Адыгэ Республикэм и ЛIышъхьэ и Координа­ционнэ гупчэ Дунэе къэгъэлъэгъуапIэу «Урысыер» зыфиIорэм Адыгеир зэрэхэлэжьагъэм икIэ­уххэр щызэфахьысыжьыгъэх. 2023-рэ ­илъэсым шэкIогъум ­къыщегъэжьагъэу 2024-рэ илъэсым бэдзэ­огъум нэс Москва и ВДНХ ар щыкIуагъ.

Урысыем ишъолъыр 89-мэ, федеральнэ къулыкъухэм, корпорациехэм, общественнэ организациехэм яэкспозицие гъэшIэгъонхэр а уахътэм къыхиубытэу къагъэлъэгъуагъэх. Джащ фэдэу культурэм, IофшIэным, спортым ыкIи гъэсэныгъэм япхыгъэ программэхэр щызэхащагъэх. Нэбгырэ миллион 18-м ехъу а уахътэм къыкIоцI форумым хэлэжьагъ.
КIэуххэм язэфэхьысыжьын, зэхэщакIохэм ыкIи ащ хэлэ­жьагъэхэм ягъэшIон япхыгъэ Iофтхьабзэм хэлэжьагъэх АР-м иминистрэхэм я Ка­бинет и Тхьаматэ игуадзэу ЛIыхэсэ Махьмуд, АР-м и Къэралыгъо Совет — Хасэм и Тхьаматэу Владимир Нарожнэр, хэбзэ къулыкъухэм япащэхэр.
Iофтхьабзэм ихьэкIэ гъэшIуагъэхэм ахэтыгъэх гуфа­кIохэр, общественнэ, лъэпкъ-­культурнэ организациехэм ялIыкIохэр, гъэсэныгъэ зыщарагъэгъотырэ учреждениехэм яIофышIэхэр, творче-
скэ купхэм ахэтхэр, художест­веннэ IэшIагъэхэмкIэ IэпэIа­сэхэр, къэбарлъыгъэIэс амал­хэм яIофышIэхэр — къэгъэлъэгъоным иIофшIэн анахь чанэу хэлэжьагъэхэр зэкIэ.
Адыгеим и ЛIышъхьэу Къум­пIыл Мурат ыцIэкIэ къе­кIолIагъэхэм шIуфэс къари­хыгъ АР-м иминистрэхэм я Кабинет и Тхьаматэ игуа­дзэу ЛIыхэсэ Махьмудэ. Ащ къызэрэхигъэщыгъэмкIэ, къэ­гъэ­лъэгъонэу кIуагъэм нафэ къышIыгъ цIыф лъэпкъыбэмэ ялIыкIохэр зыщыпсэухэрэ Урысыем, ти Къэралыгъошхо игъэпытэн лъэпкъ пэпчъ, шъолъыр пэпчъ иIа­хьышхо зэрэхэлъыр.

«Президентэу Владимир Пу­тиным, мы къэгъэлъэгъонышхор зэхэзыщэгъэ пстэуми яшIуагъэкIэ Адыгеим игъэхъэгъэ анахь инхэр зэрэхэгъэгоу ядгъэлъэгъунымкIэ амал дэгъу тиIагъ. Непэ Адыгеир зэрэпсэурэр, къэкIощт уахътэмкIэ гухэлъэу иIэхэр игъэкIотыгъэу мыщ нафэ къащыфэтшIыгъэх. Республикэм, ащ итарихъ, шэн-хабзэу илъхэм, цIыф лъэпкъэу щыпсэу­хэрэм якультурэ афэгъэхьыгъэу нахьыбэу зэрядгъэшIэщтым, зэрядгъэлъэгъущтым ыуж титыгъ. Ахэм адакIоу инвестициехэмкIи амалэу иIэхэр къэдгъэлъэгъуагъэх», — къыIуагъ ЛIыхэсэ Махьмудэ.
Ащ къызэрэхигъэщыгъэмкIэ, уахътэу къыдэфагъэм къыкIоцI Адыгеим истендхэм культурэмрэ IофшIэнымрэ япхыгъэ Iофтхьэбзэ 200-м ехъу ащызэхэщагъэ хъугъэ. Творческэ куп зэфэшъхьафхэм якъэгъэлъэгъонхэр, мастер-классхэр ыкIи нэмыкI Iофтхьабзэхэр къекIолIагъэхэм ашIогъэшIэгъоныгъэх. Республикэм иныбжьыкIэхэу ыкIи Адыгеим истудентхэм я Ассоциацие хэтхэу Москва иапшъэрэ еджапIэхэм ачIэсхэм афэгъэхьыгъэ рэзэныгъэ гущыIэхэри ащ къы­Iуагъэх.
УФ-м и Президент иунашъокIэ Лъэпкъ гупчэу «Урысыер» хэгъэгум зэрэщызэхащэщтыр, къэралыгъом ишъолъыр пстэуми ащ икъутамэхэр къызэращызэIуахыщтхэр къыхи­гъэщыгъ.
Адыгэ Республикэм экономикэ хэхъоныгъэмкIэ ыкIи сатыумкIэ иминистрэу Шэуджэн Заур къызэриIуагъэмкIэ, къэгъэлъэгъонхэр зы­щыкIогъэхэ мафэхэм республи­кэм щыпсэурэ цIыфхэм ащыщэу бэ ВДНХ-м щыIагъэр, кIэлэеджа­кIохэр ыкIи студентхэр зэхэтхэу а чIыпIэм ащэщтыгъэх. Республикэм илIыкIохэр форум зэфэшъхьафхэм, Iэнэ хъураехэм, зэхэсыгъохэм ыкIи конференциехэм ахэлажьэщтыгъэх. КъэгъэлъэгъуапIэм щыIагъэхэм Адыгеир зэрагъэлъэгъуным иамал аратыгъ, зекIо путевки 10 ахагощагъ.
АР-м и Къэралыгъо Совет — Хасэм и Тхьаматэу Владимир Нарожнэр республикэ къэгъэлъэгъуапIэм изэхэщэн фэгъэхьыгъэу къызэриIуагъэмкIэ, ащ амал дэгъу къытыгъ Адыгеим итарихъ, ишэн-хабзэхэм, икультурэ кIэн, джащ фэдэу джырэ уахътэм диштэрэ зэхъокIыныгъэшIухэу экономикэм фэхъу­хэрэм цIыфхэр нэIуасэ афэшIы­гъэнхэмкIэ.
Адыгэ Республикэм и ЛIышъхьэ ыцIэкIэ ЛIыхэсэ Махьмуд джыри зэ къыхигъэщыгъ Адыгеим икъэгъэ­лъэгъон епхыгъэ IофшIэным чанэу хэлэжьэгъэ пстэуми зэрафэразэр. Ащ ыуж къыхагъэщыгъэхэм афагъэшъошагъэхэр аратыжьыгъэх. АР-м и ЛIышъхьэ, Къэралыгъо Совет — Хасэм, АР-м экономикэ хэхъоныгъэмкIэ ыкIи сатыумкIэ и Министерствэ ярэзэныгъэ тхылъхэр, Дунэе къэгъэлъэгъопIэ-фору­мэу «Урысыер» зыфиIорэм инэпэеплъ медаль афагъэшъошагъэх зэхэщакIохэм ащыщхэм, творческэ купхэм ахэтхэм, лъэпкъ IэпэщысэхэмкIэ къахэщыгъэхэм, Адыгеим и Мафэ икъэгъэлъэгъуапIэ епхыгъэ Iофтхьабзэхэм анахь чанэу ахэлэжьагъэхэм.
АР-м и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.