Мыекъопэ районым лъэпкъ культурэмкIэ и Гупчэ шъолъыр мэхьанэ зиIэ Iофтхьабзэу «Дорога народных традиций» зыфиIорэр щыкIуагъ. Районыр загъэпсыгъэр илъэси 100, УФ-м лъэпкъ творчествэмкIэ изаслуженнэ купэу «Кубаночкэр» зызэхащагъэр илъэс 45-рэ зэрэхъугъэхэм ар афэгъэхьыгъагъ.

Унагъом и Илъэс иIофтхьэбзэ шъхьа­Iэхэм къадыхэлъытагъэу ар рекIокIыгъ. Адыгеим ыкIи Пшызэ шъолъыр ятворческэ куп цIэрыIохэр мэфэкIым хэлэжьагъэх. Ахэм ащыщых УФ-м Лъэпкъ творчествэмкIэ изаслуженнэ купэу «Ку­баночкэр», лъэпкъ къашъохэмкIэ ансамблэхэу «Молодость Адыгеи», «Гуфит», искусствэхэмкIэ ыкIи къэзэкъ культу­рэмкIэ кIэлэцIыкIу еджэпIэ-интернатэу В. Г. Захарченкэм ыцIэ зыхьырэр, нэмыкIхэр.
«Культурэм иунэхэр — цIыфхэр зэзыщэлIэрэ гупчэх» зыфиIорэ проектым къыдыхэлъытагъэу мэфэкIым хэлэжьагъэхэр яIофшIэкIэ амалхэмкIэ зэдэгощагъэх, творчествэм ылъэныкъокIэ анахь екIолIэкIэ дэгъухэр зыгъэфедэхэрэм ядэIугъэх. Ащ фэгъэхьыгъэ Iэнэ хъураем шъолъыритIум, Адыгеимрэ Пшызэ шъолъыррэ, ятворческэ купхэм япащэхэр хэлэжьагъэх. Ащ ыуж къашъохэмкIэ, зэкъо ыкIи зэхэт орэд къэIонымкIэ куп­хэм мастер-классхэр къатыгъэх.
МэфэкIым хэлэжьэгъэ творческэ купхэм къатыгъэ къэгъэлъэгъонышхор Iофтхьабзэм кIэух дахэ фэхъугъ.

Любовь Мокрова – УФ-м ыкIи АР-м культурэмкIэ язаслуженнэ IофышI:
— Творческэ купхэм язэныбджэгъуныгъэ кIуачIэ къыозытырэ Iахь. Зэдэлэжьэныгъэр зэшIушIэрэр ансамблэ къодыехэр арэп, кIэлэцIыкIухэмкIи ащ мэхьанэшхо иI, сыда пIомэ ахэр тинеущырэ маф. Арышъ, непэкIэ шъхьаIэр ахэм яегъэджэн, япIун, лъэпкъ творчествэм фэщэгъэнхэм икъоу Iоф дэтшIэныр ары. Лъэныкъо пстэури къызэлъиубытэу тпIухэмэ, культурэми шэн-хабзэхэми язехьэкIо цIыфхэр ахэкIыщтых.
Шъолъыр мэхьанэ зиIэ Iофтхьабзэм ыкIэм ащ хэлэжьагъэхэм зэкIэми рэзэныгъэ тхылъхэр аратыгъэх.
НэкIубгъор зыгъэхьазырыгъэр Анцокъо Ирин.
Сурэтхэр: АР-м культурэмкIэ и Министерств