Теннис цIыкIумкIэ зэIухыгъэ зэнэкъо­къоу Кореновскэ районым щыкIуагъэм Мыекъуапэ илIыкIохэм хагъэу­нэ­фыкIырэ чIыпIих къыщахьыгъ.

Кореновскэ, Лэбапэ ыкIи Мыекъуапэ яспортсменхэу 2013-рэ илъэсым къэхъугъэ­хэм ыкIи ахэм анахьыкIэхэм заушэтыгъ.
Адыгеим икъэлэ шъхьаIэ къэзыгъэлъэгъуагъэхэр спорт еджапIэу С. М. Джэнчатэм ыцIэ зыхьырэм зыщызыгъа­сэхэрэр ары. ШышъхьэIум и 21-м рагъэжьэщт республикэ чемпионатым зыфагъэхьазырынымкIэ мыр ушэтыпIэ дэгъу афэхъугъ. Зэнэкъокъум Урысыем ишъолъыр зэфэшъхьаф­хэм къарыкIыщт спортсмен 500 фэдиз хэлэжьэщт. Джырэ уахътэм ехъулIэу субъекти 10-м ехъум ялIыкIохэр тур­нирым къызэрекIолIэщтхэр къаIуагъ.

Кореновскэ щыкIогъэ зэнэ­къокъум тикIалэхэм медали 6 къыщахьыгъ, ащкIэ лъэшэу та­гъэгушIуагъ. ТекIоны­гъэр къы­дахыгъ Матюшинхэу Адамрэ Эльдаррэ. ЯтIонэрэ чIыпIэр къафагъэшъошагъ Бзаго Дамир, Дамир Бабабековым ыкIи Ирина Славновам. Джэрз медаль къыхьыгъ илъэ­сибл зыныбжь Бзаго Даринэ.
ХагъэунэфыкIырэ чIыпIэхэр къыдэзыхыгъэхэм зэкIэми тафэгушIо, тапэкIи мыщ фэдэ гъэхъэгъэшIухэр ашIынхэу, Адыгеим ыцIэ дахэкIэ рарагъэIонэу афэтэIо.