Урысыем и Следственнэ комитет иследственнэ ГъэIорышIапIэу Адыгэ Республикэм щыIэм къалэу МыекъуапэкIэ иследственнэ отдел иIофышIэхэм къаугъоигъэ IэубытыпIэхэр екъух спорт еджапIэм ипащэщтыгъэу Анатолий Лелюк пщыныжь егъэхьыгъэнымкIэ.

Урысые Федерацием и Уголовнэ кодекс ия 159-рэ статья ия 3-рэ, ия 4-рэ Iахьхэм къыдалъытэрэ бзэджэшIагъэхэр (иIэнатIэ къызфигъэфедэзэ шхъу­хьагъэкIэ ахъщэшхо къызIэкIигъэхьагъ) зэрэзэрихьагъэхэм пае ар агъэмысагъ.
Следствиемрэ хьыкумымрэ зэрагъэунэфыгъэмкIэ, 2018-рэ илъэсым къыщыублагъэу 2022-рэ илъэсым нэс спорт еджапIэм ипащэщтыгъэ А. Ф. Лелюк Адыгэ Республикэм физическэ культурэмкIэ ыкIи спортымкIэ и Комитет тхылъ нэпцIхэр IэкIигъахьэщтыгъэх, нэмыкIэу къэпIон хъумэ, спортымкIэ зэнэкъо­къухэм текIоныгъэшхохэр къащыдэзыхыгъэхэр ежь ыгъасэщтыгъэхэу, ятренерыгъэу къэбар нэпцIхэр зэрыт тхылъхэр ыгъэпсыщтыгъэх.
Ау А. Ф. Лелюк хэшыпыкIыгъэ командэхэм ыкIи спортсменхэм ятренерэу зыпарэкIи къыхэкIыгъэп. Тхылъэу аIэкIигъахьэхэрэм атегъэпсыхьагъэу пстэумкIи сомэ миллион 1,4-м ехъу къыратыгъ, ежь зэрэфаеу ахъщэр ыгъэзекIуагъ.
Урысыем щынэгъончъэнымкIэ ифедеральнэ къулыкъу и ГъэIорышIапIэу Адыгэ Республикэм щыIэм къызIэкIигъэхьэгъэ къэбархэмкIэ ащ уголовнэ Iоф къыфаIэтыгъ.
Хьыкумым иунашъокIэ А. Ф. Лелюк условнэу илъэси 5 (ушэтынэу илъэси 3) тыралъхьагъ, ау мыщ дэжьым къыхэгъэхъожьыгъэн фае АР-м и Прокуратурэ илъэIу тхылъ тетэу зэрарэу аригъэхьыгъэр къэралыгъо бюджетым ыгъэкIожьын фаеу зэралъытагъэр.
Урысыем и Следственнэ комитет иследственнэ ГъэIорышIапIэу АР-м щыIэм къытыгъ