ОСАГО-м епхыгъэу гъэпцIэгъэ Iофэу зэрахьэхэрэр сыд фэдэха? Сыдэущтэу ахэм защыуухъумэн плъэ­кIыщта?

Водитель пэпчъ дэгъоу ешIэ ОСАГО-р зыщыщыр, сыда пIомэ шIокI зимыIэ страхованием иполис зимыIэхэм пшъэдэкIыжь арагъэхьы. Автомобилыр страховать шIыгъэным епхыгъэ унашъор зыфэгъэ­хьыгъэр гъогухэм хабзэ ателъыныр, гъогурыкIоным ишапхъэхэр водительхэм амыукъонхэр ары. Ау, гукъау нахь мышIэми, автострахованием ылъэныкъокIэ гъэпцIагъэ зыхэлъ бзэджэшIагъэхэр зэрахьэхэ хъугъэ. Ахэр икъоу къычIэгъэщыгъэнхэмкIэ пэрыохъу­хэр щыIэх, водительхэм ямызакъоу, автомобилыр страховать зышIыхэрэр, джащ фэдэу эксперт-осэшIхэр зэрэзэгурыIуагъэхэм тетэу гъэпцIагъэ зэрахьэ. Ащ нэмыкIэу водительхэм ащыщхэм полисыпкIэр илъэс къэс амытыным ишIыкIэхэри къагъотых. Ау ащ фэдэ шIыкIэм уголовнэ Iоф зэрэпылъыр ащэгъупшэ.
Ямурадыр — ахъщэ къызIэкIагъэхьаныр
Автомобилыр страховать ашIызэ гъэпцIагъэ зэрэзэрахьэрэр непэ гумэкIыгъоу щыт. Хабзэр зыукъонэу ыкIи иахъщэ зышIокIодынэу фэмыем, джащ фэдэу ОСАГО-м иполис ылъэныкъокIэ гъэпцIагъэу зэрахьэхэрэр къызэтегъэуцогъэным фэшI сакъыныгъэ пхэлъын ыкIи юридическэ шIэныгъэ уиIэн фае.
Нахьыбэу агъэфедэрэ гъэпцIагъэхэм ягугъу къэтшIын.
Страховой компаниехэм агъэфедэрэ шIыкIэхэр
КъыхэкIы агент-страховщикхэм ежь якомпаниехэм гъэпцIагъэ зыхэлъ зекIуакIэхэр ащызэрахьэхэу. Страховкэ зиIэ водительхэр гъогу хъугъэ-шIагъэм зыхафэхэрэ нэуж агентхэм зэзэгъыныгъэ адашIы ыкIи автомобилым игъэцэкIэжьын тефэрэ ахъщэр нахьыбэу атхы. Ау ащ фэдэ шIыкIэмкIэ хъугъэ-шIагъэм лъапсэу фэхъугъэр икъоу агъэунэфын алъэкIырэп.
Мафэр зэблахъузэ
Водителым ОСАГО-м иполис тхьапэм тетэу е электроннэ шIыкIэм илъэу ыIыгъын фае. Документыр IэкIэмылъэу е ащ ипIалъэ икIыгъэ хъумэ, тазырэу сомэ 800 рагъэтыщт. Водителым ылъэкъуацIэ полисым имытхагъэ хъумэ, тазырыр сомэ 500. Арэу щытми, къыхэкIы страховкэм лъатыщт ахъщэм (сомэ мин пчъагъэ мэхъу) шъхьасыхэзэ, тазырыр ашIопыутэу атэу. Мыщ дэжьым къэIогъэн фае гъогу хъугъэ-шIагъэхэм ахэфэным ищынагъо зэкIэхэми зэрашъхьащытыр, сакъыныгъэ зыхэлъ ыкIи IэпэIэсэныгъэ ин зиIэ водительхэри авариехэм ахэфэнхэ алъэкIыщт. Ау гъогу хъугъэ-шIагъэм иводителэу лажьэ зиIэм ОСАГО-м истраховкэ имыIэу къызычIэкIыкIэ, ежь иахъщэкIэ лажьэ зэрихыгъэ машинэр ыгъэцэкIэжьын фае.
Джащыгъум зиахъщэ шъхьасыгъэхэм шIыкIэ зэфэшъхьафхэр къызфагъэфедэхэзэ яавтомобиль страховать зэрашIыщтым пылъых. НахьыбэрэмкIэ зэкIэIэбэжьхэзэ полисыр къыратхыкIы, аварие зыщыхъугъэ мафэм полисыр иIагъэу къашIуагъэшIыным пае. Арэу щытми, цифровой технологиер къызежьагъэм къыщыублагъэу документ нэпцIыр агъэпсыныр нахь хьылъэ хъугъэ. Мы мафэхэм узэкIэIэбэжьызэ полисыр къиптхыкIын плъэкIыжьыщтэп, сыда пIомэ страховать зышIырэм документыр автостраховщикхэм я Союз ибазэ къы­зыкIэлъэIугъэ мэфэ дэдэм регъахьэ.
Фыкъоныгъэу фэхъугъэм димыштэу
Страхователымрэ зэрарым икъегъэгъэзэжьынкIэ компанием икъулыкъушIэрэ зэрэзэгурыIуагъэхэм тетэу, машинэм фыкъоныгъэ фэмыхъугъэми, ахэр иIэхэу ашIы. Ащ къыкIэкIогъэ ахъщэм изы Iахь нэужым водителым страхователым реты.
Машинэм халъхьащт пкъыгъом ыкIи гъэцэкIэжьыным атефэщтыр тэрэзэу къагъэлъагъорэп.
Зэблахъущт пкъыгъом ыкIи гъэцэкIэжьынэу ра­шIылIэщтым ауасэ хагъахъозэ гъэпцIагъэ зэрахьэ. Страхователыр, компанием иIофышIэ, джащ фэдэу машинэхэр зыгъэцэкIэжьырэр зэрэшIэхэу бзэджэшIагъэ зэрахьэ.
Полис нэпцIхэр ащэх
Мыщ дэжьым лъэныкъуитIу къыхэбгъэщын плъэ­кIыщт: автострахованием иполис зэрэнэпцIыр страхователым пэшIорыгъэшъэу ешIэ ыкIи Къэралыгъо автоинспекцием икъулыкъушIэ къызигъэуцукIэ ригъэ­лъэгъунэу, тазыр ымытынэу ар къещэфы. ЯтIуанэрэр, зы мэфэ фирмэхэм зафагъазэ, нахь пыутэу страховкэр къащэфы.
Электроннэ полисыр къызежьагъэм къыщыублагъэу интернетымкIэ гъэпцIагъэ зыхэлъ бзэджэшIагъэхэр зэрахьэх. ГъэпцIакIохэм зэлъашIэрэ страховой компаниехэм ясайт ехьщырхэр къызэIуахых, фэгъэкIотэныгъэхэмкIэ, осэ цIыкIухэмкIэ зыIэпащэх. ТхьагъэпцIыгъэ къыздызэрахьэгъэ водительхэр гъогу хъугъэ-шIагъэм зыхафэхэкIэ агъэфедэн амылъэ­кIынэу ОСАГО-м иполис нэпцIхэр къаращэх.
ГъэпцIакIохэм шъуамыгъэделэным фэшI АвтострахованиемкIэ Урысые Союзым исайт шъуихьи, къэбарым икъоу зыщыжъугъэгъуаз.

НэкIубгъор зыгъэхьазырыгъэр
КIарэ Фатим.