Адыгеир хэлажьэ
Урысые марафонэу «Спортым ичIыгу» зыфиIорэм Адыгеир хэлэжьэнэу ригъэжьагъ.
Шъолъыр едзыгъом республикэм имуниципалитети 5-мэ ялIыкIохэм зыщаушэтыгъ. Программэм хэхьагъэх физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм ишапхъэхэр тыгъэнхэр, баскетболыр, унэгъо эстафетэр ыкIи кIочIэ экстримыр.
Iофтхьабзэм хэлэжьагъэхэм зэкIэми дэгъоу зыкъагъэлъэгъуагъ, ау текIоныгъэр къыдэзыхыгъэр Красногвардейскэ районым ихэшыпыкIыгъэ команд ары. Мы муниципальнэ образованием илIыкIохэм Урысые зэнэкъокъум ифинал едзыгъо Адыгеир къыщагъэлъэгъощт. Ар шышъхьэIум и 25-м Калининградскэ хэкум щыкIощт.
