Урысые общественнэ организациеу «Урысыем июристхэм я Ассоциацие» зыфиIорэм и Адыгэ шъолъыр Къутамэ зэхэсыгъо иIагъ. Iофтхьабзэм хэлэжьагъэх Адыгэ шъолъыр Къутамэм и Тхьаматэ, ащ и Совет ыкIи игъэцэкIэкIо комитет ахэтхэр, Къутамэм ичIыпIэ отделение илIыкIохэр. Iофтхьабзэм IэнатIэхэм аIуагъэхьагъэхэм щафэгушIуагъэх.

УФ-м и Президент иунашъокIэ Дыхъу Аслъан Теуцожь район хьыкумым ихьыкумышIэу агъэнэфагъ. Мыщ ыпэкIэ ар Очылхэм я Адыгэ республикэ коллегие иочылэу Iоф ышIагъ, Урысыем июристхэм я Ассоциацие ичIыпIэ Къутамэу Теуцожь районым щыIэм пэщэныгъэ дызэрихьагъ.
IэнатIэу къыфагъэшъошагъэмкIэ иIоф­шIэгъухэр Дыхъу Аслъан фэгушIуагъэх.
— ЧIыпIэ Къутамэм ипащэу Iоф ышIэзэ, Дыхъу Аслъан специалист дэгъоу зыкъыгъэлъэгъуагъ. ИIофшIэн хэшIыкIышхо фыриI, ипшъэрылъхэр щытхъу хэлъэу егъэцакIэх, зэхэщэкIо дэгъу. Хэбзэ фитыныгъэу цIыфхэм яIэхэм ащыгъэгъозэгъэнхэмкIэ, ыпкIэ зыхэмылъ юридическэ IэпыIэгъур ягъэгъотыгъэнымкIэ Iофышхо ышIагъ, — къыIуагъ Урысые общественнэ организациеу «Урысыем июристхэм я Ассоциацие» и Адыгэ шъолъыр Къутамэ итхьаматэу ЛIыхьэтыкъо Аскэр.
— Урысыем и Президент унашъом кIэмытхэзэ, хьыкумышI IэнатIэм Iухьащтыр хабзэм фэшъыпкъэу Iоф ышIагъэ­мэ, обществэм зыкъызэрэщигъэлъэгъуа­гъэр гъэлъэшыгъэ шIыкIэм тетэу ауп­лъэкIу. Дыхъу Аслъан мыщ фэдэ уп­лъэкIунхэм апхырыкIыгъ, ащ къегъэлъа­гъо цыхьэшIэгъоу зэрэщытыр ыкIи мы IэнатIэр къызэрилэжьыгъэр, — къы­Iуагъ АР-м и Апшъэрэ хьыкум и Тхьаматэу Шумэн Байзэт.
— Очылыр хьыкумышIэу гъэнэфэгъэ­ныр урысые адвокатурэмкIэ мэхьанэ­шхо зиIэ хъугъэ-шIагъэу щыт, — къыкIигъэ­тхъыгъ Урысые общественнэ организациеу Урысыем июристхэм я Ассоциацие и Адыгэ шъолъыр Къутамэ игъэцэкIэкIо комитет ипащэу, АР-м иочылхэм я Палатэ итхьаматэу Мамый Алый.
Дыхъу Аслъан къызэрэдырагъэшта­гъэм фэшI зэрафэразэр къызэрэугъоигъэхэм къыриIуагъ. Цыхьэу къыфашIыгъэр къы­зэригъэшъыпкъэжьыщтымкIэ гущыIэ къытыгъ.
Дыхъу Аслъан ычIыпIэ Урысыем июрист­хэм я Ассоциацие ичIыпIэ Къутамэу Теуцожь районым щыIэм пэщэныгъэ дызэрихьанэу агъэнэфагъ Гъо­нэжьыкъо Бамбэт. Джащ фэдэу Урысыем июристхэм я Ассоциацие зэригъэнэфагъэм тетэу Урысые общественнэ организациеу «Урысыем июристхэм я Ассоциацие» и Адыгэ шъолъыр Къутамэ игъэцэкIэкIо директорэу агъэнэфагъ Елена Телегинар.