа­гъэти, къысажэщтыгъ. Къысигъэлъэгъунэу, шыкIэпщынэ ныкъошIэу зыдэлажьэрэри Мэтхэм адэжь къызди­хьыгъ. Ижъырэ лъэпкъ мэкъэмэ Iэмэ-псымэм ишIын ащ къызызIэкIигъэхьагъэр илъэси 10 хъугъэ. АщкIэ икIэлэ­егъэджагъэхэу зыцIэ къыриIохэрэр Тыркоо Архьанрэ ГъукIэ Замудинрэ.
— Апэм сурэтхэмкIэ шыкIэпщынэр зысэлъэгъум лъэшэу сыгу рихьыгъагъ. Арыти, ащ пылъым, ыуж итхэм дунэе хъытыум сащылъыхъузэ ГъукIэ Замудин инэкIубгъо къэзгъотыгъ, тызэфэтхагъ, зэрэпшIыщтыр сурэтэу къысфигъэхьыгъ. Ащ сырыгъуазэзэ, сиапэрэ бзэпс Iэмэ-псымэ сшIыгъэ. ЕтIанэ, ыужкIэ, Замудин Тыркуем къэкIуагъэу езгъэлъэгъуи, мэкъамэ къызырехым, ыгу рихьыгъ, «дэгъу» ыIуагъ ыкIи шыкIэпщынэ сшIымэ хъунэу Iизын къыситыгъагъ, — еIо Файсал.
Илъэсиим Файсал шыкIэпщынэ 80 ышIыгъ. Къелъэ­Iурэмэ афегъэхьазыры, аретыжьы, ыгъэтIылъэу унэм къыригъанэрэп. Тыркуем имызакъоу, IэкIыбым щыпсэухэрэми зыкъыфагъазэ.
— ШыкIэпщынэр сшIы зыхъукIэ, силъэпкъ, ащ икультурэ щыщышъ, гухахъо хэсэгъуатэ. Пхъэу сызэупсэрэр зыхэтыгъэ мэзыр сынэгу къыкIэуцо. ЕтIанэ мэкъамэ къырахыным пае сэшIышъ, ащи сегъэгушIо. Ау сыдми дэхэфэшIэу унэм илъыщтмэ, шыкIэпщынэм сиуахътэ езгъэхьынэу сикIасэп, ымакъэ Iун, мэкъамэ къытын фае. СIэмэ къапыкIырэ шыкIэпщынэ пэпчъ шIу сэлъэгъу, сыгу пыкIэу ясэтыжьы, — мэщхы Файсал.
ШIыкIэпщынэ шIыкIэм ишъэфхэмкIэ Файсал игуапэу лIэужыкIэхэм адэгощэщт, ау ыгу къеоу ыIэхэр зэгуе­щых — ныбжьыкIэхэм ашIогъэшIэгъонэп. Ары нахь мышIэми, цIыкIу-цIыкIоу рищэлIэнхэм дэлажьэ. Мастер-класс зэфэшъхьафхэр афызэхещэх. «Хэта зышIэрэр, зыгорэм ыгу нэсынкIи мэхъу», — еIо ащ.
Бзэпс мэкъэмэ Iэмэ-псымэм фэшъхьафэу Файсал нэмыкI IэшIагъэхэмкIи Iазэ. ИкIасэу зыпылъхэм ащыщ бжъэмыйхэр. Адыгэ лъэпкъым мэкъэгъэIоу иIэгъэ былым бжъакъом гъоу макъэу къиIукIырэм ар еумэхъы. Мыхэм ыкIи нэмыкI лъэпкъ Iэмэ-псымэхэу хьаты­екIо бэщым, пхъэкIычым, Iэпэпщынэм, Iэ шъхьа­лым ыкIи нэмыкIыбэу адыгэхэм яIэхэм ыкIи яIагъэхэм афэгъэхьыгъэ фильмхэр ыгъэхьазырынхэр Файсал игухэлъ. Ахэр зэрэбгъэфедэщтхэр ащ къащиIотэщт.
Мыекъуапэ — Тыркуер — Мыекъуапэ.
Сурэтхэр авторым иех.