АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет илъэс къэс зэ­хищэрэ зэнэкъо­къоу «Атэжъ пIашъэхэм ячIыгу» зыфиIорэм зэ­фэ­хьысыжьхэр фашIыгъэх.

Республикэм икъэбарлъыгъэIэс амалхэм ялIыкIохэр ащ хэлажьэх, хэкум къэзыгъэзэжьыгъэхэр щы­Iэныгъэм зэрэхэгъо­зэжьыгъэхэр къизыIотыкIырэ гъэзет тхыгъэхэр, радио ыкIи телекъэтынхэр агъэхьазырых.
Мыгъэрэ зэнэкъокъум къыщыхагъэщыгъэхэм ащыщ лъэпкъ гъэзетэу «Адыгэ макъэм» икор­респондентэу Анцокъо Ири­нэ. Ащ иIофшIагъэу «Ихэку гупсэфыпIэ фэ­хъугъ» зыфиIорэм гъэзет тхыгъэхэмкIэ я 2-рэ чIыпIэр къыфагъэшъошагъ. ТекIоныгъэр къыдэзыхыгъэр гъэзетэу «Майкоп­ские новости» зыфиIорэм иредактор шъхьаIэ игуа­дзэу Татьяна Филионоваар ары. Ащ итхыгъэу «Долгая дорога домой Бюлента Жане» зыфиIо­рэр осэшIхэм къыхагъэщыгъ. Я 3-рэ хъугъэ гъэ­зетэу «Советскэ Адыгеим» иобозревателэу Екатерина Нужнаяр.
РадиокъэтынхэмкIэ КъТРК-у «Адыгеим» ирадиокъулыкъу ипащэу Хьа­кIэмыз Сусанэ икъэтынэу «Лъэпкъыр, гъашIэр, лъэ­хъаныр…» анахь дэгъоу осэшI купым ылъытагъ. Я 2-рэ чIыпIэр ащ иIофшIэгъоу, къэтынхэм язещакIоу Хьакъунэ Заремэ къылэ­жьыгъ. Радиокъэтынэу «ГъашIэм инэкIубгъохэр» зыфиIорэм ар дэлэжьагъ. КъТРК-у «Адыгеим» ирадиокъулыкъу инновеща­ниемкIэ иотдел ипащэу Ты­гъужъ Саниет икъэты­нэу «ГупсэфыпI» зыфи­Iорэр я 3-рэ хъугъэ.
ТелекъэтынхэмкIэ апэрэ чIыпIэр ыхьыгъ КъТРК-у «Адыгеим» икъэ­тынэу «Хэкум иIаплI» зы­фиIорэм. Ащ дэлэжьагъэх къэтынхэм язещакIоу, журналистэу Беда­нэкъо Замирэ, режиссерэу Хъу­тIыжъ Светланэ, опе­рато­рэу ЛIэхъусэжъ Амир. ЯтIо­нэрэ чIыпIэр къы­лэжьыгъ КъТРК-у «Адыге­им» ителекъэтынэу «Цэй­хэм ягъогу». Ар агъэхьазырыгъ тематическэ къулыкъум ипащэу Къуижъ Аминэт, режиссерэу Гъазые Бирамхъан, операторэу Шъэджэшъэ Азэмат, видеоинженерэу Ирина Шашковам.
Комитетым итхьаматэу Шъхьэлэхъо Аскэр зэкIэми «тхьашъуегъэпсэу» къариIуагъ, хэкум къэзыгъэзэжьыгъэхэм алъэныкъо­кIэ къэбарлъыгъэIэс амал­хэм Iофэу ашIэрэм мэхьанэ ин зэриIэр къыхигъэщыгъ.
«Хэкум къэзыгъэзэжьыгъэхэр щыIэныгъэм зэ­рэхэгъозэжьыгъэхэр, непэ зэрэпсэухэрэр цIыфхэм алъызгъэIэсын зылъэкIыщтыр шъоры. Ахэм дахэу афэпIонэу атефэрэр бэ. Республикэм иэкономикэ, икультурэ хэхъо­ныгъэ ашIыным пылъых, лъэп­къыр къагъэдахэ», — къы­Iуагъ Шъхьэлэхъо Аскэр.
Бжыхьэкъо Бэл.